Proverbios 22 - Q'eqchi Bible

¹ Jwal us naq nawnooq laachaab'ilal chiru naq wank aab'ihomal; q'axal us wi' chik li loq'al chiru li oor ut li plaat.

² Li b'ihom ut li neb'a' juntaq'eeteb': yoob'tesinb'ileb' xb'aan li Yos xkab'ichaleb'.

³ Li wank xna'leb' ink'a' naxch'ik rib' sa' li raaxiik' naq naril; ab'an li maak'a' xk'a'uxl tiik naxik ut naxk'ul li rahilal.

⁴ Li naxkub'si rib' ut naroxloq'i li Qaawa' naq'ajkamuuk rik'in b'ihomal, loq'al ut yu'am.

⁵ Li ink'a' us xna'leb' naxtaw k'ix ut ra'al sa' li xb'e; ab'an li naxkol li xyu'am ink'a' naxk'ul chi jo'kan.

⁶ K'e xna'leb'eb' li kok' poyanam naq toj saajeb'; ut naq toxe'tixq, ink'a' taasachq sa' xch'ooleb'.

⁷ Li b'ihom nanumtaak sa' xb'een li neb'a'; ut li wank xto' tumin nakanaak cho'q xmoos li nak'ehok tumin chi to'.

⁸ Li nab'aanunk maa'usilal, tixk'ul rahilal, xb'aan naq li xwankilal taasache'q ru ut taa'oso'q.

⁹ Osob'tesinb'ilaq li na'uxtaanank u, xb'aan naq naxwotz li xtzekemq rik'ineb' li neb'a'.

¹⁰ Isi aawik'in laj yoob'anel ch'a'ajkilal, ut taaraqe'q li wech'ij ib' ut li raaxiik'.

¹¹ Li chaab'il xch'ool ut yaal na'aatinak, a'an nakanaak cho'q ramiiw li awab'ej.

¹² Li Qaawa' naxk'aak'ale ut naxkol li chaab'il xna'leb', ut naxk'ut xxutaan laj tik'ti'.

¹³ Naq laj q'em ink'a' naraj k'anjelak, naxye: “Wank jun kaqkoj sa' b'e ut naru ninxkamsi”, chan.

¹⁴ Li naxch'ik rib' rik'in laj yumb'eet, a'an jo' li t'ane'k sa' siwan: aran neke'oso'k li neke'tz'eqtaanank re li Qaawa'.

¹⁵ Ak reheb' li saaj poyanam naq maak'a' xna'leb'eb'; ab'anan li xrapb'aleb' chi tz'uum nab'aanunk naq te'xtaw b'ayaq.

¹⁶ Li narahob'tesink re li neb'a' re naq taab'ihomo'q, jo' ajwi' li nasihink re li b'ihom, toxneb'a'o'q.

III. XYEHOMEB' LI WANKEB' XNA'LEB' (22,17—24,22)

¹⁷ Ab'i ut k'e reetal li neke'xye li wankeb' xna'leb'; k'e aach'ool chi rab'inkil linnawom.

¹⁸ Wi taak'uula sa' laach'ool li xyehomeb' ut junelik wanq sa' xtz'uumal aawe, q'axal taasaho'q sa' laach'ool.

¹⁹ Sa' li kutan a'in ok we chi xyeeb'al aawe chixjunil a'an re naq k'ojk'ooq laach'ool rik'in li Qaawa'.

²⁰ Anaqwan xintz'iib'a lajeeb' xka'k'aal li chaab'il k'a'uxl, b'arwi' wank li chaab'il na'leb' ut nawom,

²¹ re naq taanaw chi tz'aqal li yaal ut tatruhanq xch'olob'ankil chiru li taapatz'oq aawik'in.

- 1 -

²² Maawelq'a li k'aru re li neb'a' yal xb'aan naq neb'a', chi moko chateneb' maak sa' xb'een li toq'ob'aal ru, sa' li raqleb'aal aatin.

²³ Xb'aan naq li Qaawa' taakoloq re, ut tixsach ruheb' li xe'rahob'tesink re.

- 2 -

²⁴ Maak'am aawib' sa' amiiwil rik'in li josq' aj winq, chi moko chawochb'eeni li ch'i'ch'i' re.

²⁵ Mare anchal taatzol aawe rik'in ut taak'e aawib' sa' ch'a'ajkilal.

- 3 -

²⁶ Maayeechi'i aawib' chi xtojb'al jalan aj k'as,

²⁷ xb'aan naq wi maak'a' k'aru taatoj wi', tate'xkanab' sa' b'e.

- 4 -

²⁸ Maajal xna'aj li nub'ajl xaqab'anb'il xb'aaneb' laaxe'toon.

- 5 -

²⁹ Li naxk'e xch'ool sa' li xk'anjel, taak'anjelaq chiruheb' awab'ej ut ink'a' chiruheb' yalaq aniheb'.