Nehemías 9 - Q'eqchi Bible

Eb' laj Israel ke'yot'e'k xch'ool ut ke'xtz'aama xkuyb'al li xmaakeb'

¹ Sa' li kaahib' xka'k'aal xb'e li po a'an ke'xch'utub' rib'eb' laj Israel re ayuunik chi tiqtookeb' rik'in q'es ruhil t'ikr ut wank pojtz' sa' xjolomeb'.

² Ke'risi rib' sa' xyanqeb' chixjunileb' laj ab'l tenamit, ke'xxaqab' rib' ut ke'xxooto li xmaakeb' jo' ajwi' xmaakeb' li xna' xyuwa'eb'.

³ Ut naq xaqxookeb' sa' xna'ajeb', chiru oxib' honal kiyaab'asimank xsa' xHuhil li xChaq'rab' li Qaawa' li xYoseb'; ut chiru oxib' honal chik ke'xxooto li xmaakeb' ut ke'xloq'oni li Qaawa' li xYoseb'.

⁴ Chirix chik a'an laj Josué, laj Binuy, laj Kadmiel, laj Sebanías, laj Buní, laj Serebías, laj Baní ut laj Kenaní ke'taqe'k sa' xna'ajeb' laj Leví ut ke'xyaab'a xk'ab'a' li Qaawa' li xYoseb' chi kaw xyaab' xkuxeb'.

⁵ Laj Josué, laj Kadmiel, laj Baní, laj Jasabnías, laj Serebías, laj Hodías, laj Sebanías ut laj Petajías aj Levíheb' ke'xye: “Xaqlinqex ut chenimaaq ru li Qaawa' leeYos junq'e junq'e kutan. Usilaatinanb'il taxaq li xloq'laj k'ab'a', li q'axal nim xloq'al ut xwankilal chiru chixjunil li naru xyeeb'al”.

⁶ Toja' naq laj Esdras kixye: “At Qaawa', ka'jat wi' li Yos! Laa'at katyiib'ank re li xnimal li choxa ut chixjunileb' li chahim. Laa'at aj Winqob'resihom re li choxach'och' ut chixjunil li wank chisa'; laa'at katyiib'ank re li palaw ut jo'ch'inal jo'nimal yo'yo sa' xchamal. Laa'at xyo'leb'aal li yu'am; jo'kan naq nakate'xloq'on eb' li chahim sa' choxa.

⁷ “At Qaawa', laa'at li Yos li kasik' ru laj Abrán: kawisi aran Ur sa' xteepal Kaldeha, ut Abrahán chik kak'e cho'q xk'ab'a'.

⁸ Kawil naq q'axal tiik xch'ool chawu; jo'kan naq kak'ojob' jun li sumwank rik'in re xk'eeb'al reheb' li xch'och'eb' laj Kanahán, eb' laj Hit, eb' laj Amor, eb' laj Perés, eb' laj Jebús ut eb' laj Kirkás. Kayeechi'i li ch'och' a'an re laj Abrahán ut eb' li ralal xk'ajol, ut xaqxo xwankil laawaatin, xb'aan naq tiik aach'ool.

⁹ Laa'at kak'e reetal li xtoq'ob'aal ruheb' li qana' qayuwa' aran Ejiipt ut kawab'i li xyaab' xkuxeb' chire li Kaqi Palaw.

¹⁰ Kab'aanu xninqal eetalil ut sachb'ach'oolej sa' xb'een laj Parahón, sa' xb'eeneb' laj k'anjel chiru jo'wi' sa' xb'een chixjunil li xtenamit, xb'aan naq aawilom chanru naq ke'xq'etq'eti rib' chiruheb' laj Israel. Jo'kan naq chalen anaqwan nawno aawu yalaq b'ar.

¹¹ Laa'at kajach li palaw chiruheb', ut ke'nume'k junpak'al chi chaqi ru li xb'eheb'. Kama'eb' li pek sa' xchamal li palaw naq kasub'eb' sa' ha' li ke'aanilasink chaq reheb'.

¹² Kak'ameb' xb'e chi kutan rik'in jun keel chi choql, ut chi q'eq rik'in jun keel chi xam, re xk'utb'al li b'e tento te'nume'q wi'.

¹³ “Moqon chik katkub'eek sa' xb'een li tzuul Sinaí ut toj sa' choxa kawaatinaheb' chaq. Tz'aqal re ru li xtaqlankileb' kak'e, tz'aqal yaal ut q'axal chaab'il laachaq'rab', laataqlahom ut laawaatin.

¹⁴ Kak'e chixnaweb' laaloq'laj sábado ut kachaq'rab'i laj Moisés aj k'anjel chawu xk'utb'al laataqlahom, laawaatin ut laachaq'rab' chiruheb' laj Israel.

¹⁵ Kataqla chaq li choxahil wa re naq ink'a' chik te'tz'okaaq, ut naq kichaqik reheb', kak'e chi yo'laak li ha' sa' li saqoonak. Chirix chik a'an kaye reheb' naq toxe'reechani li ch'och' kayeechi'i reheb'.

¹⁶ “Ab'an eb' a'an ut eb' li qana' qayuwa' ke'xq'etq'eti rib', ke'xkawub'resi xch'ooleb' ut ink'a' ke'raj rab'inkil laachaq'rab'.

¹⁷ Ink'a' ke'raj paab'ank chi moko xjultikankil eb' li sachb'ach'oolej kab'aanu sa' xyanqeb'; ke'xkawub'resi b'an xch'ooleb' ut ke'xxaqab' jun aj k'amol b'e re te'sutq'iiq wi' chik Ejiipt sa' li munil. Ab'anan laa'at li Yos aj kuyul maak, chaab'il laach'ool ut aj uxtaanat; ink'a' nakatjosq'o'k sa' junpaat ut k'ajo' laarahom. Ink'a' kakanab'eb' xjunes.

¹⁸ Us ta ke'xyiib' jun ch'ina wakax rik'in ha'lesinb'il ch'iich' ut ke'xye naq a'an li xyoseb' li ki'isink chaq reheb' Ejiipt, us ta k'ajo' naq kate'xtz'eqtaana,

¹⁹ ab'anan laa'at, xb'aan xnimal laawusilal, ink'a' kakanab'eb' xjunes sa' li chaqi ch'och'; ink'a' ke'kanab'aak xb'aan li jun keel chi choql re xk'amb'al xb'eheb' chi kutan, chi moko ke'kanab'aak chi q'eq xb'aan li xam re xkutanob'resinkil chiruheb' li b'e b'arwi' te'xik.

²⁰ Kak'e ajwi' laachaab'il musiq' re xtijb'aleb'; junelik kataqla chaq li maná re xch'oolaninkileb', ut kak'e ha' reheb' re naq ink'a' te'chaqiq re.

²¹ Ka'k'aal chihab' kach'oolaniheb' sa' li chaqi ch'och', ut maak'a' kimajelo'k reheb': ink'a' kiq'elo'k li raq'eb' chi moko kisipoje'k li roqeb'.

²² “Kaq'axtesiheb' tenamit ut awab'ejihom sa' ruq'eb', ut kajek'i reheb'; ut eb' a'an ke'reechani Jesbón, xna'aj laj Sijón li awab'ej, jo' ajwi' Basán, xna'aj laj Og li awab'ej.

²³ Ut kanaab'alob'resiheb' li ralal xk'ajoleb' jo' xk'ihal li chahim chiru choxa; ut kak'ameb' sa' li ch'och' li kaye naq te'reechani li xna' xyuwa'eb'.

²⁴ Naq koxe'okaq ut ke'reechani li xna'ajeb' laj Kanahán, laa'at kaputz'iheb' li wankeb' sa' li tenamit a'an, kaq'axtesiheb' li x'awab'ejeb' ut eb' li poyanam sa' ruq'eb' laj Israel, re naq te'xb'aanu reheb' li te'raj.

²⁵ Koxe'xchap eb' li tenamit kawub'resinb'ileb' chi us ut li chaab'il ch'och'; naab'aleb' li ochoch nujenaqeb' chi chaab'il eechej, xiikileb' li kumb', li awimq uub' ut oliiw, ut eb' li che' na'uuchink. Ke'wa'ak, ke'k'ojlaak xch'ool, ke'ninqank xtib'eleb' ut ke'xyal xsahil li xnimal aawusilal.

²⁶ “Ab'anan chirix a'an ke'xq'et laawaatin, ke'xq'etq'eti rib' chawu ut ke'xtz'eqtaana laachaq'rab'. Ke'xkamsiheb' li propeet li ke'xch'olob' chiruheb' naq te'sutq'iiq wi' chik aawik'in, ut k'ajo' naq kate'xmajewa.

²⁷ Jo'kan naq kaq'axtesiheb' sa' ruq'eb' li xik' neke'ilok reheb' ut naab'al li rahilal ke'xk'ul. Moqon chik, naq yo xrahob'tesinkileb', ke'xjap reheb' re xtz'aamankil xtenq'ankileb' aawe, ut laa'at toj sa' choxa kawab'iheb' chaq: sa' xk'ab'a' xnimal laawusilal kataqlaheb' winq li ke'kolok reheb' sa' ruq'eb' laj rahob'tesinel.

²⁸ “Ab'an naq toje'aq rokikeb' sa' tuqtuukilal, ke'ok wi' chik chi maakob'k chawu; jo'kan naq kakanab'eb' sa' ruq'eb' li xik' neke'ilok reheb', li ke'numtaak sa' xb'eeneb'. Ke'xjap reheb' re xtz'aamankil xtenq'ankileb' aawe, ut laa'at toj sa' choxa kawab'iheb' chaq: xb'aan xnimal laarahom naab'al sut kakoleb'.

²⁹ Kaq'useb' re naq te'xpaab' wi' chik laachaq'rab', ab'an eb' a'an ink'a' ke'xpaab'; ke'xnimob'resi b'an rib' chawu, ke'maakob'k ut ke'xq'et laataqlahom li nak'ehok xyu'am li ani napaab'ank re. Ke'xkawub'resi ut ke'xjipu li xch'ooleb', tik ink'a' ke'ab'ink.

³⁰ Chiru k'iila chihab' kakuyeb', kak'e xna'leb'eb' rik'in laamusiq' ut chi xtz'uumal reheb' laapropeet. Ab'an eb' a'an ink'a' ke'ab'ink; jo'kan naq kaq'axtesiheb' sa' ruq'eb' li tenamit wankeb' sa' ruuchich'och'.

³¹ Ut sa' xk'ab'a' xnimal laarahom ink'a' kasacheb' chi junajwa chi moko kakanab'eb' xjunes, xb'aan naq laa'at jun Yos aj uxtaan ut chaab'il laach'ool.

³² “Jo'kan utan, at Qaawa', at qaYos nim aawankil ut xiwajel aawu, li junelik nakapaab' li sumwank ut laarahom, k'e reetal chixjunileb' li rahilal ke'chalk sa' qab'een, sa' xb'eeneb' li qa'awab'ej ut eb' laj k'amol qab'e, eb' laj tij ut eb' li propeet, sa' xb'eeneb' li qana' qayuwa' ut chixjunil li qatenamit, chalen sa'eb' li kutan naq ke'wank li awab'ej re Asiria toj anaqwan.

³³ Laa'at tiik laach'ool ut paab'ajelat sa' chixjunil li kichalk sa' qab'een, a'ut laa'o koomaakob'k.

³⁴ Eb' li qa'awab'ej ut eb' laj k'amol qab'e, eb' laj tij ut eb' li qana' qayuwa' ink'a' ke'xpaab' laachaq'rab' chi moko ke'raj rab'inkil li kaye reheb' rik'ineb' laataqlahom ut laawaatin.

³⁵ Laa'at kawosob'tesiheb' sa' li xna'ajeb' rik'in naab'al li k'a'aq re ru; kaq'axtesi reheb' jun li ch'och' q'axal nim ut chaab'il; a'ut eb' a'an ink'a' ke'k'anjelak chawu chi moko ke'xyot' xch'ool chirix li xmaa'usilaleb', ink'a' ke'raj xjalb'al li xk'a'uxeb'.

³⁶ “Ut anaqwan, at Qaawa', k'e reetal naq laa'o aj mun sa' li ch'och' kayeechi'i reheb' li qana' qayuwa' re naq te'xyal xsahil li rawimq ut li xb'ihomal.

³⁷ Chixjunil li rawimq li ch'och' nak'ule'k xb'aaneb' li awab'ej li kaxaqab' sa' qab'een re xtojb'al rix qamaak. Laa'o ut li qaketomq wanko rub'el xwankileb' a'an. Jo'kan naq q'axal ra wanko!”.

Li sumwank ke'xb'aanu wi' chik li tenamit rik'in li Qaawa'

³⁸ Sa' xk'ab'a' chixjunil a'in laa'o naqaye li qaatin naq tqapaab' li sumwank a'in. Xe'xk'ulub'an li hu a'in eb' laj k'amol qab'e, eb' laj Leví ut eb' laj tij, li ke'xtz'iib'a ajwi' xk'ab'a'eb'.