Oseas 9 - Q'eqchi Bible

Li rahilal te'xk'ul eb' laj Israel

¹ Misaho'k aach'ool, a Israel; matpisk'ok xb'aan xsahilal aawaanm jo'eb' li tenamit junch'ol, xb'aan naq xab'alaq'i laaYos ut q'axal chik xarahi ru li xtuminal li maakob'k sa'atqeb' li na'ajej na'isiik wi' li rix li triiw.

² Ab'anan ink'a' chik taawanq laatriiw ut laa'uub', ut maak'a'aq chik li ak' b'iin li taawuk' raj.

³ Eb' laj Efraín te'sutq'iiq wi' chik Ejiipt ut aran Asiria te'xtzeka li k'aru ink'a' us xtzekankil. Ink'a' chik te'wanq sa' li xch'och' li Qaawa'.

⁴ Ink'a' te'mayejaq b'iin chiru li Qaawa', chi moko li xmayejeb' taawulaq chiru: rahaq chik xch'ooleb' naq te'tzekanq jo' tawi' naq yooqeb' chi k'aak'alenk kamenaq, ut muxb'ileb' ru te'kanaaq eb' li te'tzekanq re. Li wa a'an ka'ajwi' re te'xtzeka eb' a'an, ut ink'a' naru taak'ame'q sa' rochoch li Yos.

⁵ K'aru teeyeechi'i laa'ex sa' li ninq'e, naq taawulaq xq'ehil xloq'oninkil ru li Qaawa'?

⁶ Ilomaq: eb' li tenamit xe'elelik xb'aan li rahilal; eb' laj Ejiipt te'k'uluq reheb' ut aran Menfis te'muqlaaq. K'aamla taamuquq re li xb'ihomaleb' ut junes pajl te'yo'laaq sa' li xmuheb'aaleb'.

⁷ Ak xwulak xkutankil li raaxiik'; xwulak chik xq'ehil li xtojb'al rix leemaak! Eb' laj Israel tento te'xnaw a'an. Laa'ex nekeye: “Maak'a' xna'leb' li propeet. Li xtaql li Yos xkaano'k ru”, chankex. Ab'an nekeye chi jo'kan, xb'aan naq numtajenaq leemaa'usilal ut q'axal xik' nikineril.

⁸ Taqlanb'ilin chaq xb'aan li Yos li xinxaqab' cho'q propeet re rilb'aleb' laj Efraín. A'ut laa'ex yalaq b'ar nekeraj inra'lenkil, ut sa' ajwi' li rochoch linYos xik' nikineril.

⁹ Q'axal xnumtaak leemaa'usilal, jo' keb'aanu chaq aran Kibehá. A'ut li Qaawa' junelik wank sa' xch'ool leemaa'usilal, ut texk'e chi xtojb'al rix leemaak.

Eb' laj Israel te'xtoj rix li xmaakeb'

¹⁰ Jo'ka'in xye li Qaawa': “Naq kintaw laj Israel, kisaho'k linch'ool jo' naq natawmank li uub' sa' li chaqich'och'. Kisaho'k linch'ool rik'ineb' leena' leeyuwa' jo' naq natawmank li xb'een ru li ki'il q'een. Ab'an naq ke'wulak aran Bahal-Pehor, ke'xq'axtesi rib' reheb' li yal k'oxlanb'il yos, ut q'axal tz'eqtaananb'ileb' chik ke'kanaak jo'eb' li pek che' raarookeb' xb'aaneb'.

¹¹ Li xloq'aleb' laj Efraín taa'oso'q jo' naq naxik'ank junaq xul chiru choxa: ink'a' chik te'wanq ralal xk'ajoleb', maajun chik ixq taakanaaq sa' yu'am ut ink'a' chik taasiyaaq junaq k'uula'al.

¹² Us ta toxe'xk'iiresi junaq ralal xk'ajol, laa'in tinmaq'oq re chiruheb'. Ra chaalel sa' xb'eeneb' li poyanam a'an naq teb'inkanab' laa'in!

¹³ Nink'e reetal naq eb' li ralal xk'ajol laj Efraín chanchaneb' wi' li xtzak eb' li neke'yohok: teneb'anb'il kamk sa' xb'eeneb'”.

¹⁴ At Qaawa', chak'e reheb' jo' li xk'ulub'eb'. K'e reheb' li ixq naq ink'a' chik te'wanq xkok'aleb' ut chichaqiq li xtu'eb'.

¹⁵ Jo'ka'in ajwi' xye li Qaawa': “Chixjunil li xmaa'usilaleb' kik'utunk aran Kilkal; aran ajwi' kintikib' xxik'b'al rilb'aleb'. Xb'aan li xyib'al ru xb'aanuhomeb' te'wisiheb' sa' linmuheb'aal ut ink'a' chik tinraheb', xb'aan naq jwal q'etq'eteb' chixjunil laj k'amol xb'eheb'.

¹⁶ Kamk re laj Efraín, chanchan aj chik li chaqiche' li ink'a' chik na'uuchink. Us ta te'wanq ralal xk'ajoleb', laa'in tink'e chi kamk li xmaataneb'”.

¹⁷ Li tenamit a'in ink'a' xe'paab'ank chiru li Qaawa'; jo'kan naq te'tz'eqtaanaaq xb'aan linYos ut yal te'xb'eeni aj chik rib' sa'atqeb' li jalanil tenamit.