Proverbios 21 - Q'eqchi Bible

¹ Li xk'a'uxl li awab'ej chanchan jun nima', li nak'ame'k xb'aan li Yos b'arwi' naraj A'an.

² Li junjunq naxk'oxla naq us chixjunil li naxb'aanu; ab'an li Qaawa' naxnaw li k'aru wank sa' li ch'oolej.

³ Xb'aanunkil li usilal ut li tiikilal, q'axal loq' cho'q re li Qaawa' chiru chixjunil li k'atb'il mayej.

⁴ Li q'etq'etil ut li nimob'resink ib' a'an maak. Jo'kan ajwi' li xk'a'uxeb' li ink'a' useb' xch'ool.

⁵ Li k'aru k'oxlanb'il rix chi chaab'il, q'axal us na'elk; a'ut li na'uxmank sa' junpaat, taajuk'e'q chi junwaakaj.

⁶ Li b'ihomal sik'b'il rik'in b'alaq'ik, maak'a' na'ok wi'; a'an chanchan li sib' cho'q reheb' li neke'xsik' li kamk.

⁷ Li raaxiik' nasachok reheb' li ink'a' useb' xna'leb', xb'aan naq ink'a' neke'wank sa' tiikilal.

⁸ Li xb'e li ink'a' us xna'leb', a'an yokos ru; li xk'anjel li chaab'il xch'ool, a'an tz'aqal re ru.

⁹ Jwal us li wank sa' kuukil ochoch chiru li wank sa' chaab'il kab'l rochb'een junaq josq' aj ixq.

¹⁰ Li ink'a' us xna'leb' junes maa'usilal naxik wi' xch'ool; maajun sut naril xtoq'ob'aal ru li ras riitz'in.

¹¹ Charap chi tz'uum li q'etq'et, ut eek' chik wanq li kach'in xna'leb'. Ab'anan wi seeb' laak'a'uxl, tz'aqal laaq'usb'al re naq taatzol aawib'.

¹² Li Yos tiik xch'ool naxk'e reetal li rochoch li ink'a' us xna'leb', ut naxsach ru chi junwaakaj.

¹³ Li ink'a' naruxtaana ru li neb'a' naq wank sa' rahilal, ink'a' ajwi' taatenq'aaq naq tixpatz' usilal.

¹⁴ Li sihink sa' muqmu naxkotz li josq'il wi nak'eemank sa' xq'ehil.

¹⁵ Naq wank li tiikilal, nasaho'k li tiik xch'ool; ab'anan cho'q reheb' li ink'a' useb' xna'leb', a'an xiw xiw wank.

¹⁶ Li naxkanab' xb'aanunkil li chaab'ilal, sa' junpaat taachalq li kamk sa' xb'een.

¹⁷ Li naxik xch'ool chirix li jo'maajo'il na'leb', taaneb'a'o'q; li nawulak chiru li b'iin ut li sununkil b'an, maajoq'e taab'ihomo'q.

¹⁸ Li ink'a' us xna'leb' ut laj b'alaq' te'rahob'tesiiq cho'q ruuchileb' li tiikeb' xch'ool ut li chaab'ileb' xyu'am.

¹⁹ Jwal us li wank sa' chaqich'och' chiru li wank sa' chaab'il kab'l rochb'een junaq josq' aj ixq.

²⁰ Sa' rochoch li wank xna'leb' wank b'ihomal ut sununkil b'an; a'ut li maak'a' xna'leb' yal naxb'atz'unle li xtumin.

²¹ Li naxsik' li tiikilal ut li chaab'ilal, tixtaw li yu'am ut li sahilal.

²² Li wank xna'leb' na'ok chi yalok rik'in jun kawub'resinb'il tenamit, ut naxjuk' li xsuttz'akil li k'ojk'o wi' xch'ooleb'.

²³ Li chaab'il na'aatinak ut naxra li ru'uj raq', naxkol rib' chiru li rahil ch'oolej.

²⁴ Aj rahob'tesinel, q'etq'et ut aj eetz'unel, a'an nayeemank re li naxnimob'resi rib' chiruheb' li ras riitz'in.

²⁵ Laj q'em chixjunil nach'ume'k wi' xch'ool, ab'anan ink'a' naraj k'anjelak;

²⁶ chixjunil naxrahi rajlal kutan. A'ut li tiik xch'ool nasihink chi maak'a' naxpatz' cho'q reeqaj.

²⁷ Li Qaawa' naxtz'eqtaana li xmayejeb' li ink'a' useb' xch'ool. Ma toja' ta chik naq yal kab' rix xch'ooleb' naq neke'xk'e?

²⁸ Li testiiw aj b'alaq' taasache'q ru; a'ut li nayehok li yaal, taakanab'aaq chi aatinak.

²⁹ Li ink'a' us xna'leb', naxb'aanu rib' naq kaw xch'ool; a'ut ka'ajwi' li nawank sa' li tiikilal k'ojk'o xch'ool xb'aan naq maak'a' xmaak.

³⁰ Chiru li Qaawa' maak'a' na'ok wi' li chaab'il na'leb', li seeb'al k'a'uxej ut li na'leb'ak.

³¹ Nakawresimank li kawaay cho'q re xkutankil li yalok, ab'anan a' li Qaawa' nak'ehok li q'axok u.