Miqueas 5 - Q'eqchi Bible

Xk'ojlajik li x'awab'ejihom laj David

¹ “Ut anaqwan kawal wanqat, Jerusalén, xb'aan naq xe'xch'utub' rib'eb' chi qasutb'al; rik'in b'aar ch'iich' yookeb' xsak'b'al li xko li jolomileb' laj Israel.

² A'ut laa'at, Belén Efratá, jwal kach'inat sa' xteepal Judá, aawik'in taa'elq chaq li taa'awab'ejinq re Israel. A'an taayo'laaq sa' riyajil jun mayer junkab'al”.

³ Jo'kan naq li Yos tixkanab' xjunes li xtenamit toj reetal taa'alanq li ixq li wank sa' yu'am. Toja' naq eb' laj Israel li ke'k'ame'k sa' ab'l tenamit, te'sutq'iiq wi' chik sa' xyanqeb' li rech tenamitul.

⁴ Li awab'ej tixb'eresi li xtenamit rik'in li xwankil ut xloq'al li Qaawa', li xYos. Ut chaab'il chik te'wanq, xb'aan naq li Qaawa' sut-nimanb'ilaq ru, toj sa' xmaril li ruuchich'och'.

⁵ A'anaq li qatuqtuukilal. Naq eb' laj Asiria tole'xchap li qatenamit ut te'ok sa' li qana'aj, tqataqla sa' xb'eeneb' wuqub' aj jolominel ut waqxaqib'eb' ninqeb' xwankil.

⁶ Eb' a'an te'awab'ejinq re Asiria, li xna'aj laj Nemrod, rik'in q'esnal ch'iich', ut toohe'xkol chiruheb' laj Asiria li te'ok sa' li qatenamit re reechaninkil li qach'och'.

Eb' li xik' neke'ilok qe talaje'sache'q

⁷ Toja' naq eb' li te'kole'q sa' xyanqeb' laj Israel chanchanaqeb' li k'ajob' nachalk rik'in li Qaawa', cho'q reheb' li k'iila tenamit; jo'aqeb' li hab' sa' xb'een li raxpim, k'ojk'ooqeb' xch'ool rik'in li Yos, ut ink'a' yal rik'in winq.

⁸ Sa' xyanqeb' li tenamit ut eb' li k'iila poyanam, li rela'eb' li ralal xk'ajol laj Jakob chanchanaqeb' li kaqkoj sa' xyanqeb' li k'iila josq' aj xul sa'eb' li k'iche', jo'aqeb' li ral kaqkoj sa' xyanqeb' li karneer: nat'upink ut nasachok b'arwi' nanume'k, ut maajun naramok chiru.

⁹ At Qaawa', taqsi laawuq' sa' xb'eeneb' li xik' neke'ilok aawe ut sach ruheb' chixjunileb'.

¹⁰ Xyehom li Qaawa': “Sa' li kutan a'an tinkamsiheb' laakawaay ut tinjuk'eb' laab'eleb'aal ch'iich'.

¹¹ Tinsach ruheb' laatenamit sa' laateepalil ut tinjuk'eb' laakawub'resinb'il ochoch.

¹² Twisi li tuulak nakab'aanu, ut maajun chik aj q'e tinkanab' aawik'in.

¹³ Teb'insach laayiib'anb'il yos jo'wi' eb' li pek nakaloq'oni ru, re naq ink'a' chik taawiq'ib' aawib' chi xloq'oninkil li yal xyiib'ahom laawuq'.

¹⁴ Tinmich'eb' li xtoonal laaloq'laj che' ut tinsach ruheb' laatenamit.

¹⁵ Chirix chik a'an, rik'in linjosq'il tin'eeqajunq sa' xb'eeneb' li tenamit li ink'a' xe'ab'ink”.