Proverbios 16 - Q'eqchi Bible

¹ Li winq naxk'uub' li k'aru tixb'aanu, ab'an li Qaawa' yaal re xb'aanunkil.

² Li junjunq naxk'oxla naq us chixjunil li naxb'aanu; ab'an li Qaawa' naxtz'il rix li xchamal li ch'oolej.

³ Kanab' sa' ruq' li Qaawa' laab'aanuhom, ut taa'uxmanq jo' chanru xak'oxla xb'aanunkil.

⁴ Chixjunil li xyoob'tesihom li Qaawa', wank xyaalal. A' ajwi' li ink'a' us xna'leb' yoob'tesinb'il cho'q re li raqb'a aatin.

⁵ Li Qaawa' xik' naril li q'etq'et; ch'olch'o naq a'in tixk'ul li xq'ajkamunkil.

⁶ Wi nakatrahok chi yaal, taakuye'q laamaak; wi nakawoxloq'i li Qaawa', tatnajto'q rik'in li maak.

⁷ Naq li Qaawa' naxk'ul xch'ool li qayu'am, a'eb' ajwi' li xik' neke'ilok qe neke'ok wi' chik sa' amiiwil qik'in.

⁸ Jwal us li wank sa' neb'a'il ut tiikaq qach'ool chiru li b'ihomo'k sa' b'alaq'il.

⁹ Laa'o naqak'uub' li tqab'aanu wulaj kab'ej, ab'an li Yos yaal re b'ar tooxik.

¹⁰ Li awab'ej na'aatinak sa' xk'ab'a' li Yos, ut naraqok aatin sa' tiikilal.

¹¹ Rajom li Yos naq tiikaq laach'ool sa' chixjunil laayakom.

¹² Eb' li awab'ej xik' neke'ril li ink'a' us, xb'aan naq rik'in xb'aanunkil li tiikilal xaqxo li xwankileb'.

¹³ Eb' li awab'ej neke'xra eb' li neke'xye li yaal ut neke'aatinak sa' tiikilal.

¹⁴ Naq li awab'ej najosq'o'k, a'an resilal li kamk. Jo'kan wi wank aana'leb', yal aaq'e xtuulanob'resinkil.

¹⁵ Naq li awab'ej sa sa' xch'ool ut nakatrusila, a'an chanchan wi' hab' sa' saq'ehil, ut laa'at taawanq aayu'am.

¹⁶ Jwal us xtawb'al li chaab'il na'leb' chiru li oor, ut li seeb'al ch'oolej chiru li plaat.

¹⁷ Li tiikeb' xch'ool xik' neke'ril li maa'usilal; neke'xk'e reetal li xb'aanuhomeb' re naq te'xkol rix li xyu'ameb'.

¹⁸ Li naxk'e xwankil xjunes rib', taa'oso'q; li naxq'etq'eti rib', taat'ane'q.

¹⁹ Jwal us naq taakub'si aawib' sa' xyanqeb' li neb'a' chiru li b'ihomal sa' xyanqeb' li neke'xnimob'resi rib'eb'.

²⁰ Li naxnaw xjolominkil li k'aru re, us taawanq; us xaq re li k'ojk'o xch'ool rik'in li Qaawa'.

²¹ Li ani naxnaw k'oxlak, “wank xna'leb'” nayeemank re; li aatinak sa' q'unil nak'ojob'ank ch'oolej.

²² Li k'oxlak chi chaab'il a'an xyo'leb'aal li yu'am; ut li xtzolb'aleb' li maak'a'eb' xna'leb' a'an b'ayok ib'.

²³ Li nak'oxlak chi chaab'il naxk'e reetal li k'aru naxye, ut eb' li raatin nak'ojob'ank ch'oolej.

²⁴ Li q'unil aatin, a'an chanchan xya'al kab': naxsahob'resi li qach'ool ut naxk'e xkawilal li qoq quq'.

²⁵ Wan naq jun li b'e chanchan naq tiik, ab'an sa' xraqik natawmank li kamk.

²⁶ Li wank sa' rajb'al ru, naminok ru laj k'anjel; li tz'okaak naminok ru chi k'anjelak.

²⁷ Li ink'a' us xna'leb' junes maa'usilal naxk'oxla; ut eb' li raatin chanchan li raq'xam.

²⁸ Li ink'a' us xna'leb' nayoob'ank raaxiik'; laj molonel aatin nayoob'ank jachok ib' sa' xyanqeb' li ramiiweb' rib'.

²⁹ Li sa' junpaat najosq'o'k naxb'alaq'iheb' li ras riitz'in, ut naxk'ameb' chi xb'aanunkil li ink'a' us.

³⁰ Li naxmutz' li ru, yo xk'uub'ankil li ink'a' us; ut li naxk'ux li xtz'uumal re, a'an ak xb'aanu li maa'usilal.

³¹ Wi saq rismal laajolom, a'an reetalil laaloq'al li xamaatani sa' xk'ab'a' li xtiikilal laach'ool.

³² Q'axal us naq wanq aakuyum chiru li xkawilal aawib'; ut jwal us xkuyb'al aawib' chiru reechaninkileb' li k'iila tenamit.

³³ Li winq naxb'uuli rix li tixb'aanu, ab'an li Qaawa' yaal re sa' xb'een chixjunil.