Números 35 - Q'eqchi Bible

Eb' li tenamit li ke'k'ehe'k reheb' laj Leví

¹ Li Qaawa' kiraatina laj Moisés sa' xtaq'ahil Mohab, chire li nima' Jordán, sa' xjayal Jerikó, ut kixye re:

² “Ye reheb' laj Israel naq sa' li na'ajej ak xk'ulumeb', te'xk'e xtenamiteb' laj Leví b'arwi' naru te'wanq; te'xk'e ajwi' li wa'lem cho'q reheb' li xketomq, chi xsutam li xtenamiteb'. Laa'ex texk'ehoq xna'ajeb' laj Leví.

³ Eb' li tenamit a'an a'anaq li xmuheb'aaleb', ut li wa'lem rehaqeb' chixjunil li xketomqeb'.

⁴ Li xb'isb'al li wa'lem teek'e reheb' laj Leví chi xsutam li xtenamiteb', a'an wuqlaju xkaalajuk'aal (277) moqoj chi xsutam li tenamit, chalen sa' xtoon li xsuttz'akil.

⁵ Chi junq rix li tenamit teeb'is o'laju xwaqxaqk'aal xkab' o'q'ob' (555) moqoj sa' xjunqpak'alil sa' xkaaxukuutil: ut li tenamit taakanaaq sa' xyi. A'anaq a'in li xwa'lemil li tenamit.

⁶ “Sa' xyanqeb' li tenamit teek'e reheb' laj Leví, waqib' te'xaqab'aaq re naq aran toxe'xmuq rib' li xe'kamsink ras riitz'in. Ut teek'e ajwi' wiib' roxk'aal (42) chik li tenamit reheb'.

⁷ Li xk'ihaleb' li tenamit teek'e reheb' laj Leví, a'an waqxaqib' roxk'aal (48); chixjunileb' wanqeb' xwa'lemil.

⁸ Eb' li tenamit a'in li te'xk'e eb' laj Israel cho'q reheb' laj Leví, te'xk'e jo' chanru xk'ihal kitz'aqk li junq teep: li yo'oon kitz'aqk, yo'oon tixk'e; li kach'in kitz'aqk, kach'in ajwi' tixk'e”, chan li Yos.

Eb' li tenamit li taaruuq te'xkol wi' rib' eb' laj Israel

⁹ Li Qaawa' kiraatina wi' chik laj Moisés ut kixye re:

¹⁰ “Ye reheb' laj Israel: Naq texq'axonq junpak'al li nima' Jordán re xik sa' li na'ajej Kanahán,

¹¹ teesik' ruheb' li tenamit li tixkol wi' rib' yalaq ani xkamsink junaq ras riitz'in chi ink'a' rajom xch'ool.

¹² Sa'eb' li tenamit a'an naru teekol eerib' chiru laj eeqajunel kik', xb'aan naq laj kamsinel ink'a' naru taakamsiiq, wi toj maji' naraqmank aatin sa' xb'een xb'aaneb' li komonil.

¹³ Sa' xyanqeb' li tenamit taak'eemanq reheb' laj Leví, waqib' te'kanaaq re naq te'xkol rib' eb' laj Israel:

¹⁴ oxib' li tenamit te'kanaaq junpak'al li nima' Jordán ut li oxib' chik te'wanq aran Kanahán.

¹⁵ Sa'eb' li waqib' chi tenamit a'an naru te'xkol rib' eb' laj Israel, jo'wi' eb' laj ab'l tenamit ut li yal aj numeleb' sa' eeyanq, re naq aran tixmuq rib' yalaq ani xkamsink junaq ras riitz'in chi ink'a' rajom xch'ool.

¹⁶ “Ab'anan wi junaq naxtiq' rik'in ch'iich' junaq chik ras riitz'in ut a'in taakamq, li xtiq'ok a'an aj kamsinel, ut tento taakamsiiq.

¹⁷ “Wi junaq naxtiq' li ras riitz'in rik'in pek re xkamsinkil ut a'an taakamq, li xtiq'ok a'an aj kamsinel, ut tento taakamsiiq.

¹⁸ “Wi junaq naxtiq' li ras riitz'in rik'in che' re xkamsinkil ut a'an taakamq, li xtiq'ok a'an aj kamsinel, ut tento taakamsiiq.

¹⁹ A' ajwi' laj eeqajunel kik' taakamsinq re li xkamsink, naq toxtaw.

²⁰ “Wi junaq xik' naril li ras riitz'in ut tixkamsi, malaj tixkut k'a'aq re ru chirix xb'aan xlab'al xch'ool, ut a'an taakamq,

²¹ malaj xik' naril ut tixteni chi ruq' toj taakamq, li xtiq'ok re tento taakamq, xb'aan naq a'an aj kamsinel. Ut li rech'alal li kamenaq tento tixkamsi naq tixtaw.

²² “Ab'an wi xtiiki chi ink'a' rajom xch'ool ut chi ink'a' xik' naril, malaj xkut chi k'a'aq re ru chi maak'a' xlab'al xch'ool,

²³ malaj ink'a' xril li ras riitz'in naq xkut chi pek (ink'a' xik' naril chi moko yal xsik' xrahob'tesinkil naq xkamsi),

²⁴ toja' naq li komonil taa'aatinaq chirix laj kamsinel ut li rech'alal li kamenaq, jo' naxye li chaq'rab' chirix li rahilal a'in,

²⁵ ut li komonil tento tixkol xyu'am laj kamsinel ras riitz'in chiru laj eeqajunel kik'. Tento ajwi' tixtaqla wi' chik sa' li tenamit xmuq wi' rib'. Ut aran taakanaaq li xkamsi ras riitz'in toj reetal taakamq li xyuwa'il laj tij li yulb'il rik'in loq'laj oleo.

²⁶ Ab'anan wi li xkamsi ras riitz'in taa'elq sa' li tenamit xmuq wi' rib'

²⁷ ut taatawe'q xb'aan li rech'alal li kamenaqilq, laj eeqajunel kik' naru tixkamsi laj kamsinel chi maak'a'aq maak sa' xb'een,

²⁸ xb'aan naq laj kamsinel tento raj wanq sa' li tenamit xmuq wi' rib' toj reetal sa' xkamik li xyuwa'il laj tij. Sa' xkamik li xyuwa'il laj tij laj kamsinel naru taasutq'iiq sa' li rochoch.

²⁹ “A'in leechaq'rab'inkil laa'ex ut xchaq'rab'inkileb' leeralal eek'ajol, a' yaal b'ar wanqex.

³⁰ “Naq xkamsiik junaq poyanam, naru xkamsinkil laj kamsinel rik'in raatineb' li xe'ilok re. Ab'an rik'in raatin li jun ajwi', maajun naru taateneb'aaq kamk sa' xb'een.

³¹ “Ink'a' naru teek'ulub'a tuminaak re xkolb'al rix junaq li xkamsi ras riitz'in, xb'aan naq a'an tento taakamq.

³² “Chi moko teek'ulub'a tuminaak re xkolb'al rix li xo'xmuq rib' sa' junaq tenamit xaqab'anb'il re muqlenk ib'. Ink'a' naru taasutq'iiq sa' rochoch wi toj maji' nakamk li xyuwa'il laj tij.

³³ “Meemux ru li ch'och' b'arwi' wankex. Li kamsink naxmux ru li ch'och'; ut naq xkamsiik junaq eeras eeriitz'in, ink'a' naru xtojb'al rix li maak: ka'ajwi' naq taakamsiiq li ani xkamsink.

³⁴ “Meemux ru li ch'och' wankex wi' ut b'arwi' wankin ajwi' laa'in, xb'aan naq laa'in li Qaawa' ninhilank sa' xyanqeb' laj Israel”.