Oseas 3 - Q'eqchi Bible

Laj Oseas ut li ixq aj yumb'eet

¹ Li Qaawa' kixye wi' chik we: “Ayu wi' chik ut chara jun li ixq aj muxul sumlaak, jalan chik winq naxra. Jo'ka'in naq li Qaawa' naxraheb' laj Israel, us ta eb' a'in neke'xik chirixeb' li jalanil yos ut neke'xtzeka li k'uluj yiib'anb'il rik'in chaqi uub', li mayejanb'il chiruheb' li xyoseb'”.

² Toja' naq laa'in kinloq' jun li ixq chiru o'laju chi tumin plaat ut rik'in waqib' aroow chi seb'aad.

³ Ut kinye re: “Tatwanq sa' li wochoch chiru k'iila kutan ut ink'a' chik tatyumb'eetaq: maajun chik li winq taak'ul aawik'in ut laa'in ajwi' ink'a' tinwanq aawik'in”.

⁴ Jo'ka'in te'xk'ul eb' laj Israel: chiru k'iila kutan te'wanq chi maak'a' x'awab'ejeb' chi moko junaq aj k'amol xb'eheb'; ink'a' chik te'mayejaq chi moko te'wanq xpekeb' li te'xk'e xloq'al; maak'a'aq chik aq'ej cho'q reheb' laj tij chi moko te'wanq yiib'anb'il yos sa' li xjunkab'aleb'.

⁵ Ab'anan taawulaq xq'ehil naq eb' laj Israel te'sutq'iiq chaq. Tole'xsik' li Qaawa', li xYoseb', jo' ajwi' laj David, li x'awab'ejeb'. Sa' roso'jikeb' li kutan te'chalq chi siksootqeb' chiru li Qaawa' ut te'xyal wi' chik li rusilal.