Nahum 1 - Q'eqchi Bible

Li xjosq'il li Yos sa' xb'een Nínive

¹ Xyehom li Qaawa' chirix li tenamit Nínive. A'an a'in li hu tz'iib'anb'il wi' li moy u kiril laj Nahúm, aj Elkós.

² Li Qaawa' a'an jun Yos aj sowen ut aj eeqajunel; na'eeqajunk ut k'ajo' li xjosq'il. Ink'a' nasachk sa' xch'ool li xmaakeb' li xik' neke'ilok re.

³ Li Qaawa' nab'ayk chi josq'o'k, ab'anan jwal nim li xwankil, ut junelik naxk'e chi xtojb'al xmaak li ani xmaakob'k. Nab'eek sa' li kaqsut-iq', ut eb' li choql a'aneb' li xpojtz'il li roq.

⁴ Naxch'iila li palaw ut naxk'e chi chaqik; naxchaqihob'resi ajwi' eb' li nima'. Chiru li Qaawa' neke'tz'umak li xpimul Basán ut Karmeel, ut neke'chaqik eb' li uutz'u'uj re Líbano.

⁵ Eb' li tzuul neke'eek'ank sa' xna'aj chiru A'an, ut eb' li b'ool neke'xsiksiki rib'eb'. Chixjunil li ruuchich'och' nahetlok chi rilb'al, ut neke'xiwak jo'k'ihaleb' li wankeb' chisa'.

⁶ Ani taaruuq taakuyuq re li xjosq'il? Ani taawanq chi xaqam chiru naq taajosq'o'q? Li xjosq'il naxpuka rib' chanchan li xam, ut chiru A'an neke'xjor rib' eb' li saqoonak.

⁷ Li Qaawa' a'an q'axal chaab'il cho'q re li kaw xch'ool chirix; a'an li kawilal sa' xhonalil li rahil ch'oolej ut narileb' li neke'oyb'enink rik'in

⁸ naq nanume'k li b'ut'iha'. Ab'anan naxsacheb' li neke'xq'etq'eti rib' chiru, ut sa' aak'ab' neke'kanaak li xik' neke'ilok re.

Raqok aatin sa' xb'een Judá ut Nínive Sa' xb'eeneb' laj Judá

⁹ K'aru yookex chi xk'uub'ankil chirix li Qaawa'? A'an tixsach eeru chi junajwa! Maajun naru taawakliiq chiru xka'sutil,

¹⁰ xb'aan naq eb' li xik' neke'ilok re, te'oso'q chi junajwa chanchaneb' li k'ix xchapomeb' rib'; jo'qeb' li chaqi k'im naq te'k'ate'q, ut k'ajo'eb' chi kalaak sa' xninq'eheb'.

Sa' xb'een Nínive

¹¹ At Nínive, sa' eeyanq x'elk li xk'uub'ank re li rahilal re li Qaawa': jun aj k'ehol na'leb' jwal yib'ru xna'leb'.

Sa' xb'eeneb' laj Judá

¹² Jo'kan naq li Qaawa' xye chi jo'ka'in: “Us ta jwal kaweb' rib' laj Asiria ut k'ajo' xk'ihaleb', ab'an te'oso'q ut te'sachq chi junajwa. Laa'in k'ajo' laarahob'tesinkil xinb'aanu, ab'an ink'a' chik tatinrahob'tesi.

¹³ Tinsach li xwankileb' li neke'numtaak sa' aab'een ut tint'upi li kareen b'ak'b'ookat wi'”.

Sa' xb'een li awab'ej re Nínive

¹⁴ A'an a'in li xkawresi cho'q aawe li Qaawa': “At awab'ej re Nínive, maajun aawalal aak'ajol taawanq li te'k'amoq laak'ab'a'. Sa' laatijob'aal tinjuk'eb' laayos ut tinmuri eb' li xjalam uheb'; ut laa'at tatinmuq, xb'aan naq tz'eqtaananb'ilat”.

Sa' xb'eeneb' laj Judá

¹⁵ Waye' chaq sa' xb'eeneb' li tzuul laj yehol resil li tuqtuukilal! Ninq'ehin, at Judá, ut maayejan xb'aan naq ink'a' chik taanume'q aawik'in laj sachonel: xsache'k chi junajwa.