Miqueas 2 - Q'eqchi Bible

Ra chaalel sa' xb'eeneb' li neke'rahob'tesink reheb' li neb'a'

¹ Ra chaalel sa' xb'eeneb' li ink'a' neke'b'aanunk li tiikilal! Naq yokyookeb' sa' li xwarib'aaleb', neke'xk'uub' li maa'usilal; ut naq nawulak xkutankil, neke'xb'aanu li xk'uub'ahomeb' xb'aan naq wank li xwankileb'.

² Neke'rahink jalanil ch'och', ut neke'reechani; neke'rataw junaq ochoch, ut neke'relq'a. Neke'xrahob'tesi laj eechal junkab'al ut eb' li wankeb' chisa', li winq jo'wi' li k'aru re.

³ Jo'kan naq li Qaawa' xye chi jo'ka'in: “Laa'in ajwi' xink'uub' jun rahilal cho'q eere. Tintaqla sa' eeb'een jun rahilal li ink'a' texruuq wi' xkolb'al eerib'; ut ink'a' chik texb'eeq chi wanq eewankil, xb'aan naq chalk re xkutankil li sachok.

⁴ Sa' li kutan a'an taab'ichamanq eere jun li b'ich re rahil ch'oolejil. Te'xye eere: «Xoosache'k chi junajwa. Li qatenamit, li reechanihom li Qaawa', jalan chik laj eechal re anaqwan, ut maajun xramok re. Xjek'iik li qach'och' chirixeb' li xe'eechanink qe», cha'qeb' eere”.

⁵ Jo'kan naq laa'ex ink'a' textz'aqonq sa' xyanqeb' li xtenamit li Qaawa'.

Eb' li propeet ink'a' useb' xch'ool

⁶ “Mooheeraatina chik jo' propeet. Laa'o ink'a' tooxtaw li rahilal”, chankeb' a'an.

⁷ Ma majewanb'il tab'i' li xtenamit laj Jakob? Ma maak'a' chik xkuyum li Qaawa'? Ma jo'ka'in naxb'aanu li Yos? Ma ink'a' tab'i' na'aatinak re rusilankil eb' li neke'b'aanunk li tiikilal?

⁸ Laa'ex nekexnumtaak sa' xb'een lintenamit. Nekemaq' li xchaab'il aq'eb' li neke'sutq'iik chaq chi yalok chi saheb' sa' xch'ool.

⁹ Nalajerisi eb' li ixq sa' li rochocheb' q'axal raaro xb'aaneb', ut nekemaq' xloq'aleb' li ralal xk'ajoleb' li ink'ehom reheb' laa'in.

¹⁰ Xaqlinqex ut ayuqex! Li na'ajej a'in maawa' re hilank: xb'aan li maa'usilal x'uxmank arin, taasachmanq chi junajwa.

¹¹ Wi wan junaq propeet li taayehoq tik'ti' eere: “Teeruk' naab'al li b'iin ut li ha' nakaltesink”, cha'aq, a'an tz'aqal li propeet nekeraj rab'inkil; a'an tz'aqal xk'ulub' li tenamit a'in.

Li Yos naxye resil li kolb'a ib'

¹² Ok we chi xch'utub'ankil chixjunil li xtenamit laj Jakob; twaj tinxok li rela'eb' laj Israel. Tinch'utub'eb' jo' na'uxk reheb' li karneer sa' li koral, jo' na'uxk reheb' li ketomq sa' li pach'aya'; ut tz'aapixikaq rab'inkileb' xb'aan xk'ihaleb'.

¹³ K'amolb'ehaq li Qaawa' chiruheb', ut eb' a'an te'xik chirix ut te'nume'q sa' rokeb'aal li tenamit. Li Qaawa' a'an li x'awab'ejeb' ut taaxik chi uub'ej: aj k'amolb'ehaq chiruheb' chixjunil.