Oseas 10 - Q'eqchi Bible

Te'juk'manq eb' li jalanil yos

¹ Li tenamit Israel chanchan jun toon chi uub' li naab'al naruuchin. Ab'an naq naab'al naruuchin, naxtamresi ajwi' li x'artal; ut naq q'axal chaab'il li xch'och', naab'al ajwi' li chaab'il pek naxyiib' cho'q jalam u.

² Jachjo li xch'ooleb', ut anaqwan te'xtoj rix li xmaakeb'. Li Qaawa' tixjuk'i eb' li artal ut tixputz'i eb' li jalanil yos.

³ “Maak'a' qa'awab'ej -cha'qeb'- xb'aan naq ink'a' xqoxloq'i ru li Qaawa'. Ab'an k'a' tawi' ru tixb'aanu qe junaq awab'ej?”.

⁴ Yal junes aatin li neke'xye, b'alaq'il jurament neke'xb'aanu ut maak'a' aj e naq neke'xk'e rib' sa' aatin. Li raqok aatin neke'xb'aanu chanchan li kaqipim nak'iik sa' li awimq.

⁵ Eb' laj Samaria neke'siksotk ut neke'yaab'ak xb'aan naq xsache'k li wakax oor re Bet-Abén. Neke'huyhutk chi yaab'ak eb' li tenamit rochb'eeneb' laj tij, xb'aan naq xsache'k xloq'al li xyoseb'.

⁶ Li wakax oor taak'ame'q ajwi' aran Asiria, jo' xsimaatan li xnimal ru awab'ej. Chi jo'kan eb' laj Efraín te'kaqo'q xb'aaneb' xxutaan ut eb' laj Israel te'xutaanaq chi rilb'al li xyoseb'.

⁷ Xsache'k ru Samaria, ut li x'awab'ejeb' chanchan li xwoqx li xab'on sa' xb'een li ha'.

⁸ Te'sachmanq eb' li tijob'aal wankeb' chi tzuul b'arwi' neke'maakob'k eb' laj Israel; k'im ut k'ix taak'iiq sa' xb'eeneb' li artal. Toja' naq te'xye reheb' li tzuul: “Chooheemuq”; ut reheb' li b'ool: “Chex'uq'e'q sa' qab'een”, cha'qeb'.

Eb' laj Israel te'xq'ol li k'aru xe'raw

⁹ “Chalen chaq Kibehá yookeb' chi maakob'k eb' laj Israel; tik ink'a' neke'xkanab' xb'aanunkil. Jo'kan naq eb' a maa'us aj winq a'in te'oso'q aran Kibehá.

¹⁰ Tolinraqoq aatin sa' xb'eeneb'; ut eb' li tenamit te'xjunaji rib' chi yalok rik'ineb', re xk'ajtesinkil ruheb' sa' xk'ab'a' li maa'usilal xe'xb'aanu”, chan li Qaawa'.

¹¹ “Laj Efraín chanchan li ral wakax li nawulak chiru k'anjelak re xke'b'al rix li triiw. Ut anaqwan tinb'ak' li b'itche' chirix li xkux ut tink'e chi k'anjelak chi kaw; eb' laj Judá te'xpikle li ch'och' ut eb' laj Jakob te'xk'aji li ch'och'.

¹² Inyehom eere: «Wi teeraw li tiikilal, teeq'ol li chaab'ilal usilal. Chapomaq li ch'och' re li awk ut k'alenqex. Ak xq'ehil anaqwan xsik'b'al li Qaawa', re naq A'an taachalq eerik'in chekolb'al jo' naq nachalk li loq'laj hab'».

¹³ A'ut laa'ex xek'anjela ru li maa'usilal, jo'kan naq xeq'ol li raaxiik' ut li ru li tik'ti' yookex chi xtzekankil. “Ex aj Israel, xekawub'resi leech'ool naq wankeb' chaq leeb'eleb'aal ch'iich' ut k'ajo' xk'ihaleb' laj puub' xe'wank eerik'in.

¹⁴ Jo'kan naq taawanq li mululij ib' sa' leetenamit ut te'juk'e'q chixjunileb' leekawub'resinb'il ochoch. Teek'ul li kik'ulmank aran Bet-Arbel naq laj Salmán kixsach li tenamit a'an sa' xkutankil li yalok, naq eb' li na'b'ej ke'pik'aje'k chiru ch'och' rochb'eeneb' li xkok'aleb'.

¹⁵ A'an ajwi' teek'ul laa'ex li wankex Betel xb'aan leek'iila maa'usilal. Li awab'ej re Israel taakamq sa' xtiklajik li kutan”.