San Mateo 22 - Q'eqchi Bible

Li jaljookil ru aatin chirix xninq'ehinkil sumlaak

¹ Ki'ok wi' chik chi aatinak li Jesus ut kixye reheb' sa' jaljookil ru aatin:

² “Li xnimajwal wankilal li choxa chanchan jun li awab'ej li kixninq'ehi xsumlajik li ralal.

³ Kixtaqlaheb' li xmoos chi xb'oqb'aleb' li rula', a'ut eb' a'an ink'a' ke'raj chalk.

⁴ Toj kixtaqlaheb' jalan chik li xmoos: «Yehomaq reheb' li wula': Ak k'uub'k'u lintzekemq; eb' linwakax ut eb' linch'oolaninb'il xul ak xe'kamsiik. Ak kawresinb'il chixjunil. Kimqex chi xninq'ehinkil li sumlaak!».

⁵ A'ut eb' a'an ink'a' ke'raj rab'inkil ut koheb': wan koho sa' xk'al, wan koho chi yakok;

⁶ ut eb' li junch'ol chik ke'xchapeb' li xmoos li awab'ej, ke'xhob'eb' ut ke'xkamsiheb'.

⁷ “K'ajo' naq kijosq'o'k li awab'ej, ut kixtaqlaheb' laj puub' chi xsachb'aleb' laj kamsinel a'an ut xk'atb'al li xtenamiteb'.

⁸ Toja' naq kixye reheb' li xmoos: «Ak k'uub'k'u li ninq'e, ab'an eb' li wula' moko xk'ulub'eb' ta chalk.

⁹ Ayuqex b'i' sa'atqeb' li xaalib'e, ut jo'k'ihaleb' teetaw, b'oqomaqeb' chaq sa' li ninq'e».

¹⁰ Eb' a moosej a'an ke'elk sa'atqeb' li b'e, ke'xch'utub'eb' li jo'k'ihal ke'xtaw, jun chalikeb' li us jo'wi' li moko useb' ta. Ut kinujak xb'aaneb' li ula' li na'ajej wan wi' li kaxaar.

¹¹ “Naq ki'ok li awab'ej chi rilb'aleb' li rula', kiril jun li winq wank aran, ink'a' tiqto chi chaab'il jo' re xninq'ehinkil li sumlaak,

¹² ut kixye re: «At wamiiw, chanru naq xat-ok chaq arin chi ink'a' tiqtookat chi chaab'il jo' re xninq'ehinkil li sumlaak?». A'ut a'an ink'a' kichaq'ok.

¹³ Toja' naq li awab'ej kixye reheb' li xmoos: «B'ak'omaq li roq ruq' ut kutomaq chirix kab'l sa' li aak'ab'; aran taawanq li yaab'ak ut li k'uxuxink ruuch e».

¹⁴ Xb'aan naq naab'aleb' li b'oqb'ileb', ab'an ink'a' k'iheb' li sik'b'ileb' ru”.

Li toj cho'q re li awab'ej

¹⁵ Toja' naq eb' laj Pariseey koheb' ut ke'xch'utub' rib' chi xk'uub'ankil chan raj ru naq te'xchap li Jesus sa' aatin.

¹⁶ Ut ke'xtaqlaheb' li xtzolom rik'in, rochb'eeneb' li neke'okenk chirix laj Herodes, chi xyeeb'al: —At Tzolonel, naqanaw naq tz'aqal yaal nakat-aatinak; nakak'ut chi yaal li xb'e li Yos ut maak'a' nakawaj wi' anihaq, xb'aan naq moko sik'so ta ru li nakawaatina.

¹⁷ Ye b'i' qe k'aru nakak'oxla: Ma us xk'eeb'al li toj re li awab'ej, malaj ut ink'a'?

¹⁸ Ab'anan li Jesus ak naxnaw li xmaa'usilal li xch'ooleb'; jo'kan naq kixye: —Ex aj ka'pak'al u, k'a'ut naq nekeyal wix?

¹⁹ K'utomaq chiwu xtuminal li tojleb'. Eb' a'an ke'xk'ut chiru jun li tumin.

²⁰ Ut kixye reheb': —Ani aj jalam u a'in ut ani aj tz'iib'ahom wank chiru?

²¹ Ke'chaq'ok: —Re li awab'ej, chankeb'. Toja' naq li Jesus kixye reheb': —Q'ajsihomaq b'i' re li awab'ej li k'aru re li awab'ej, ut re li Yos li k'aru re li Yos.

²² Naq ke'rab'i a'in, ke'sachk xch'ool, ke'xkanab' ut koheb'.

Chirix li xwaklijikeb' chi yo'yo li kamenaq

²³ Sa' li kutan a'an wankeb' aj Saduseey ke'wulak rik'in li Jesus (eb' a'an neke'xye naq ink'a' te'wakliiq chi yo'yo eb' li kamenaq), ut ke'xpatz' re:

²⁴ —At Tzolonel, laj Moisés kixye: «Wi junaq taakamq chi maak'a' ralal xk'ajol, chik'ame'q wi' chik li rixaqil xb'aan li riitz'in re naq chiwanq ralal xk'ajol li asb'ej».

²⁵ Ke'wank sa' qayanq wuqub' chi winq riitz'ineb' rib'. Li xb'een kisumlaak ut, naq kikamk, ink'a' kixkanab' ralal xk'ajol; jo'kan naq kixkanab' li rixaqil re li riitz'in.

²⁶ Jo'kan ajwi' kik'ulmank rik'in li xkab' ut li rox, toj rik'in li xwuq.

²⁷ Chirix chik a'an kikamk ajwi' li ixq.

²⁸ Us b'i', sa' xwaklijikeb' chi yo'yo eb' li kamenaq, anihaq tz'aqal aj ixaqil li ixq a'an? Xb'aan naq chixjunileb' ke'ixaqilink re.

²⁹ Kichaq'ok li Jesus ut kixye reheb': —Tik sachenaqex xb'aan naq ink'a' neketaw ru li Santil Hu, chi moko neketaw ru li xwankil li Yos.

³⁰ Xb'aan naq sa' li xwaklijikeb' chi yo'yo li kamenaq ink'a' te'k'amoq li winq chi moko te'k'ame'q li ixq, jo'aqeb' b'an chik li ánjel sa' choxa.

³¹ Ut chirix li xwaklijikeb' chi yo'yo li kamenaq, ma ink'a' eerilom sa' li Santil Hu li kixye li Yos eere:

³² «Laa'in li xYos laj Abrahán, li xYos laj Isahak ut li xYos laj Jakob»? Maawa' xYos li kamenaqeb', xYos b'an li yo'yookeb'.

³³ Ut naq ke'rab'i a'in li tenamit, ke'sachk xch'ool rik'in li naxtzoleb' wi'.

Li xnimal ru chaq'rab'

³⁴ Naq eb' laj Pariseey ke'rab'i naq li Jesus kixtz'ap xsa' reheb' laj Saduseey, ke'xch'utub' rib',

³⁵ ut jun reheb' a'an kixpatz' re yal re xyalb'al rix:

³⁶ —At Tzolonel, b'ar wank tz'aqal li xnimal ru qataqlankil sa' li Chaq'rab'?

³⁷ Kixye li Jesus re: —Taara li Qaawa' laaYos chi anchal laach'ool, chi anchal laawaanm ut chi anchal laak'a'uxl.

³⁸ A'an li xb'een ut xnimal ru chaq'rab'.

³⁹ Li xkab' chanchan ajwi' a'an: «Taara laawas aawiitz'in jo' naq nakara aawib' laa'at».

⁴⁰ Sa' xb'eeneb' li wiib' chi chaq'rab' a'in k'ojob'anb'il chixjunil li Chaq'rab' ut eb' li Propeet.

Li Kriist a'an ralal ut xQaawa' laj David

⁴¹ Naq ch'utch'uukeb' laj Pariseey, li Jesus kixpatz' reheb':

⁴² —K'aru nekek'oxla chirix li Kriist? Ani aj alal? Ke'chaq'ok eb' a'an ut ke'xye: —Ralal laj David.

⁴³ Ut li Jesus kixye reheb': —Chan put ru naq laj David chi eek'asinb'il xb'aan li Musiq'ej kixye Qaawa' re? Xb'aan naq kixye chi jo'ka'in:

⁴⁴ «Kixye li Qaawa' re linQaawa': K'ojlan sa' linnim uq' toj reetal tink'e rub'el laawoq eb' li xik' neke'ilok aawe».

⁴⁵ Wi laj David naxye Qaawa' re, chan put ru naq ralalaq?

⁴⁶ Ut maa'ani chik kiruhank chi sumenk re; ut chalen sa' li kutan a'an maa'ani chik kikawuuk xch'ool chi patz'ok re.