San Mateo 21 - Q'eqchi Bible

Rokik li Jesus Jerusalén

¹ Naq ke'wulak Betfagé chiru li tzuul Olivos, nach' rik'in Jerusalén, toja' naq li Jesus kixtaqla wiib'eb' li xtzolom

² ut kixye reheb': —Ayuqex sa' li k'aleb'aal wank cheru. Aran teetaw chi junpaat jun li b'uur b'ak'b'o, wank ral; hitomaq ut k'amomaqeb' chaq we.

³ Ut wi k'aru tixye chaq eere anihaq, cheyehaq: «Li Qaawa' taa'ajoq reheb', ab'anan hoon ajwi' tolxkanab'eb'».

⁴ A'in kik'ulmank re naq kitz'aqlok ru li xyehom li propeet:

⁵ “Yehomaq re li xrab'in Sión: «We' chaq aawik'in laaRey, tuulan ut k'ojk'o chaq chirix jun li b'uur ut chirix ral jun li xul aj iiqonel»”.

⁶ Koheb' li xtzolom ut ke'xb'aanu li ke'taqlaak wi' xb'aan li Jesus:

⁷ ke'xk'am chaq li b'uur rochb'een li ral, ke'xk'e li raq'eb' sa' xb'eeneb', ut aran kik'ojlaak li Jesus.

⁸ Li xnimal xk'ihaleb' li tenamit ke'xhelatq li raq'eb' sa' li b'e; wankeb' ke'q'ujuk chaq ruq' che' ut ke'xhelatq sa' li b'e.

⁹ Ut eb' li tenamit li yookeb' chi xik chi uub'ej ut li wankeb' chi ixb'ej japjookeb' re chi xyeeb'al: —Chinimaaq xloq'al li Ralal laj David! Usilaatinanb'il li xchalk sa' xk'ab'a' li Qaawa'! Chinimaaq xloq'al li Qaawa' taqe'q!

¹⁰ Naq kox'okaq li Jesus sa' li tenamit, chixjunileb' laj Jerusalén k'ajo' naq ke'ok xk'a'uxl, yookeb' chi xyeeb'al: —Ani a'in?

¹¹ Ut eb' li poyanam neke'xye: —A'an a'in li propeet Jesus aj Nazaret re Galilea.

Li Jesus kirisiheb' laj k'ay sa' rochoch li Yos

¹² Ki'ok li Jesus sa' rochoch li Yos ut kirisiheb' chixjunileb' li yookeb' chi k'ayink ut chi loq'ok chisa'. Kixpak'lusihatq li xmeexeb' laj jalol ru tumin ut li xna'ajeb' laj k'ay mukuy.

¹³ Ut kixye reheb': —Tz'iib'anb'il sa' li Santil Hu naq li wochoch rochochil li tijok tixk'ab'a'in; ut laa'ex yookex chi xk'eeb'al cho'q xna'ajeb' laj elq'.

¹⁴ Wankeb' mutz' ut yeq ke'jilok chi xk'atq, sa' rochoch li Yos, ut ke'k'irtasiik xb'aan.

¹⁵ Eb' li xb'eenil aj tij jo'wi' eb' laj tz'iib' naq ke'ril eb' li sachb'ach'oolej kixb'aanu ut ke'rab'i li kok'al japjookeb' re chi xyeeb'al sa' rochoch li Yos: “Chinimaaq xloq'al li Ralal laj David!”, ke'po'k xch'ool

¹⁶ ut ke'xye re li Jesus: —Ma nakawab'i li yookeb' chi xyeeb'al eb' a'in? —Hehe' -chan li Jesus reheb'-. Ma ink'a' eerilom sa' li Santil Hu: «Chi xtz'uumal reheb' li kok'al ut eb' li toj neke'tu'uk xakawresi laaloq'al»?

¹⁷ Ut kixkanab'eb': ki'elk sa' li tenamit ut koho Betania b'arwi' kixnumsi li q'oqyink.

Kichaqik jun toon chi iig

¹⁸ Naq yo chi sutq'iik eq'la sa' li tenamit, kichalk xtz'okajik.

¹⁹ Kiril jun toon chi iig wank chire b'e: kinach'ok rik'in, ab'anan junes xaq kixtaw. Toja' naq kixye re: —Mat-uuchink chik chi junajwa. Ut chi junpaat kichaqik li xche'el li iig.

²⁰ Naq ke'ril a'an, eb' li xtzolom ke'sachk xch'ool ut ke'xye: —K'a' naq sa' junpaat xchaqik li xche'el li iig?

²¹ Kichaq'ok li Jesus ut kixye reheb': —Relik chi yaal ninye eere: wi wanq leepaab'aal ut ink'a' taawiib'anq leech'ool, moko ka'aj ta wi' li xinb'aanu laa'in re li xche'el li iig teeb'aanu laa'ex, taaruuq aj b'an wi' teeye re li tzuul a'in: «Elen ut kut aawib' sa' palaw», ut taa'uxmanq raj.

²² Ut chixjunil li k'aru teetz'aama sa' li tijok chi anchal eepaab'aal, teek'ul.

Kipatz'e'k re li Jesus k'aru xwankil

²³ Kiwulak li Jesus sa' rochoch li Yos. Ut naq yo chi xtzolb'aleb' li tenamit, ke'wulak li xb'eenileb' aj tij ut eb' li xcheekel winqilaleb' li tenamit, ut ke'xye re: —K'aru aawankil naq nakab'aanu a'in? Ani xk'ehok aawe li wankilal a'in?

²⁴ Kichaq'ok li Jesus ut kixye reheb': —Inpatz'aq ajwi' eere laa'in. Wi tineesume, laa'in ajwi' tinye eere k'aru linwankil naq ninb'aanu a'in.

²⁵ Li xkub'iha' laj Jwan b'ar xchalk? Ma sa' choxa malaj rik'ineb' li winq? Ut eb' a'an ke'ok chi xk'oxlankil sa' xch'ooleb': “Wi tqaye naq sa' choxa, tixye qe: «K'a' put naq ink'a' xepaab'?».

²⁶ Ab'an wi tqaye naq rik'ineb' li winq, naqaxiwa ruheb' li tenamit xb'aan naq laj Jwan a'an propeet chiruheb' chixjunil”.

²⁷ Jo'kan naq ke'xsume li Jesus: —Ink'a' naqanaw, chankeb' re. Ut a'an ajwi' kixye reheb': —Jo'kan ajwi' laa'in ink'a' ninye eere k'aru linwankil naq ninb'aanu a'in.

Li jaljookil ru aatin chirix li wiib' chi alalb'ej

²⁸ Kixpatz' li Jesus reheb': —K'aru nekeye? Jun li winq kiwank wiib' li ralal. Kiwulak rik'in li xb'een ut kixye: «At walal, chatxikaq hoon chi k'anjelak sa' li wawimq».

²⁹ Ut a'an kixye: «Ink'a' nawaj». Ab'an moqon chik kiyot'e'k xch'ool ut koho.

³⁰ Kiwulak rik'in li jun chik ut jo'kan ajwi' kixye re. Ut a'an kixye: «Us, wa'; tinxik»; ut ink'a' koho.

³¹ Ani reheb' li wiib' chi alalb'ej xb'aanu li rajom li yuwa'b'ej? —A' li xb'een, chankeb'. Ut li Jesus kixye reheb': —Relik chi yaal ninye eere naq eb' laj titz'ol toj ut eb' laj yumb'eet te'wulaq xb'enwa cheru laa'ex sa' li xnimajwal awab'ejihom li Yos.

³² Xb'aan naq xk'ulunk eerik'in laj Jwan chi xk'utb'al xb'ehil li tiikilal ut ink'a' xepaab'; a'ut eb' laj titz'ol toj ut eb' laj yumb'eet xe'xpaab'. Ut laa'ex, chi moko naq xeril, xyot'e'k eech'ool re xpaab'ankil.

Li jaljookil ru aatin chirixeb' laj k'anjel aj kamsineleb'

³³ “Ab'ihomaq jun chik li jaljookil ru aatin. Jun li winq aj eechal junkab'al kiraw jun siir x'uub', kixsut chi koral, kixb'ek aran jun xyatz'leb'aal uub' ut kixyiib' jun li kab'l cho'q re laj k'aak'alenel; kixk'e chi to' reheb' aj k'alom ut koho chi najt.

³⁴ Naq kiwulak xq'ehil xchoqb'al li uub', kixtaqlaheb' li xmoos rik'ineb' laj k'alom re naq tixk'ul ru li rawimq.

³⁵ A'ut eb' laj k'alom ke'xchapeb' li moosej: ke'xteni li jun, li jun ke'xkamsi, ut li jun chik ke'xkuti chi pek.

³⁶ Kixtaqla wi' chik junch'oleb' li xmoos, naab'aleb' chik chiruheb' li ke'taqlaak xb'enwa; ut jo'kan ajwi' ke'xb'aanu reheb'.

³⁷ “Sa' roso'jik kixtaqla li ralal rik'ineb': «Li walal te'roxloq'i», chan sa' xch'ool.

³⁸ Ab'an eb' laj k'alom, naq ke'ril li alalb'ej, ke'xye chirib'ileb' rib': «A'an a'in li taa'eechaninq re li ch'och'. Kimqex, qakamsiiq ut qeechanihaq li xch'och'».

³⁹ Ke'xchap, ke'risi sa' li awimq ut ke'xkamsi.

⁴⁰ “Naq taak'ulunq laj eechal re li awimq, k'aru tixb'aanu reheb' aj k'alom a'an?”.

⁴¹ Ke'xye re: —Eb' a maa'us aj k'alom a'an tixsacheb' chi junajwa ut tixk'e chi to' li xch'och' reheb' jalan chik aj k'alom re naq te'xtoj ru li rawimq sa' xq'ehil.

⁴² Kixye li Jesus reheb': —Ma maajun wa eerilom sa' li Santil Hu: «Li pek li ke'xtz'eqtaana eb' laj kab'lanel, a'an li kikanaak cho'q xnimal ru pek sa' li kab'l. A' li Qaawa' kib'aanunk re a'in, ut a'an sachb'ach'oolej chiqu»?

⁴³ Jo'kan naq ninye eere naq li xnimajwal awab'ejihom li Yos taamaq'e'q cheru ut taak'ehe'q re jalan chik tenamit re naq taa'uuchinq chi us.

⁴⁵ Naq ke'rab'i eb' li jaljookil ru aatin li kixye li Jesus, eb' li Xb'eenil aj tij ut eb' laj Pariseey ke'xtaw ru naq chirixeb' a'an yo chi aatinak.

⁴⁶ Ut ke'xsik' chan raj ru xchapb'al, ab'an ke'xxiwa ruheb' li tenamit, xb'aan naq a'an propeet chiruheb'.