San Mateo 4 - Q'eqchi Bible

Li Jesus sa' li chaqich'och'

¹ Toja' naq kik'ame'k li Jesus xb'aan li Musiq'ej sa' li chaqich'och' re naq taayale'q raalenkil xb'aan laj tza.

² Ut naq ak xkuy xsa' chiru ka'k'aal kutan ut ka'k'aal q'oqyink, kitz'okaak.

³ Toja' naq kijilok laj aalenel chi xk'atq ut kixye re: —Wi laa'at Ralal li Yos, ye naq eb' li pek a'in che'jaltesiiq cho'q wa.

⁴ A'ut li Jesus kichaq'ok ut kixye: —Tz'iib'anb'il sa' li Santil Hu naq moko ka'aj ta wi' rik'in wa yo'yooq li winq, rik'in aj b'an wi' chixjunil li aatin na'elk chi xtz'uumal re li Yos.

⁵ Toja' naq laj tza kixk'am li Jesus sa' li santil tenamit, koxxaqab' sa' ru'uj li rochoch li Yos

⁶ ut kixye re: —Wi laa'at Ralal li Yos, kut aawib' taq'a xb'aan naq tz'iib'anb'il sa' li Santil Hu: «Tixtaqlaheb' chaq li x'ánjel chawilb'al ut tate'xk'am sa' ruq'eb' re naq ink'a' tattichk'oq chiru pek».

⁷ Kichaq'ok li Jesus ut kixye: —Tz'iib'anb'il ajwi': «Maayal rix li Qaawa' laaYos».

⁸ Kik'ame'k wi' chik toj sa' xb'een jun li tzuul q'axal najt xteram, ut laj tza kilajxk'ut chiru li xwankilal ut li xch'ina'usal chixjunileb' li xninqal ru tenamit li wank sa' ruuchich'och',

⁹ kixye re: —Chixjunil a'in tink'e aawe, wi taahupub' aawib' chi woq ut tinaaloq'oni.

¹⁰ Toja' naq li Jesus kixye re: —Elen chiwu, at aj tza, xb'aan naq jo'ka'in tz'iib'anb'il sa' li Santil Hu: «A' li Qaawa' laaYos taaloq'oni ru ut ka'ajwi' chiru a'an tatpaab'anq».

¹¹ Toja' naq kikanab'aak xb'aan laj tza, ut sa' li honal a'an wankeb' ánjel ke'wulak rik'in ut ke'xtikib' k'anjelak chiru.

Xtiklajik li xk'anjel li Jesus

¹² Naq li Jesus kirab'i resil naq ak k'eeb'il chik laj Jwan sa' tz'alam, koho Galilea.

¹³ Kixkanab' Nazaret ut koxna'ajunq Kafarnaúm chire li palaw, sa' xch'och'eb' laj Sabulón ut laj Neftalí.

¹⁴ Chi jo'kan kitz'aqlok ru li xyehom li propeet Isaías:

¹⁵ “At xch'och'el laj Sabulón, at xch'och'el laj Neftalí, junpak'al li nima' Jordán, sa' xb'ehil li palaw, at Galilea reheb' li ink'a' neke'paab'ank!

¹⁶ Li tenamit li wankeb' chaq sa' li aak'ab' ke'ril jun xnimal ru saqenk, ut li wankeb' chaq sa' xq'oqyinkil li kamk jun li saqenk kikutano'k sa' xb'eeneb'”.

¹⁷ Chalen utan li Jesus kixtikib' xpuktesinkil li esilal a'in: “Cheyot' eech'ool chejal eek'a'uxl, xb'aan naq li xnimajwal wankilal li choxa ak nach' wank”, chan.

Kixb'oqeb' li xkaahib' xb'een tzolom

¹⁸ Ut naq yo chaq chi b'eek li Jesus chire li palaw re Galilea, kiril wiib'eb' li winq riitz'ineb' rib', a' laj Simón, aj Pedro nayeemank re, ut laj Andrés li riitz'in, yookeb' chi xkutb'al li xyooyeb' sa' li palaw xb'aan naq aj kareb'.

¹⁹ Ut kixye reheb': —Chineetaaqe ut tink'e naq eb' leeras eeriitz'in chik teesik' cho'q ruuchil li kar.

²⁰ Sa' junpaat ke'xkanab' li xyooyeb' ut ke'xtaaqe li Jesus.

²¹ Kib'eek chik kach'in ut kiril wi' chik wiib'eb' li winq riitz'ineb' rib', a' laj Santiago ralal laj Sebedeo ut laj Jwan li iitz'inb'ej, wankeb' sa' li jukub' rochb'eeneb' laj Sebedeo li xyuwa'eb', yookeb' chi xxiitinkil li xyooyeb'; ut kixb'oqeb'.

²² Ut eb' a'an chi junpaat ke'xkanab' li jukub' jo'wi' li xyuwa'eb', ut ke'xtaaqe.

Li Jesus natzolok ut nak'irtasink

²³ Li Jesus kixb'eeni chixjunil Galilea, yo chi xtzolb'aleb' sa'atqeb' li xch'utleb'aal kab'l. Naxpuktesi li xchaab'il esil li xnimajwal wankilal li xchoxa ut naxk'irtasi chixjunil li rahilal ut yajel sa' xyanqeb' li tenamit.

²⁴ Kiwulak resil li Jesus sa' chixjunil Siria: ut ke'xk'am chaq rik'in chixjunileb' li yaj, k'iila paay ruheb' li xyajel ut li xrahilal; ke'xk'ameb' ajwi' chaq li eechaninb'ileb' xb'aan laj tza, eb' li neke'pohonk xyajel, eb' li sik, ut kixk'irtasiheb'.

²⁵ Ut kitaaqeek xb'aaneb' li k'iila tenamit aj Galilea, aj Dekápolis, at Jerusalén, aj Judea jo' ajwi' xb'aaneb' li wankeb' junpak'al li nima' Jordán.