Nehemías 1 - Q'eqchi Bible

Laj Nehemías kitijok chirix li xtenamit

¹ A'an a'in li aatin kixtz'iib'a laj Nehemías, ralal laj Jakalías. Naq junmay chihab' rokik chi awab'ejil laj Artajerjes, sa' li po Kislew, wankin sa' li tenamit Susa

² naq kiwulak laj Jananí, li wiitz'in, rochb'eeneb' wiib' oxib' chi winq chalenaqeb' Judá. Toja' naq kinpatz' reheb' chirix Jerusalén ut chanru wankeb' laj Judiiy li ink'a' koheb' chi preexil aran Babilonia.

³ Kine'xchaq'b'e: “Eb' li ink'a' koheb' chi preexil ut ke'kanaak sa' xteepal Judá, wankeb' anaqwan sa' rajb'al ru ut naab'al li rahilal yookeb' xk'ulb'al. Juk'inb'il li tz'ak sutsu wi' Jerusalén, ut k'atb'il li xtz'apb'al rokeb'aal li tenamit”, chankeb'.

⁴ Naq kiwab'i a'in, kink'ojlaak ut kin'ok chi yaab'ak. Ut chiru wiib' oxib' kutan q'axal kiraho'k sa' inch'ool, kin'ayuunik ut kintijok chiru li choxahil Yos.

⁵ Ut kinye re: “At Qaawa', at Eechal re li choxa, laa'at li Nimajwal Yos ut xiwajel aawu! Junelik wank sa' laach'ool li loq'laj sumwank ut laarahom cho'q reheb' li neke'rahok aawe ut neke'xpaab' laachaq'rab'.

⁶ Nintz'aama chawu naq chawil taxaq xtoq'ob'aal wu ut chawab'i lintij chi q'eq ut chi kutan sa' xk'ab'a'eb' laj Israel aj k'anjeleb' chawu. Yaal naq xoomaakob'k chawu laa'in ut eb' li wech'alal; xoomaakob'k laa'o aj Israel

⁷ xb'aan naq ink'a' xqapaab' laachaq'rab', laawaatin ut laataqlahom li xak'e qe sa' xk'ab'a' laj Moisés aj k'anjel chawu.

⁸ Chakuy inmaak, jultikaq aawe li k'aru kayeechi'i re laj Moisés: «Wi teeq'et li waatin, laa'in texincha'cha'i sa' xyanqeb' li tenamit.

⁹ Ab'an wi texsutq'iiq chaq wik'in, wi teepaab' ut teek'anjela ru linchaq'rab', tinxik chesik'b'al ut texink'am wi' chik sa' li na'ajej sik'b'il ru inb'aan cho'q inmuheb'aal, us ta ak cha'cha'inb'ilex toj sa' xmaril li choxa», chankat.

¹⁰ “At Qaawa', laa'o aj k'anjel chawu; misachk sa' aach'ool naq laa'o laatenamit li xakoleb' rik'in xnimal aawankil ut aametz'ew.

¹¹ Nintz'aama chawu, at Qaawa', chawab'i taxaq lintz'aamahom ut li xtijeb' laj k'anjel chawu li neke'raj xnimankil laak'ab'a'. Chak'e taxaq naq us tin'elq ut usilal toxintaw rik'in li awab'ej”. Sa'eb' li kutan a'an laa'in aj k'ehol ruk'a' li awab'ej naq kinwank.