Proverbios 14 - Q'eqchi Bible

¹ Li ixq seeb' xk'a'uxl naxch'oolani li xjunkab'al; li maak'a' xna'leb', a'an ajwi' najuk'uk re li xjunkab'al.

² Li tiik ru xyu'am naroxloq'i li Qaawa'; li ink'a' tiik xch'ool naxtz'eqtaana li Qaawa'.

³ Li maak'a' xna'leb' na'aatinak sa' q'etq'etil; li wank xna'leb' eek'anb'il na'aatinak.

⁴ Naq ink'a' nach'oolaniik li ch'och', li awimq ink'a' na'uuchink; ab'an wi nach'oolaniik chi chaab'il, k'ajo' naq taa'uuchinq.

⁵ Li tz'aqal testiiw naxye li yaal, ut laj b'alaq', tik'ti' naxye.

⁶ Li q'etq'et naxsik' li chaab'il na'leb', ut ink'a' naxtaw; ab'an cho'q re li seeb' xk'a'uxl, moko ch'a'aj ta xtawb'al.

⁷ Elen chiru li maak'a' xna'leb', xb'aan naq maak'a' taataw rik'in.

⁸ Li seeb' xch'ool naxnaw xb'eresinkil li xyu'am xb'aan naq wank xna'leb'; a'ut li maak'a' xna'leb' naxb'alaq'i rib' xjunes.

⁹ Eb' li maak'a' xna'leb' neke'xse'e li xmaakeb'; a'ut li chaab'ileb' xch'ool neke'xsik' li rusilal li Yos.

¹⁰ Li junjunq naxnaw li xrahilal xch'ool; ut maa'ani taatz'aqonq rik'in xsahil xch'ool.

¹¹ Li xjunkab'al li ink'a' us xna'leb' taajuk'manq; a'ut li xjunkab'al li chaab'il xch'ool taak'ihanq.

¹² Wankeb' b'e li tiikeb' neke'k'utunk sa' xtiklajik, ab'an a' li kamk neke'raqe'k wi'.

¹³ Wan naq sa' li se'ek namuqmank li rahil ch'oolej; ut li sahil ch'oolej, yaab'ak nokoxraqe'q wi'.

¹⁴ Li maak'a' xna'leb' sa sa' xch'ool rik'in li maa'usilal naxb'aanu; li chaab'il xch'ool nasaho'k rik'in li xchaab'il k'anjel.

¹⁵ Li ink'a' nak'oxlak naxpaab' chixjunil li nayehe'k re; li wank xna'leb' naxk'e reetal b'ar yo chi xik.

¹⁶ Li wank xna'leb' nak'oxlak ut naxkol rib' chiru li ink'a' us; a'ut li maak'a' xna'leb' ink'a' naxiwak ut maak'a' naraj re.

¹⁷ Li sa' junpaat najosq'o'k ink'a' naxk'oxla li naxb'aanu; ut li naxnaw k'oxlak, wank xkuyum.

¹⁸ Li maak'a'eb' xna'leb' te'reechani li memil; seeb'aq aak'a'uxl ut tzol aawib'.

¹⁹ Eb' li ink'a' useb' xna'leb' te'xkub'si rib' chiruheb' li tiikeb' xch'ool; ut eb' laj b'aanuhom maa'usilal te'elajinq chiruheb' li chaab'ileb'.

²⁰ Li neb'a' maajun napatz'ok re; li b'ihom k'ajo'eb' li ramiiw.

²¹ Xtz'eqtaanankil li amiiw, a'an maak; ab'an li Yos narosob'tesi li naruxtaana ru li neb'a'.

²² Li junes maa'usilal neke'xk'uub', xjuneseb' rib' te'sachq; eb' li neke'b'aanunk li usilal, raab'ileb' ut oxloq'inb'ileb'.

²³ Us na'elk li ani naxk'e xch'ool chi k'anjelak; a'ut li junes aatinak naxb'aanu, wank sa' neb'a'il.

²⁴ Li xkoroon li wank xna'leb', a'an li xchaab'il na'leb'; li xq'ajkamunkil li maak'a'eb' xna'leb', a'an li memil.

²⁵ Li chaab'il testiiw naab'aleb' tixkol chiru li kamk; a'ut laj b'alaq' naab'al naxk'eheb' chi kamk.

²⁶ Li naroxloq'i li Qaawa', k'ojk'o li xch'ool chi junelik, ut eb' li ralal xk'ajol xaqxo li royb'enihomeb'.

²⁷ Li naroxloq'i li Qaawa' naxtaw xyu'am chi junelik ut nakole'k chiru li xra'al li kamk.

²⁸ Li awab'ej li nataqlank sa' xb'eeneb' k'iila tenamit nak'ehe'k xloq'al; a'ut xutaanal cho'q re, wi yal jun ch'ina ch'uut nataqlank wi'.

²⁹ Li wank xna'leb' ink'a' najosq'o'k sa' junpaat; li maak'a' xkuyum naxk'ut li xmemil.

³⁰ Wi tuqtu laach'ool, kawaq ajwi' laawoq aawuq'; ab'an wi nakatkaqalik, taasachq laayu'am chi junwaakaj.

³¹ Li natawasink li neb'a', naxmajewa laj Yoob'tesihom re; a'ut li na'uxtaanank ru, naxk'e xloq'al li Qaawa'.

³² Li ink'a' us xna'leb', a' ajwi' li xmaa'usilal nasachok re; a'ut li tiik xch'ool nakole'k xb'aan li xtiikilal.

³³ Li chaab'il na'leb' nawank rik'ineb' li neke'xnaw k'oxlak; a'ut maajoq'e taatawmanq sa' xyanqeb' li jip.

³⁴ Junaq tenamit li wank sa' tiikilal wank xloq'al, ut li maak a'an li xxutaan.

³⁵ Li awab'ej nasaho'k xch'ool rik'in laj k'anjel seeb' xk'a'uxl; ab'an najosq'o'k rik'in li maak'a' na'ok wi'.