Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Oseas 1 - Q'eqchi Bible

1 A'an a'in li aatin kixye li Qaawa' re laj Oseas, ralal laj Beherí, naq laj Osías, laj Jotán, laj Ajás ut laj Esekías ke'awab'ejink sa' xb'eeneb' laj Judá, ut laj Jerobohán, ralal laj Johás, kiwank cho'q awab'ej re Israel.


Li rixaqil laj Oseas ut eb' li ralal xk'ajol

2 Jo'ka'in naq kixtikib' aatinak li Qaawa' chi xtz'uumal re laj Oseas. Li Qaawa' kixye re laj Oseas: “Ayu ut sumlan rik'in junaq ixq aj yumb'eet, ut chiwanq leeralal eek'ajol, xb'aan naq li tenamit xe'po'k xna'leb' chi junajwa, ut tik xe'najto'k wik'in, jo'keb' laj yumb'eet”.

3 Toja' naq koho laj Oseas ut kixk'am lix Gómer, xrab'in laj Dibláhin. Li ixq kikanaak sa' yu'am ut kiyo'laak jun xk'uula'al.

4 Ut li Qaawa' kixye re laj Oseas: “K'e cho'q xk'ab'a' «Jisrehel», xb'aan naq chi seeb' tink'eheb' laj Jehú chi xtojb'al li xmaakeb' chirix li kamsink ki'uxmank aran Jisrehel. Twaj naq taa'oso'q li x'awab'ejihom laj Israel.

5 Chiru li kutan a'an tinsach li xwankilaleb' laj puub' aj Israel sa' xtaq'ahil Jisrehel”.

6 Lix Gómer kikanaak wi' chik sa' yu'am ut kiyo'laak jun xch'ina ixqa'al. Ut li Qaawa' kixye re laj Oseas: “«Ink'a' uxtaananb'il ru» taak'e cho'q xk'ab'a', xb'aan naq ink'a' chik twuxtaana ru eb' laj Israel, ut xeb'intz'eq chirix inch'ool.

7 Ab'anan twil xtoq'ob'aal ru eb' laj Judá ut tinkoleb': maawa' rik'in simaj malaj q'esnal ch'iich', rik'in yalok malaj kawaay, chi moko rik'ineb' li neke'xik chirixeb' kawaay, sa' ink'ab'a' b'an laa'in li Qaawa', li xYoseb'”.

8 Naq ak xmaq'e'k xtu' li «Ink'a' uxtaananb'il ru», lix Gómer kiwank jun chik xk'uula'al teelom.

9 Toja' naq li Qaawa' kixye re laj Oseas: “K'e cho'q xk'ab'a' «Maawa' intenamit», xb'aan naq maawa'ex chik lintenamit, chi moko laa'in chik leeYos”.


Rak'ob'resinkil wi' chik li tenamit Israel

10 Sa' jun kutan eb' laj Israel te'k'ihanq ut li xk'ihaleb' kama'aq li samahib' chire li palaw; maajun taaruhanq chi b'isok re chi moko rajlankil. Ut ink'a' chik taayeemanq reheb': “Maawa'ex lintenamit”, li Yos b'an tixye reheb': “Laa'ex ralal li yo'yookil Yos”.

11 Toja' naq eb' laj Judá ut eb' laj Israel te'xjunaji rib'eb', te'xxaqab' jun ajwi' aj jolominel reheb' ut yalaq b'ar te'sutq'iiq chaq Jerusalén. Relik chi yaal naq q'axal nimaq li xkutankil Jisrehel!

Q'eqchi DC Bible © Bible Society in Guatemala, 2005.

Bible Society in Guatemala
ကြှနျုပျတို့နောကျလိုကျပါ:



ကြော်ငြာတွေ