San Mateo 17 - Q'eqchi Bible

Kilemtz'uno'k xjunxaqalil li Jesus

¹ Waqib'aq kutan chik a'an, li Jesus kixb'oqeb' laj Pedro, laj Santiago ut laj Jwan li riitz'in, ut kixk'ameb' xjuneseb' sa' xb'een jun li tzuul najt xteram.

² Ut kilemtz'uno'k li xjunxaqalil chiruheb': li rilob'aal kilemtz'uno'k kama' li saq'e ut li raq' kisaqo'k kama' li saqenk.

³ Ut xaqaamileb' laj Moisés ut laj Elías chiruheb', yookeb' chi seeraq'ik rik'in li Jesus.

⁴ Kixtikib' aatinak laj Pedro ut kixye re li Jesus: —Qaawa', us toowanq arin. Wi taawaj, tinyiib' arin oxib' chi muheb'aal: jun cho'q aawe, jun cho'q re laj Moisés, jun chik cho'q re laj Elías.

⁵ Toj yo ajwi' chi aatinak laj Pedro, naq jun li choql nalemtz'unk kimuheelank reheb'. Aka' chik jun xyaab' kuxej kichalk sa' li choql ut kixye: “A'in li walal raaro inb'aan. Rik'in a'an nasaho'k inch'ool: a'an cherab'ihaq”.

⁶ Naq ke'rab'i a'in eb' li xtzolom, ke't'ane'k chi hupu ut k'ajo' naq ke'xiwak.

⁷ Li Jesus kijilok chi xk'atqeb', kixch'e'eb' ut kixye: —Xaqlinqex, mexxiwak!

⁸ Ut naq ke'xtaqsi li rilob'aaleb', maa'ani chik ke'ril ru, ka'aj chik li Jesus xjunes.

Li xk'ulunik laj Elías

⁹ Naq yookeb' chaq chi kub'eek chiru tzuul, li Jesus kixchaq'rab'iheb' ut kixye: —Maa'ani aj e cheye li b'arwan xeril toj reetal naq li K'ajolb'ej taawakliiq chi yo'yo sa' xyanqeb' li kamenaq.

¹⁰ Ut eb' li xtzolom ke'xpatz' re: —K'a'ut naq eb' laj tz'iib' neke'xye naq xb'enwa tento taak'ulunq laj Elías?

¹¹ Li Jesus kixsumeheb' ut kixye: —Laj Elías tento taak'ulunq ut tolxk'e wi' chik chixjunil sa' xna'aj.

¹² A'ut laa'in ninye eere naq ak k'ulujenaq laj Elías ut ink'a' ke'xnaw ru, ke'xb'aanu b'an re jo'nimal li ke'raj. Jo'kan ajwi' li K'ajolb'ej rahilal tixk'ul sa' ruq'eb'.

¹³ Toja' naq eb' li xtzolom ke'xtaw ru naq chirix laj Jwan aj kub'sihomha' yo chi aatinak.

Li xk'irajik li ch'ina'al aaq xyajel

¹⁴ Naq ke'wulak wankeb' wi' li tenamit, jun li winq kinach'ok rik'in li Jesus, kolxwiq'ib' rib' chiru ut kixye:

¹⁵ —Qaawa', chawuxtaana ru li walal xb'aan naq napohonk xyajel ut ra wank; naab'al sut nat'ane'k sa' xam ut k'iila sut sa' ha'.

¹⁶ Xink'am rik'ineb' laatzolom, ab'an ink'a' xe'ruhank chi xk'irtasinkil.

¹⁷ Kichaq'ok li Jesus ut kixye: —Ex tenamit tik maak'a' eepaab'aal ut sachenaqex sa' li maak, jo' najtil chik tinwanq eerik'in? Jo' najtil chik texinkuy? K'amomaq chaq arin.

¹⁸ Li Jesus kixq'us chi kaw li maa'us aj musiq'ej ut ki'elk rik'in. Ut sa' ajwi' li honal a'an kik'iraak li ch'ina'al.

¹⁹ Toja' naq eb' li xtzolom li Jesus ke'jilok chi xk'atq ut ke'xye re xjunes: —K'a'ut naq laa'o ink'a' xooruhank chi risinkil?

²⁰ Kixye reheb': —Xb'aan naq kach'in leepaab'aal. Relik chi yaal ninye eere: wi ta li xnimal leepaab'aal a'an jo' jun t'orol chi mostaas, teeye raj re li tzuul a'in: «Elen arin ut q'axon le'», ut a'an taaq'axonq raj; ut maak'a' raj k'aru ink'a' truuq teeb'aanu.

Xkab' resil li xkamik li Jesus

²² Naq wotz yookeb' chi b'eek sa' xteepal Galilea, li Jesus kixye reheb' li xtzolom: —Li K'ajolb'ej taaq'axtesiiq sa' ruq'eb' li winq;

²³ taakamsiiq ut sa' rox li kutan taawakliiq chi yo'yo. Ut eb' a'an k'ajo' naq ke'raho'k xch'ool.

Li toj cho'q re li rochoch li Yos

²⁴ Naq ke'wulak Kafarnaúm, eb' laj titz'ol toj ke'nach'ok rik'in laj Pedro ut ke'xye re: —Ma ink'a' naxk'e li toj laj tzolol eere?

²⁵ —Naxk'e, chan laj Pedro. Ut naq kox'okaq laj Pedro sa' kab'l, li Jesus xb'enwa ki'aatinak ut kixye re: —K'aru nakak'oxla, a Simón? Li x'awab'ejeb' li ruuchich'och' aniheb' aj ik'in neke'k'uluk li toj? Ma rik'ineb' laj ral ch'och' malaj rik'ineb' laj ab'l tenamit?

²⁶ —Rik'ineb' laj ab'l tenamit, chan laj Pedro. Toja' naq li Jesus kixye re: —Jo'kan naq eb' laj ral ch'och' ink'a' neke'xk'e li toj.

²⁷ Ab'anan, re naq ink'a' taaluktaaq xch'ooleb' qab'aan, ayu sa' palaw, kut li luchb'aq, ut li kar li taa'elq xb'enwa, chap, te li re ut aran taataw jun tumin: xok ut k'e reheb' cho'q qatoj.