Proverbios 23 - Q'eqchi Bible

- 6 -

¹ Naq jun xnimal ru winq tatxb'oq chi wa'ak, k'oxla chi us ani sa' aj ochoch wankat.

² Us ta kamkaq aawe xb'aan tz'okaak, chakuy b'an aawib' chi wa'ak.

³ Maarahi li xsununkil tzekemq: mare wachik yal xyalb'al aawix yo.

- 7 -

⁴ Maatawasi aawib' chirix li b'ihomal, maakamsi aawib' chi xk'oxlankil a'an,

⁵ xb'aan naq sa' junpaat naxik jo' naxik'ank li t'iw. Wi relik chi yaal toxaawil li b'ihomal, sa' junpaat taasachq chawu.

- 8 -

⁶ Matxik chi wa'ak sa' rochoch junaq aj pix, chi moko charahi li xchaab'il tzekemq,

⁷ xb'aan naq a'an chanchan junaq ismal sa' laakux. Li winq a'an tixye aawe: “Wa'in ut uk'an”, chan, ab'an moko yaal ta li naxye.

⁸ Moqon chik taaxa'wa li k'aru xatzeka, ut maak'a' x'ok wi' naq xaye chaab'il aatin re.

- 9 -

⁹ Maak'e xchaab'il na'leb' li maak'a' xk'a'uxl, xb'aan naq yal tixse'e laachaab'il aatin xaye.

- 10 -

¹⁰ Maajal xna'aj eb' li mayer nub'ajl, chi moko taamaq' xch'och'eb' li neb'a'yox,

¹¹ xb'aan naq wank jun nakolok re, jwal kaw rib', ut A'an taaraqoq aatin sa' aab'een.

- 11 -

¹² K'ul laatzolb'al chi sa laach'ool ut k'e sa' laawaanm laachaab'il tijb'al.

- 12 -

¹³ Maakanab' xtijb'al li saaj al. Wi taarap chi tz'uum, moko re ta xkamsinkil,

¹⁴ re b'an xkolb'al li xyu'am chiru li kamk.

- 13 -

¹⁵ At walal ink'ajol, naq toxaataw laachaab'il na'leb', taasaho'q ajwi' linch'ool laa'in.

¹⁶ Q'axal taasaho'q li waanm naq tatwab'i chi aatinak chi chaab'il.

- 14 -

¹⁷ Maarahi li xna'leb'eb' laj maak, chaxiwaaq b'an ru li Qaawa'.

¹⁸ Chi jo'kan sa toxaawil li kutan chaalel, ut taatz'aqloq ru laawoyb'enihom.

- 15 -

¹⁹ Ab'i, at walal, ut tzol aawib'; maakanab' xtaaqenkil li chaab'il b'e.

²⁰ Maajunaji aawib' rik'ineb' li neke'kalaak, chi moko rik'ineb' li neke'xten xsa'eb' chi wa'ak,

²¹ xb'aan naq li kalaak ut li numwa'ak nak'ehok sa' neb'a'il, ut eb' laj q'em te'suq'o'q rixeb'.

- 16 -

²² Chat-ab'inq chiru laayuwa', li xsiyank aawe, ut maatz'eqtaana laana' sa' li xtiixilal.

²³ Sik' li yaal, ut maak'ayi; tamresi li chaab'il na'leb', li tzolok ut li seeb'al k'a'uxl.

²⁴ Li xyuwa' li alalb'ej chaab'il wank xyaalal naq sa sa' xch'ool: xsiya jun li winq wank xna'leb'.

²⁵ Sahoqeb' b'i' laana' ut laayuwa'; nimaq xsahil xch'ool li x'alank aawe.

- 17 -

²⁶ At walal ink'ajol, k'e aach'ool chi wab'inkil, ut il chi us li b'e nink'ut chawu.

²⁷ Xb'aan naq laj yumb'eet, a'an chanchan li siwan, ut li ixq aj muxul sumlaak chanchan jun li jul laatz' xsa'.

²⁸ Naramok sa' b'e jo' laj elq', ut xmaak a'an naab'aleb' chi winq xe'oso'k sa' li maak.

- 18 -

²⁹ Ani aj e li rahilal, ani aj e li tz'uyink, ani aj e li raaxiik' ut li yaab'ak? Ani natiq'e'k chi maak'a' xyaalal? Ani kaqkaq xsa' eb' li ru?

³⁰ A'eb' li ink'a' neke'xkanab' li kalaak, ut junelik neke'xyal li ak' ha' nakaltesink.

³¹ Mixik aach'ool chirix li b'iin: kaqkaq na'ilok ut nalemtz'unk sa' li sek', saasa ruk'b'al naq nak'utunk.

³² Ab'an sa' roso'jik chanchan xmay li k'anti'; ra natiwok kama' jun ikb'olay.

³³ Tatxk'e chi ilok k'a'aq re ru ink'a' aawilom, ut taayehatq memil aj aatin xb'aan.

³⁴ Chanchan tawi' wankat sa' xyi li palaw, sa' ru'uj junaq xche'el li jukub'.

³⁵ Ut taaye: “Xine'xsak' ut ink'a' xweek'a; xine'xrap chi tz'uum chi ink'a' xinnaw. Ab'an naq taa'ajq wu, tinxik wi' chik chi kalaak”, cha'qat.