Números 23 - Q'eqchi Bible

Li xb'een raatin laj Balaham

¹ Toja' naq laj Balaham kixye re laj Balak: “Yiib' wuqub' chi artal arin ut kawresi chaq wuqub' saaj wakax ut wuqub'eb' li karneer”, chan.

² Laj Balak kixb'aanu li kiyehe'k re xb'aan laj Balaham, ut kixmayeja jun saaj wakax ut jun karneer sa' li junjunq chi artal.

³ Chirix chik a'an laj Balaham kixye re laj Balak: “Kanaaqat chi xk'atqeb' laamayej. Xik we chi rilb'al ma taachalq li Qaawa' chi aatinak wik'in; ut li k'aru tixk'ut chiwu tulinye aawe”, chan. Koho laj Balaham sa' xb'een jun li joxk' tzuul

⁴ ut aran li Qaawa' ki'elk chaq chi xk'ulb'al laj Balaham, ut a'in kixye re: “Xink'uub' wuqub' chi artal ut xinmayeja junjunq saaj wakax ut junjunq karneer sa' li junjunq chi artal”, chan.

⁵ Toja' naq li Qaawa' kixye li esil a'in re laj Balaham: “Sutq'in wan wi' laj Balak ut taaye li aatin xinnumsi chawu”, chan re.

⁶ Ut laj Balaham kisutq'iik wan wi' laj Balak, li toj xaqxo ajwi' chi xk'atq li xk'atb'il mayej, rochb'een chixjunileb' li xjolomileb' laj Mohab.

⁷ Toja' naq laj Balaham kixye eb' li uutz'u'ujinb'il aatin a'in: “Chalen chaq sa' releb'l saq'e, aran Aram, xinxb'oq chaq laj Balak, awab'ej re Mohab. «Kim -chan we- majewa laj Jakob. Kim, tz'aama rahilal sa' xb'een laj Israel».

⁸ Ab'an chanru tinmajewa li ink'a' majewanb'il xb'aan li Qaawa'? Chanru tintz'aamanq rahilal, wi li Qaawa' ink'a' naxb'aanu?

⁹ Toj sa' xb'een li saqoonak neke'wil, toj sa' xb'eeneb' li b'ool nink'e reetal: a'an jun tenamit li wankeb' xjunes; ink'a' k'eeb'ileb' sa' ajl sa' xyanqeb' li poyanam.

¹⁰ Ani taaruhanq xb'isb'al xpojtz'il laj Jakob, ut ani taaruhanq rajlankil li xk'ihaleb' laj Israel? Kamqin laa'in jo' naq neke'kamk li tiikeb' xch'ool, ut oso'qin jo' taxaq naq neke'oso'k eb' a'an”, chan.

¹¹ Toja' naq laj Balak kixye re laj Balaham: “K'aru xab'aanu we? Xatink'am chaq arin re xmajewankil eb' li xik' neke'ilok we; ab'an rosob'tesinkileb' chik xab'aanu!”, chan.

¹² Kichaq'ok laj Balaham ut kixye: “Ma ink'a' tab'i' tento tinye laa'in li aatin xk'e chi xtz'uumal we li Qaawa'?”, chan.

Li xkab' raatin laj Balaham

¹³ Ab'an laj Balak kixye: “Kim sa' jalan chik na'ajej wochb'een, re taawileb' chaq laj Israel toj aran. Yal kach'in ajwi' taawileb', ink'a' chixjunileb'. Majewaheb' chaq toj aran”, chan.

¹⁴ Ut kixk'am laj Balaham sa' li na'ajej Sofim, sa' xb'een li tzuul Piská. Aran kixyiib' wuqub' chi artal, ut kixmayeja jun li saaj wakax ut jun li karneer sa' li junjunq chi artal.

¹⁵ Aran laj Balaham kixye re laj Balak: “Kanaaqat chi xk'atq laamayej, royb'eninkil naq xik chaq we chi aatinak rik'in li Qaawa'”, chan.

¹⁶ Li Qaawa' ki'elk chi xk'ulb'al laj Balaham, kixk'e li raatin sa' xtz'uumal re ut kixye: “Sutq'in wan wi' laj Balak ut taaye li aatin xinnumsi chawu”, chan.

¹⁷ Laj Balaham kisutq'iik wan wi' laj Balak li toj xaqxo ajwi' chi xk'atq li xk'atb'il mayej, rochb'een li xjolomileb' laj Mohab. Ut kipatz'ok laj Balak: “K'aru xye aawe li Qaawa'?”, chan.

¹⁸ Toja' naq laj Balaham kixye eb' li uutz'u'ujinb'il ru aatin a'in: “Xaqlin, a Balak, ut ab'in. Ab'i li tinye, at ralal laj Sipor.

¹⁹ Li Yos maawa' winq: ink'a' natik'ti'ik chi moko naxjal xk'a'uxl. Li k'aru naxye li Yos, naxb'aanu; na'aatinak, ut li raatin taatz'aqloq ru.

²⁰ K'e reetal, xinxb'oq chaq chi osob'tesink: jo'kan naq tin'osob'tesinq, ut ink'a' tinch'ina linch'ool.

²¹ Maak'a' maa'usilal nawil rik'in laj Jakob, maak'a' li ch'a'ajkilal xintaw rik'in laj Israel. Li Qaawa' a'an li xYos laj Israel, ut junelik wank rik'ineb'. Sa' xyanqeb' a'an na'ab'imank naq xaqxo xwankil jun li awab'ej.

²² Naq li Qaawa' kirisiheb' chaq laj Israel aran Ejiipt, kixk'ut li xnimal xkawilal chiruheb', jo' xkawilal li b'ooyx li wank sa' k'iche'.

²³ Maak'a' na'ok wi' laj q'e rik'ineb' laj Jakob, chi moko laj tuul rik'ineb' laj Israel. Sa' xq'ehil taayeemanq reheb' laj Jakob ut laj Israel li k'aru naxb'aanu li Qaawa'.

²⁴ Il li tenamit a'in: yo chi wakliik jo' jun li ixqi kaqkoj, naxxaqab' rib' jo' li teelom kaqkoj li ink'a' nahilank toj toxtaw li xtzak ut taaruk' xkik'el li xkames”.

²⁵ Toja' naq laj Balak kixye re laj Balaham: “Wi ink'a' nakatruhank chi xmajewankil li tenamit a'in, ab'an maawosob'tesi”, chan.

²⁶ Kichaq'ok laj Balaham ut kixye: “Ma ink'a' tab'i' xinye aawe naq tinb'aanu chixjunil li tixye we li Qaawa'?”, chan.

Li rox raatin laj Balaham

²⁷ Toja' naq laj Balak kixye re laj Balaham: “B'aanu usilal, kim. Tatink'am sa' jalan chik na'ajej. Mare aran taawulaq chiru li Yos naq taamajewa chaq toj sa' li na'ajej a'an”, chan.

²⁸ Jo'kan naq laj Balak kixk'am laj Balaham toj sa' xb'een li tzuul Pehor, li nak'utunk wi' li chaqich'och'.

²⁹ Aran laj Balaham kixye re laj Balak: “Yiib' wuqub'aq artal arin, ut kawresiheb' wuqub' chi saaj wakax ut wuqub' karneer”, chan.

³⁰ Laj Balak kixb'aanu li kiyehe'k re xb'aan laj Balak, ut kixyeechi'i jun saaj wakax ut jun karneer cho'q xk'atb'il mayej sa' li junjunq chi artal.