Proverbios 18 - Q'eqchi Bible

¹ Li naxsik' li us cho'q re xjunes rib' naxjek' rib' rik'ineb' li ras riitz'in ut xik' naril li chaab'il na'leb' nak'eemank re.

² Li maak'a' xna'leb' ink'a' naraj tzole'k; ka'ajwi' naraj xk'utb'al li k'aru naxk'oxla.

³ Li maa'usilal naxk'am chaq li tz'eqtaanaak; ut li q'etq'etil, a'an xtiklajik li wank sa' xutaan.

⁴ Li raatin li ani wank xna'leb' a'an chanchan li yu'amha', chanchan li roq nima' ut xyo'leb'aal li chaab'il k'a'uxl.

⁵ Moko us ta naq laj raqol aatin narach'ab' li wank xmaak ut naxteneb' maak sa' xb'een li tiik xch'ool.

⁶ Li maak'a' xna'leb' naxch'ik rib' sa' raaxiik', ut rik'in li raatin naxsik' xlob'.

⁷ Li maak'a' xna'leb' naxsik' xch'a'ajkilal xjunes rib'; rik'in li ru'uj raq' naxra'le rib' xjunes.

⁸ Li tik'ti'ik, a'an chanchan li saa'us: cham naxik, toj sa' xchamal li ch'oolej!

⁹ Laj q'em ut li nasachok chanchan naq xkomoneb' rib'.

¹⁰ Li Qaawa' a'an chanchan li kawub'resinb'il ochoch: rik'in A'an neke'xkol rib' li tiikeb' xch'ool.

¹¹ Sa' xch'ool li b'ihom naq li k'aru wank re a'an chanchan jun tenamit suttz'akanb'il chi us.

¹² Li q'etq'etil, kamk nokoxraqe'q wi'; ab'an li xtiklajik li loq'al, a'an li tuulanil.

¹³ Xutaanal ut xmajelal na'leb' cho'q re li nachaq'ok chi toj maji' naraqe'k li aatinak.

¹⁴ Li xkawilal qach'ool, nokooxwaklesi sa' li yajel; ab'an wi ra li qach'ool, ani taawaklesinq qe?

¹⁵ Eb' li wankeb' xna'leb' ut seeb' xk'a'uxeb' neke'xsik' xtz'aqob' li xna'leb', ut neke'xtaw.

¹⁶ Li sihink naxte chixjunileb' li b'e ut nokooxk'am toj wankeb' wi' li ninqeb' xwankil.

¹⁷ Li na'aatinak xb'enwa chanchan naq maak'a' xmaak; ab'an nawulak laj jitol re ut naxch'olob' li yaal.

¹⁸ Li xraqb'a aatin li Yos naxraq li wech'ij ib', ut naxjek' li kaweb' rib' li yookeb' chi yalok.

¹⁹ Moko ch'a'aj ta xjuk'b'al junaq suttz'ak chiru xk'ojob'ankil xch'ool junaq amiiw li xhob'e'k ut ra xk'ul. Li wech'ij ib' naxram li aatin kama' wi' xnat'b'al rix li okeb'aal.

²⁰ Li junjunq tixk'ul xq'ajkamunkil a' yaal chanru li xyehom ut xb'aanuhom.

²¹ Li kamk ut li yu'am, a'an yaal re li junjunq chanru na'aatinak. Eb' li k'ajo' neke'xye, te'xk'ul li rahilal.

²² Li xtaw rixaqil, xtaw li sahilal; ut xtaw ajwi' li rusilal li Yos.

²³ Li neb'a' natz'aamank ut na'elajink; li b'ihom nasumenk sa' josq'il.

²⁴ Wankeb' amiiw nokoohe'xk'am sa' raaxiik'; ab'an wankeb' li q'axal nokoohe'xra ut jwal paab'ajeleb' chiru junaq asb'ej.