Proverbios 15 - Q'eqchi Bible

¹ Li nasumenk rik'in q'unil aatin, naxkotz li josq'il; a'ut li nasumenk sa' josq'il, naxnimob'resi li ch'a'ajkilal.

² Naq na'aatinak li wank xna'leb', naxpuktesi li xnimal xk'a'uxl; a'ut li raatin li ink'a' us xch'ool, a'an yal memil.

³ Li Qaawa' wank yalaq b'ar ut narileb' li chaab'il ut li ink'a' useb' xch'ool.

⁴ Li q'unil aatin, a'an chanchan li che' re li yu'am; a'ut li b'alaq'il aatin narahob'tesink ch'oolej.

⁵ Li maak'a' xna'leb' naxtz'eqtaana li xtijb'al xb'aan li xyuwa'; a'ut li wank xna'leb' naxk'e sa' xch'ool li xq'usb'al.

⁶ Sa' rochoch li tiik xch'ool k'ajo' li chaab'il eechej; a'ut li ink'a' us xna'leb' maak'a' aj e li k'aru nareechani.

⁷ Naq na'aatinak li wank xna'leb', naxpuktesi li xnawom; a'ut li maak'a'eb' xna'leb' moko jo'kan ta neke'xb'aanu.

⁸ Li Qaawa' xik' naril li xmayejeb' li ink'a' useb' xch'ool; ab'an naxk'ul chi anchal xch'ool li xtijeb' li chaab'ileb' xyu'am.

⁹ Li Qaawa' ink'a' naxk'ul ru li xyu'ameb' laj maak, ab'anan naxra li chaab'ileb' xyu'am.

¹⁰ Li naxkanab' li chaab'il b'e taak'ajtesiiq ru; li naxtz'eqtaana li xq'usb'al, tixtaw li kamk.

¹¹ Wi li Qaawa' naxnaw k'aru wank sa' li xna'ajeb' li kamenaq, ma toja' ta chik sa' li qak'a'uxl?

¹² Li q'etq'et ink'a' naxra li naq'usuk re, chi moko nawulak chiru wank rik'ineb' li chaab'ileb' xna'leb'.

¹³ Li sahil ch'oolej ut li rahil ch'oolej nak'utunk chi xnaq' uhej.

¹⁴ Li seeb' xk'a'uxl naxsik' li chaab'il na'leb'; a'ut li jip junes memil na'leb' naxsik'.

¹⁵ Li ra sa' xch'ool chixjunil li kutan ink'a' us cho'q re; a'ut cho'q re li sa sa' xch'ool, chanchan junelik ninq'e.

¹⁶ Jwal us li wank sa' neb'a'il ut roxloq'inkil li Qaawa' chiru li wank sa' b'ihomal ut ch'a'ajkilal.

¹⁷ Q'axal us li tiwok ichaj rik'in sahil ch'oolej chiru xtzekankil xtib'el wakax rik'in xik'il uuchink.

¹⁸ Li ani ch'inpo' nayoob'ank ch'a'ajkilal; a'ut li wank xkuyum naxch'anab' li raaxiik'.

¹⁹ Li yu'amej cho'q re laj q'em, a'an chanchan k'ix ru; ut cho'q re li tiik xch'ool, a'an chanchan li nimb'e.

²⁰ Li alalb'ej li wank xna'leb' naxk'e xsahil xch'ool li xna' xyuwa'; a'ut li kaw xjolom naxtz'eqtaanaheb'.

²¹ Li maak'a' xna'leb' nasaho'k xch'ool rik'in li xmemil; a'ut li tiik xch'ool nawank sa' tiikilal.

²² Maajun k'anjel nach'olaak naq maak'a' k'uub'ank. Us na'elk li k'aru k'uub'k'u xb'aan naab'aleb' aj k'ehol na'leb'.

²³ K'ajo' sahilal naq na'uxk aatinak sa' q'unil aatin; ut jwal us wi' chik wi na'uxk sa' xhonalil.

²⁴ Li xb'ehil li yu'am taqe'q naxik, ut naxkol li tiik xch'ool chiru li kamk.

²⁵ Li Qaawa' naxjuk' li xjunkab'al li q'etq'et, ab'an naxk'aak'ale li xch'och' li xmalka'an.

²⁶ Li Qaawa' xik' naril li xk'uub'ahom li ink'a' us xch'ool, ab'an nawulak chiru li q'unil aatin.

²⁷ Li narataw b'ihomo'k naxsach li xjunkab'lal; ab'an li ink'a' naraj tuminaak ru najtaq roq li xyu'am.

²⁸ Li tiik xch'ool toj naxk'oxla rix li aatin naxye; a'ut li ink'a' us xna'leb' k'ajo' li yib' aj aatin naxye.

²⁹ Li Qaawa' najt wank rik'ineb' li ink'a' useb' xna'leb'; ab'an naxk'ulub'a li xtijeb' li tiikeb' xch'ool.

³⁰ Li se'se' na'ilok naxk'e sahil ch'oolej, ut li chaab'il esilal nak'ehok kawil ch'oolej.

³¹ Li naxpaab' li q'use'k chirix li yu'am taawanq xna'aj sa' xyanqeb' li wankeb' xna'leb'.

³² Li ink'a' naraj q'use'k, ink'a' naxra rib'; a'ut li naxk'e sa' xch'ool li xq'usb'al, naxtaw xna'leb'.

³³ Roxloq'inkil li Qaawa' nak'ehok chaab'il na'leb'. Ani taaraj taak'ehe'q xloq'al, tkub'si xb'enwa li xwankil.