Miqueas 1 - Q'eqchi Bible

Rahilal sa' xb'een Samaria

¹ A'an a'in li raatin li Qaawa' li kixk'ul laj Mikeas, aj Moséret, ut li kiril sa' moy u chirix Samaria ut Jerusalén, naq laj Jotán, laj Ajás ut laj Esekías wankeb' chaq chi awab'ejink sa' xb'een Judá.

² Chejunilex li tenamit, ab'ihomaq li aatin a'in; chex'ab'inq chejunilex li wankex sa' li ruuchich'och'. Li Qaawa' taa'aatinaq chirix leemaak toj sa' chaq li xsantil ochoch.

³ K'ehomaq reetal, li Qaawa' taa'elq chaq sa' li xmuheb'aal, yooq chaq chi b'eek sa' xb'eeneb' li tzuul.

⁴ Te'uq'e'q eb' li tzuul rub'eleb' li roq, chanchanaqeb' li waakab' naq naha'o' chi xk'atq li xam; te'jachje'q eb' li taq'a jo' tawi' setb'ilaqeb' xb'aan xkawil oq junaq nima'.

⁵ Chixjunil a'in taak'ulmanq xb'aan naq eb' laj Jakob xe'xq'etq'eti rib' chiru li Yos, xb'aan naq xe'maakob'k eb' laj Israel. B'ar wank li xxe' li xq'etq'etil eb' laj Jakob? Ma ink'a' tab'i' sa' li tenamit Samaria? Ani wank re naq eb' laj Judá xe'ok chi xloq'oninkil eb' li jalanil yos? Ma ink'a' tab'i' sa' li tenamit Jerusalén?

⁶ Jo'kan naq li Qaawa' xye chi jo'ka'in: “Li tenamit Samaria tinkanab' chi po'lemil, jo' junaq na'ajej re rawb'al li uub'. Chixjunileb' li xpekul li tenamit tinpaji sa'eb' li taq'a ut tinkanab' chiru iq' li rub'elankil.

⁷ Chixjunileb' li xyiib'anb'il yos taaputz'imanq, ut taak'atmanq jo'nimal tamresinb'il rik'in li jo'maajo'il b'aanuhom. Tinjuk' chixjunileb' li yal k'oxlanb'il yos, xb'aan naq yiib'anb'ileb' rik'in xtojb'aleb' laj yumb'eet, ut a'an wi' chik tinkanab'eb' wi'!”.

Li xrahil xch'ool laj Mikeas

⁸ Xb'aan a'an tinyaab'aq chi q'axal ra sa' inch'ool; tinb'eeq chi maak'a' inxaab' ut chi t'ust'u, tintz'uyinq jo' nawo'te'ek laj xojb' ut tinyaab'aq jo' ral li warom.

⁹ Xb'aan naq li xrahilal Samaria maak'a' xb'anol: xwulak toj Judá, ut xo'xtaw ajwi' li rokeb'aal Jerusalén b'arwi' wankeb' lintenamit.

¹⁰ Meeseeraq'i a'in reheb' li wankeb' Gat, ut mex'ok chi yaab'ak. Tolk'osiiq eerib' sa' pojtz' xb'aan xrahil leech'ool aran Bet-Lehafrá.

¹¹ Eb' laj Safir yookeb' chi k'ame'k sa' ab'l tenamit, chi t'ust'u ut chi k'ajo'eb' xxutaan. Eb' laj Sahanán ink'a' neke'elk sa' li xtenamiteb'. Wankeb' sa rahil ch'oolejil eb' laj Bet-Hesel ut laa'ex xexkanaak chi maajun chik natenq'ank eere.

¹² Relik chi yaal naq jwal ra wankeb' laj Marot ut neke'royb'eni naq sa raj te'wanq, xb'aan naq li rahilal wank chik sa' xb'een Jerusalén: a' li Qaawa' xb'aanunk re.

¹³ B'ak'omaq leekawaay chiruheb' li b'eleb'aal ch'iich', ex aj Lakix. Aran xtiklaak li xmaakeb' laj Sión, aran xe'ok chi maakob'k eb' laj Israel.

¹⁴ Jo'kan naq elenqex chi junwaakaj sa' li tenamit Moséret-Gat. Li tenamit Aksib a'an taaluktesinq xch'ooleb' li awab'ej re Israel.

¹⁵ Li Qaawa' xye chi jo'ka'in: “Toj tintaqla junaq aj chapol eere laa'ex aj Maresá. Ut li xloq'al li tenamit Israel toxmuqe'q sa' li ochoch pek re Adulán.

¹⁶ At tenamit Jerusalén, b'es laawismal xb'aan li rahilal sa' xk'ab'a'eb' laawalal aak'ajol li nakaraheb'. Jo laajolom, kama' li xjolom li t'iw taakanaaq, xb'aan naq eb' laawalal aak'ajol te'k'ame'q sa' ab'l tenamit chi najt aawik'in”.