Proverbios 19 - Q'eqchi Bible

¹ Jwal us li neb'a' ut tiik xch'ool chiru li maak'a' xna'leb' ut laj b'alaq'.

² Maak'a' sa xb'aanunkil naq maak'a' li k'oxlak; li seeb'ank ib' nak'ehok chi maakob'k.

³ Li maak'a' xna'leb' nasachk sa' li xb'e, ut chirix a'an naxk'e xmaak li Qaawa'.

⁴ Li b'ihom wank naab'al li ramiiw; ab'an li neb'a' nakanaak xjunes.

⁵ Li testiiw aj b'alaq' tixk'ul xtojb'al li xmaak; ut li natik'ti'ik maak'a' naru tixkol wi' rib'.

⁶ Naab'aleb' neke'sik'ok re li b'ihom; chixjunileb' neke'raj wank cho'q ramiiw li nasihink.

⁷ Li neb'a' natz'eqtaanaak xb'aaneb' li rech'alal; ma toja' ta chik ink'a' taakanab'aaq xjunes xb'aaneb' li ramiiw? Us ta naxtz'aama usilal chiruheb', ab'an eb' a'an maak'a' neke'raj re.

⁸ Li natzolok ut naxk'anjela ru li na'leb' li ak xtzolom naxra rib' ut us na'elk sa' chixjunil.

⁹ Li testiiw aj b'alaq' tixk'ul xtojb'al li xmaak; ut li natik'ti'ik, taasachq li xyu'am.

¹⁰ Ink'a' naxk'ul rib' naq li maak'a' xna'leb' taab'ihomo'q, chi moko naq junaq aj k'anjel taataqlanq sa' xb'eeneb' li xninqal ru winq.

¹¹ Li wank xk'a'uxl naxkuy li xjosq'il; ut naxtaw xloq'al wi ink'a' naxk'e sa' xch'ool li hob'e'k.

¹² Naq li awab'ej najosq'o'k, naxjap re jo' li kaqkoj; ut naq na'usilank, a'an chanchan li k'ajob' sa' xb'een li pach'aya'.

¹³ Li alalb'ej maak'a' xna'leb' naxk'e xtib'l xjolom li xyuwa'; ut li ixaqilb'ej aj raaxiik' a'an kama' li okes na'ok sa' li kab'l.

¹⁴ Li ochoch ut li tumin a'an qamaatan nachalk rik'in li qana' qayuwa'; ab'an jun chaab'il ixaqilb'ej a'an qamaatan nachalk rik'in li Yos.

¹⁵ Laj q'em junes wark naxb'aanu; ut li ink'a' naraj k'anjelak, tixkuy xtz'okajik xb'aan li xq'emal.

¹⁶ Li naxpaab' li chaq'rab', naxra li xyu'am; li naxtz'eqtaana li raatin li Yos, taakamq.

¹⁷ Li naruxtaana ru li neb'a', chanchan ajwi' re li Yos yo chi xb'aanunkil, ut li Qaawa' taak'ehoq reeqaj re.

¹⁸ Chatij laawalal naq toj naxk'e rib' chi q'use'k; ab'an naq taak'e xlob', chak'e reetal naq ink'a' taakamsi.

¹⁹ Li q'axal najosq'o'k tixk'ul xq'ajkamunkil; wi taakuy xmaak, taak'ayq xb'aanunkil.

²⁰ Chak'e sa' aach'ool laatijb'al ut chapaab' laaq'usb'al; chi jo'kan toxaataw li chaab'il na'leb'.

²¹ Li winq naxk'uub' li k'aru tixb'aanu, ab'an li Qaawa' yaal re xb'aanunkil.

²² Li nasik'mank re junaq winq, a'an li xtiikilal xch'ool, xb'aan naq jwal us li neb'a' winq chiru laj b'alaq'.

²³ Li roxloq'inkil li Qaawa' nak'ehok yu'am; chi jo'kan sa li hilank ut maak'a' xiwak.

²⁴ Laj q'em naxch'ik li ruq' sa' li sek'; ab'an chi moko li tzekemq naxkuy xk'eeb'al sa' re.

²⁵ Charap chi tz'uum li q'etq'et, ut eek' chik wanq li kach'in xna'leb'. Ab'anan wi seeb' laak'a'uxl, tz'aqal laaq'usb'al re naq taatzol aawib'.

²⁶ Li naxrahob'tesi li xyuwa' ut naraanila li xna', a'an jun li alalb'ej yib'ru xna'leb', ut xutaanal taakanaaq wi'.

²⁷ At walal ink'ajol, wi taakanab' xk'ulb'al laatijb'al, relik chi yaal naq tatnajto'q rik'in li chaab'il na'leb'.

²⁸ Li testiiw aj b'alaq' naxsach xwankil li tiikilal; li ink'a' us xch'ool junes maa'usilal naraj xb'aanunkil.

²⁹ Aajel ru li rapleb' tz'uum cho'q re li q'etq'et, ut li rahob'tesiik cho'q re li maak'a' xna'leb'.