Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Proverbios 17 - Q'eqchi Bible

1 Jwal us li tzekank sa' neb'a'il ut tuqtuukilal chiru li ninq'ehik b'arwi' yo li raaxiik'.

2 Laj k'anjel seeb' xk'a'uxl taakanaaq cho'q aj eechal re li alab'ej maak'a' xna'leb', ut taatz'aqonq chi eechanink sa' xyanqeb' li wankeb' sa' li junkab'al a'an.

3 Li oor ut li plaat sa' xam neke'ch'ajob'resiik; ab'an li qach'ool nayale'k rix xb'aan li Qaawa'.

4 Li ink'a' us xch'ool ut laj tik'ti' neke'xpaab' li neke'xye eb' laj maak.

5 Li naxse'e li neb'a' naxhob' li Yos; li nasaho'k xch'ool rik'in li xrahilal, taaraqmanq aatin sa' xb'een.

6 Li xsahil xch'ooleb' li ak tiixeb' a'aneb' li ri xmameb'; li xloq'al eb' li alal k'ajolb'ej a'aneb' li xna' xyuwa'eb'.

7 Se'leb'aal naq li maak'a' xna'leb' tixnimob'resi rib' chi aatinak chi chaab'il; jo'kan ajwi' li xnimal ru winq ink'a' us wi na'aatinak sa' tik'ti'.

8 Li natuminank u, sa' xch'ool a'an naq us na'elk sa' chixjunil li naxb'aanu.

9 Li naxtz'eq chirix xch'ool li hob'e'k, naxnaw rahok; li ink'a' nakuyuk, naxnajtob'resi li ramiiw.

10 Q'axal us li q'use'k cho'q re li wank xna'leb' chiru naq taajiliiq chi che' li maak'a' xna'leb'.

11 Li q'etq'et junelik naxsik' li raaxiik', ab'an sa' junaq kutan taachalq junaq jwal kaw rib' chi yalok rik'in.

12 Jwal us naq taataw aawib' rik'in junaq josq' aj xul chiru naq toxaataw junaq winq maak'a' xna'leb'.

13 Li naxk'e maa'usilal cho'q reeqaj li usilal ki'uxk re, junelik wanq li rahilal sa' li xjunkab'al.

14 Xyoob'ankil li raaxiik', a'an jo' xteeb'al li tz'akanb'il ha': q'axal us li elk chi junpaat chiru naq taanimanq li xik'il uuchink.

15 Rach'ab'ankil li xmaakob'k ut xteneb'ankil maak sa' xb'een li maak'a' xmaak, ink'a' nawulak chiru li Qaawa'.

16 K'aru taa'ok wi' li tumin sa' ruq' li maak'a' xna'leb'? Li chaab'il na'leb' ink'a' naloq'mank!

17 Li tz'aqal amiiw junelik narahok; sa' xq'ehil junaq rahilal tatxtenq'a jo' junaq tz'aqal asb'ej.

18 Li maak'a' xna'leb' sa' junpaat nak'asok chirix li ramiiw ut naxtoj xk'as chi ink'a' naxk'oxla chi us.

19 Li nawulak chiru li wech'ij ib', naxra li maak; li naxnimob'resi rib' naxsik' xrahilal xjunes rib'.

20 Li ink'a' us xna'leb' maajoq'e tixtaw li sahilal; li ani nawulak chiru tik'ti'ik naxb'oq rahilal sa' xb'een.

21 Li wank ralal maak'a' xna'leb', junelik ra sa' xch'ool; li xyuwa' junaq mem maajoq'e tixtaw sahil ch'oolej.

22 Li sahil ch'oolej a'an chanchan li b'an nak'ehok kawilal; ab'an li rahil ch'oolej na'oksink yajel.

23 Li ink'a' us xna'leb' nak'uluk tumin sa' muqmu, re naq ink'a' taawanq li tiikilal.

24 Li seeb' xk'a'uxl junelik naxsik' xtz'aqob' li xna'leb'; a'ut li maak'a' xna'leb' ink'a' naxnaw b'ar yo chi xik.

25 Li alalb'ej maak'a' xna'leb' a'an xtib'l jolom ut rahil ch'oolej cho'q re li xna' xyuwa'.

26 Moko us ta xteneb'ankil maak sa' xb'een li maak'a' xmaak, chi moko xrahob'tesinkil li chaab'il xch'ool.

27 Li wank xna'leb' moko k'iila aatin ta naxye, ut li seeb' xch'ool ink'a' naxseeb'a rib' chi josq'o'k.

28 Naq ink'a' na'aatinak li maak'a' xna'leb', nayeemank naq wank xna'leb'; ut wi maak'a' naxye, nak'oxlamank naq seeb' xch'ool.

Q'eqchi DC Bible © Bible Society in Guatemala, 2005.

Bible Society in Guatemala
ကြှနျုပျတို့နောကျလိုကျပါ:



ကြော်ငြာတွေ