Miqueas 6 - Q'eqchi Bible

Li xjosq'il li Yos rik'ineb' laj Israel

¹ Ab'ihomaq anaqwan li naxye li Qaawa': “Xaqlin ut b'oqeb' chaq li tzuul cho'q aatestiiw, ut rab'iiqeb' xyaab' laakux eb' li b'ool”.

² Ab'ihomaq, ex tzuultaq'a ut laa'ex li rub'elankil li ruuchich'och': li Qaawa' ok re sa' raqb'a aatin rik'in li xtenamit, ok re chi jitok chirix laj Israel.

³ Jo'ka'in naxye li Qaawa': “At intenamit, k'aru xinmaakon chawu? K'aru xatinch'i'ch'i'i wi'? Ye b'i' we.

⁴ Laa'in kin'isink chaq aawe Ejiipt, katinkol chaq chiru li wank chi munil ut kintaqlaheb' cho'q aj k'amol b'e laj Moisés, laj Aharón ut lix María.

⁵ At intenamit, jultikaq aawe anaqwan k'aru kixk'uub' laj Balak, li awab'ej re Mohab, ut li xsumenkil xb'aan laj Balaham, ralal laj Pehor. Jultikaq aawe naq katnume'k chaq Sitín toj Kilkal, ut k'e reetal li xtiikilal xch'ool li Qaawa'”.

Li naroyb'eni li Yos rik'in li poyanam

⁶ “K'aru tink'am re li Qaawa'? Chanru toxinwiq'ib' wib' chiru li xYos li choxa? Ma tinloq'oni tab'i' ru rik'in kok' wakax aj jun chihab' malaj rik'in k'atb'il mayej?

⁷ Ma tixk'ul tab'i' li Qaawa' jun milaq chi karneer malaj k'iila o'q'ob' kuk chi aseeyt? Malaj ut tinmayeja li xb'een walal xb'aan naq xinq'etq'eti wib' chiru? Ma tinmayeja tab'i' li walal re xtojb'al rix linmaak?”.

⁸ At winq, at ixq, ak yeeb'il aawe li k'aru us xb'aanunkil, a' li nawulak chiru li Qaawa' naq taab'aanu: ka'ajwi' xb'aanunkil li tiikilal, xk'eeb'al aach'ool chi rahok ut taakub'si laawankil chiru laaYos.

Chirix li elq'ak ut tik'ti'ik

⁹ Li Qaawa' xjap re chi xb'oqb'al Jerusalén: “Ab'ihomaq, ex tenamit ut li nekexk'ehok na'leb'!

¹⁰ Sa' rochoch li ink'a' us xna'leb' wank li b'ihomal tawb'il sa' b'alaq' ut eb' li b'isleb' ka'paay ru, li q'axal nintz'eqtaana.

¹¹ Chanru naq tinkuy xmaak li na'oksink li b'isleb' ink'a' tz'aqal ut li b'alaq'il b'iis?

¹² Chixjunileb' li b'ihom sa' li tenamit a'in aj rahob'tesineleb'; ut eb' li tenamit aj tik'ti'eb' ut aj b'alaq'eb'.

¹³ Jo'kan naq xintikib' aarahob'tesinkil ut xsachb'al aawu xb'aaneb' laamaak.

¹⁴ Tattzekanq, ab'an ink'a' taak'ojlaaq laach'ool: li tz'okaak taachoyoq aawe. Tatk'uulanq tzekemq, ab'an maak'a' taa'ela'anq chawu; ut wi wank k'aru taaxok, tink'e chi oso'k xb'aan li raaxiik'.

¹⁵ Tat-awq, ab'an maak'a' taaxok; tatyatz'oq ru li oliiw, ab'an maak'a' taataw; tatyatz'oq uub', ab'an ink'a' tat-uk'aq b'iin.

¹⁶ Xb'aan naq xapaab' li xchaq'rab' laj Omrí, ut xab'aanu li neke'xb'aanu eb' li ralal xk'ajol laj Ajab; xatzol aawe jo' chanru xna'leb'eb' a'an. Jo'kan naq tatinrahob'tesi, ut eb' laapoyanamil tink'eheb' cho'q se'leb'aal; ut aamaak laa'at xutaanal wanqeb' lintenamit”.