San Mateo 2 - Q'eqchi Bible

Li Jesus kulloq'oniiq xb'aaneb' laj q'e

¹ Li Jesus kiyo'laak aran Belén sa' xteepal Judea, naq laj Herodes wan chaq chi awab'ejil. Sa'eb' li kutan a'an wankeb' aj q'e ke'chalk chaq sa' releb'l saq'e, kole'okaq Jerusalén

² ut ke'xpatz': —B'ar wank li x'awab'ejeb' laj Judiiy xyo'laak? Xb'aan naq xqil chaq li xchahimal toj sa' releb'l saq'e ut xoochalk chi xloq'oninkil.

³ Naq kirab'i a'in li awab'ej Herodes, ki'ok xk'a'uxl; jo'kaneb' ajwi' chixjunileb' laj Jerusalén.

⁴ Toja' naq laj Herodes kixch'utub' chixjunileb' li xb'eenil aj tij ut eb' laj tz'iib' re li tenamit, ut kixpatz'i reheb' b'ar taayo'laaq li Kriist.

⁵ Ut eb' a'an ke'xye re: —Aran Belén, sa' xteepal Judea, xb'aan naq jo'kan tz'iib'anb'il chaq xb'aan li propeet:

⁶ «Ut laa'at Belén, xch'och'el laj Judá, moko jwal kach'inat ta sa' xyanqeb' li xninqal xteepaleb' laj Judá, xb'aan naq aawik'in taa'elq jun aj k'amol b'e li taab'eresinq re lintenamit Israel».

⁷ Toja' naq laj Herodes kixb'oqeb' laj q'e chi muqmu ut kirab'i rik'ineb' jo'q'e tz'aqal xk'utunk li chahim.

⁸ Kixtaqlaheb' Belén ut kixye: —Ayuqex, tz'ilomaq chaq rix chi us li k'uula'al ut, naq teetaw, tuleeye resil we re naq tinxik ajwi' laa'in ut tinloq'on chaq ru.

⁹ Naq eb' a'an ke'rab'i li kixye li awab'ej, koheb'. Toja' naq li chahim li ke'ril chaq sa' releb'l saq'e yo chi xik k'amol b'e chiruheb', toj reetal koxxaqliiq sa' xb'een li na'ajej wan wi' li k'uula'al.

¹⁰ Naq ke'ril li chahim, k'ajo' naq ke'saho'k sa' xch'ool!

¹¹ Koxe'okaq sa' li kab'l ut ke'ril li k'uula'al wank rik'in lix María li na'b'ej; ke'xwiq'ib' rib' ut ke'xloq'oni ru; ke'xte li xk'uuleb'aaleb' ut ke'xyeechi'i xmaatan: oor, pom ut miir.

¹² Chirix a'an kik'utb'esiik chiruheb' sa' xmatk'eb' naq ink'a' te'sutq'iiq rik'in laj Herodes; jo'kan naq ke'q'ajk sa' xtenamiteb' ut jalan chik b'e ke'xk'am.

Koheb' aran Ejiipt. Li xkamsinkileb' li k'uula'al

¹³ Tojo'aq relikeb' laj q'e naq li x'angel li Qaawa' kixk'ut rib' chiru laj José sa' xmatk' ut kixye re: “Waklin, k'am li k'uula'al rochb'een li xna', elelin ut ayu Ejiipt. Aran wanqat chaq toj laa'in toxinyehoq chaq aawe, xb'aan naq laj Herodes ok re xsik'b'al li k'uula'al re xkamsinkil”.

¹⁴ Naq kiwakliik laj José, kixk'am li k'uula'al rochb'een li xna' ut sa' ajwi' li q'oqyink a'an koho Ejiipt;

¹⁵ ut aran kiwank chaq toj reetal kikamk laj Herodes. Chi jo'kan kitz'aqlok ru li xyehom li Qaawa' chi xtz'uumal re li propeet: “Ejiipt kinb'oq chaq li walal”.

¹⁶ Naq laj Herodes kixk'e reetal naq kib'alaq'iik xb'aaneb' laj q'e, k'ajo' naq kichalk xjosq'il, ut kixtaqla xkamsinkil chixjunileb' li k'uula'al li toj maji'eb' aj wiib' chihab', eb' li wankatqeb' Belén ut sa' li xsutam, jo' chanru kixtz'il rix rik'ineb' laj q'e.

¹⁷ Toja' naq kitz'aqlok ru li xyehom li propeet Jeremías:

¹⁸ “Ki'ab'iik jun xyaab' kuxej aran Ramá, yaab'ak ut tz'uyink chi numtajenaq: a' lix Rakel li yo chi yaab'ak chirixeb' li xkok'al, ut ink'a' naraj q'unb'esiik xb'aan naq maak'a'eb' chik”.

Xsutq'ijikeb' aran Nazaret

¹⁹ Naq kikamk laj Herodes, li x'ánjel li Qaawa' kixk'ut rib' chiru laj José sa' xmatk' aran Ejiipt

²⁰ ut kixye re: “Waklin, k'am li k'uula'al rochb'een li xna' ut ayu Israel, xb'aan naq kamenaqeb' chik li xe'raj raj xkamsinkil li k'uula'al”.

²¹ Kiwakliik laj José, kixk'am li k'uula'al rochb'een li xna' ut kox'okaq sa' xch'och'eb' laj Israel.

²² Ab'an naq kirab'i naq laj Arkelao wank chi awab'ejil Judea cho'q reeqaj laj Herodes li xyuwa', kixiwak chi xik aran. Ut naq kik'utb'esiik chiru sa' xmatk', koho sa' xteepal Galilea.

²³ Ut koxkanaaq sa' jun li tenamit Nazaret xk'ab'a', re naq chitz'aqloq ru li xyehomeb' li propeet naq aj Nazaret tixk'ab'a'in.