Números 20 - Q'eqchi Bible

Li ha' ki'elk sa' li saqoonak

¹ Chixjunil li xkomonileb' laj Israel ke'wulak sa' li chaqich'och' re Sin sa' li xb'een po, ut ke'kanaak sa' li tenamit Kadés. Aran kikamk lix María ut aran ajwi' kimuqe'k.

² Sa' li na'ajej a'an maak'a' ha' re te'ruk' li tenamit; jo'kan naq ke'ok chi xchoqinkil laj Moisés ut laj Aharón.

³ Eb' li tenamit ke'xchoqi laj Moisés ut ke'xye re: “Q'axal us raj naq kookamk chaq, jo' naq ke'kamk chiru li Qaawa' eb' li qakomon.

⁴ K'a'ut naq xek'am chaq li xkomonil li Qaawa' sa' li chaqich'och' a'in? Ma teeraj naq tookamq laa'o ut eb' li qaketomq?

⁵ K'a' aj e naq xooheerisi chaq Ejiipt? Ma yal re qak'amb'al chaq sa' li xiwajel na'ajej a'in? Arin maak'a' nayo'laak, maak'a' iig, maak'a' uub' chi moko pata, ut maak'a' ha' tquk'?”, chankeb'.

⁶ Laj Moisés ut laj Aharón ke'elk sa' li komonil, koheb' sa' rokeb'aal li Loq'laj Na'ajej ut ke'xhupub' rib' chiru ch'och' chi tijok. Ut aran kixk'ut rib' li xloq'al li Qaawa' chiruheb'.

⁷ Li Qaawa' kiraatina laj Moisés ut kixye re:

⁸ “Chap laaxuq' ut ch'utub'eb' li komonil, aawochb'een laj Aharón laawiitz'in. Chiruheb' chixjunileb' teepatz' li ha' re li saqoonak, ut li saqoonak tixk'e eere. Taayo'laaq li ha' sa' li saqoonak re te'uk'aq li komonil jo'wi' li xketomqeb'”, chan li Qaawa'.

⁹ Laj Moisés kixxok li xuq' li wank chiru li Qaawa', jo' yeeb'il re.

¹⁰ Chirix chik a'an laj Moisés ut laj Aharón ke'xch'utub'eb' li komonil chiru li saqoonak ut laj Moisés kixye reheb': “Ab'ihomaq, ex q'etq'et aj tenamit. Ma nekek'oxla naq truuq taaqisi ha' sa' li saqoonak a'in re tex'uk'aq?”, chan.

¹¹ Laj Moisés kixtaqsi li ruq', ka'sut kixsak' li saqoonak chiru li xxuq' ut k'ajo' li ha' ki'elk chaq sa' li saqoonak: ke'uk'ak li komonil jo' ajwi' li xketomqeb'!

¹² Ab'an li Qaawa' kixye re laj Moisés ut laj Aharón: “Laa'ex ink'a' k'ojk'o eech'ool chiwix ut ink'a' xek'e inloq'al chiruheb' laj Israel. Jo'kan naq ninye eere naq ink'a' tex'ok, eerochb'een li tenamit a'in, sa' li na'ajej li tink'e reheb'”, chan.

¹³ A'an a'in li ha' re Meribá, b'arwi' eb' laj Israel ke'xwech' rix li Qaawa' ut A'an kixk'ut li xsantilal chiruheb'.

Eb' laj Edom ink'a' ke'xkanab'eb' laj Israel chi nume'k sa' li xna'ajeb'

¹⁴ Naq wankeb' Kadés, laj Moisés kixtaqlaheb' aj yehol esil rik'in li awab'ej re Edom; ke'xye re: “Jo'ka'in xe'xye chaq eb' laj Israel aawiitz'ineb': «Laa'at nakanaw chi us li rahilal qak'ulum chaq.

¹⁵ Eb' li qaxe' qatoonal ke'kub'eek Ejiipt ut najt koowank chaq aran. A'ut eb' laj Ejiipt jwal ra ke'xb'aanu chaq qe jo' ajwi' reheb' li qana' qayuwa'.

¹⁶ Toja' naq laa'o kootz'aamank koo'elajink chiru li Qaawa' ut A'an kirab'i li xyaab' qakux: kixtaqla jun li x'ánjel qik'in ut koorisi chaq Ejiipt. Anaqwan wanko arin Kadés, li wank chi xnub'ajlil laana'aj.

¹⁷ B'aanu usilal, kanab'o chi nume'k sa' laana'aj. Ink'a' toonume'q sa' xyanq leerawimq chi moko too'uk'aq ha' sa' leejul. Tiik toonume'q, ink'a' tqajal li qab'e, chi moko sa' qanim chi moko sa' qatz'e, toj reetal toowulaq sa' xnub'ajlil laach'och'»”, chankeb'.

¹⁸ A'ut li awab'ej re Edom kixye: “Ink'a' naru tatnume'q sa' lintenamit. Wi nakab'aanu, tin'elq rik'in ch'iich' chak'ulb'al”, chan.

¹⁹ Ke'chaq'ok eb' laj Israel ut ke'xye re: “Toonume'q sa' li nimb'e, ut wi too'uk'aq sa' laaha' laa'in malaj eb' linketomq, tqatoj chawu. Yal toonume'q chi oqej”, chankeb'.

²⁰ Kichaq'ok li awab'ej re Edom: “Ink'a' texnume'q”, chan. Ut li awab'ej rochb'een naab'aleb' laj puub' li jwal kaweb' rib' ke'elk chaq chi xk'ulb'aleb' laj Israel.

²¹ Ramro li xb'eheb' laj Israel xb'aaneb' laj Edom sa' li xch'och'eb'; jo'kan naq koheb' sa' jalan chik b'e.

Li xkamik laj Aharón

²² Chixjunil li xkomonileb' laj Israel ke'elk Kadés ut ke'wulak toj sa' li tzuul Hor.

²³ Ut li Qaawa' kixye re laj Moisés ut laj Aharón chiru li tzuul Hor, sa' xnub'ajlileb' laj Edom:

²⁴ “Laj Aharón taakamq: toxtaweb' li xna' xyuwa' ut ink'a' taa'ok sa' li ch'och' li xink'e reheb' laj Israel, xb'aan naq ink'a' kepaab' li waatin chire li ha' Meribá.

²⁵ B'oq chaq laj Aharón ut laj Elehasar li ralal, ut k'ameb' toj sa' xb'een li tzuul Hor.

²⁶ Taawisi li raq' aj tij chirix laj Aharón ut a' chik laj Elehasar li ralal taatiqib' chiru a'an. Toja' naq laj Aharón toxtaweb' li xna' xyuwa': aran taaq'ajq taasutq'iiq”, chan li Qaawa'.

²⁷ Laj Moisés kixb'aanu jo' chanru yeeb'il re xb'aan li Qaawa'. Ke'taqe'k sa' xb'een li tzuul Hor chiruheb' chixjunil li tenamit.

²⁸ Aran kirisi li raq' aj tij chirix laj Aharón ut kixtiqib' laj Elehasar li ralal. Ut aran ajwi', sa' xb'een li tzuul, kikamk laj Aharón. Toja' naq laj Moisés kikub'eek sa' li tzuul rochb'een laj Elehasar.

²⁹ Naq li xkomonileb' laj Israel ke'rab'i resil li xkamik laj Aharón, chixjunileb' ke'xyaab'a laj Aharón chiru jun po.