Números 13 - Q'eqchi Bible

Laj Moisés kixtaqlaheb' laj k'ehol eetal chi rilb'al li na'ajej Kanahán

¹ Li Qaawa' kixye re laj Moisés:

² “Taqlaheb' winq re naq toxe'ril chaq li xteepal Kanahán, li tink'e reheb' laj Israel. Taqlaheb' li wankeb' xwankil, junjun re li junq teep”, chan.

³ Laj Moisés kixtaqlaheb' jo' chanru yeeb'il re xb'aan li Qaawa': kixtaqlaheb' li wankeb' xwankil sa' xyanqeb' laj Israel. Kixchaq'rab'iheb' naq toj wankeb' chaq sa' li chaqich'och' re Parán.

⁴ A'an a'in li xk'ab'a'eb': laj Samúa, ralal laj Sakur, kitaqlaak sa' xk'ab'a' xteepalil laj Rubén;

⁵ laj Safat, ralal laj Jurí, sa' xk'ab'a' xteepalil laj Simehón;

⁶ laj Kaleb, ralal laj Jefuné, sa' xk'ab'a' xteepalil laj Judá;

⁷ laj Ikal, ralal laj José, sa' xk'ab'a' xteepalil laj Isakar;

⁸ laj Oseas, ralal laj Nun, sa' xk'ab'a' xteepalil laj Efraín;

⁹ laj Paltí, ralal laj Rafú, sa' xk'ab'a' xteepalil laj Benjamín;

¹⁰ laj Katiel, ralal laj Sodí, sa' xk'ab'a' xteepalil laj Sabulón;

¹¹ laj Kadí, ralal laj Susí, sa' xk'ab'a' xteepalileb' laj José ut laj Manasés;

¹² laj Amiel, ralal laj Kemalí, sa' xk'ab'a' xteepalil laj Dan;

¹³ laj Setur, ralal laj Mek, sa' xk'ab'a' xteepalil laj Aser;

¹⁴ laj Najbí, ralal laj Bapsí, sa' xk'ab'a' xteepalil laj Neftalí;

¹⁵ ut laj Kewel, ralal laj Makí, kitaqlaak sa' xk'ab'a' xteepalil laj Gad.

¹⁶ A'aneb' a'in li xk'ab'a'eb' li winq ke'taqlaak xb'aan laj Moisés re rilb'al li tenamit. Ab'an laj Oseas, ralal laj Nun, Josué kik'ehe'k cho'q xk'ab'a' xb'aan laj Moisés.

¹⁷ Laj Moisés kixtaqlaheb' chi rilb'al li tenamit Kanahán, ut kixye reheb': “Taqenqex chiru Nejeb ut moqon chik toxex'okaq sa'eb' li k'iche'b'aal.

¹⁸ K'ehomaq reetal chi us li tenamit ut aniheb' li wankeb' aran, ma kaweb' rib' malaj ink'a', ma k'iheb' malaj ink'a',

¹⁹ ut chanru li na'ajej wankeb' wi', ma chaab'il malaj ink'a'. Teek'e chaq reetal chanru eb' li tenamit aran, ma yal muheb'aaleb' malaj suttz'akinb'il.

²⁰ Jo'kan ajwi' li ch'och', ma chaab'il malaj joxk' ru, ma k'iche' ru malaj ink'a'. Mexxiwak ut chek'am chaq kach'inaq ru rawimq li na'ajej a'an”, chan. Ak xq'ehil chik li xb'een ch'oqok ru li uub',

²¹ naq koheb' li winq ut koxe'ril chaq li tenamit, chalen sa' li chaqich'och' re Sin toj Rejob, sa' rokeb'aal li tenamit Jamat.

²² Ke'taqe'k chiru Nejeb ut ke'wulak toj Hebrón, b'arwi' wankeb' laj Ajimán, laj Sesay ut laj Talmay, ralal xk'ajoleb' laj Anak. Hebrón kik'ojob'aak wuqub' chihab' junxilaj chiru Sohán sa' xteepal Ejiipt.

²³ Ke'wulak sa' xtaq'ahil Eskol ut ke'xtoch jun chiil li uub', ke'xb'ak' chirix jun che' ut ke'xpaqo sa' wiib'al; ke'xk'am ajwi' ki'il q'een ut iig.

²⁴ Jo'kan naq ke'xk'e Eskol cho'q xk'ab'a' li ru taq'a a'an, xb'aan naq aran eb' laj Israel ke'xtoch jun chiil li uub'.

²⁵ Ka'k'aal kutan chik xtiklajik rilb'al li ch'och' a'an, naq ke'sutq'iik chaq eb' li winq

²⁶ ut kole'xk'ut rib' chiruheb' laj Moisés, laj Aharón ut chixjunil li xkomonileb' laj Israel aran Kadés, sa' li chaqich'och' re Parán. Ke'xseeraq'i reheb' chi tustu ru chixjunil li k'a'aq re ru koxe'ril chaq sa' li na'ajej, ut ke'xk'ut ru li awimq ke'xk'am chaq.

²⁷ A'an a'in li ke'xseeraq'i: “Xoowulak sa' li tenamit xoohaataqla wi', ut relik chi yaal naq xq'emal li ch'och'. A'aneb' a'in ru li awimq.

²⁸ Ab'anan li poyanam wankeb' sa' li na'ajej a'an, jwal kaweb' rib'; sutsuukeb' chi tz'ak ut jwal ninqeb' li xtenamiteb'. Xqilatq chaq aran li ralal xk'ajol laj Anak.

²⁹ Eb' laj Amalek wankeb' aran Nejeb; eb' laj Hit, laj Amor ut eb' laj Jebús wankeb' sa' li k'iche'b'aal; eb' laj Kanahán wankeb' chire li palaw ut chi junqre li nima' Jordán”, chankeb'.

³⁰ Toja' naq laj Kaleb ki'aatinak re te'xkanab' choqink chiru laj Moisés ut kixye: “Yo'qeb' ut qeechaniiq li tenamit, xb'aan naq naru taaqaq'ax ruheb'”, chan.

³¹ A'ut eb' li winq ke'ochb'eenink re chi rilb'al li tenamit Kanahán, ke'xye: “Ink'a' naru tooxik chi yalok rik'in li tenamit a'an, xb'aan naq jwal kaweb' rib' chiqu laa'o”, chankeb'.

³² Ut ke'ok chi xyeeb'al reheb' laj Israel naq li ch'och' li koxe'ril chaq moko chaab'il ta; ke'xye: “Li tenamit xo'qil chaq, a'an jun tenamit li naxsacheb' li wankeb' aran. Chixjunil li poyanam xqileb' chaq aran, junes ninqeb' xteram.

³³ Xqileb' ajwi' chaq xninqal poyanam, ralaleb' laj Anak, riyajileb' li najt xterameb'. Laa'o chanchano wi' chili' chiruheb' a'an, ut jo'kan ajwi' naq nokoohe'ril laa'o”, chankeb'.