San Mateo 14 - Q'eqchi Bible

Li xkamik laj Jwan aj kub'sihomha'

¹ Sa'eb' li kutan a'an li rey Herodes kirab'i resil li nayeemank chirix li Jesus,

² ut kixye reheb' laj k'anjel chiru: “A'in a'an laj Jwan aj kub'sihomha'; xwakliik chaq chi yo'yo sa' xyanqeb' li kamenaq: jo'kan naq xnimal wankilal wank rik'in”.

³ Laj Herodes kixye a'in xb'aan naq a'an li kichapok re laj Jwan ut chi b'ak'b'o kixk'e sa' tz'alam, xmaak lix Herodías, li rixaqil laj Filipo li riitz'in.

⁴ Xb'aan naq xyehom laj Jwan re laj Herodes: “Ink'a' us naq taawanq aawik'in”.

⁵ Ut kiraj raj xkamsinkil, ab'an kixxiwaheb' ru li tenamit, xb'aan naq a'an propeet chiruheb'.

⁶ Sa' xninq'ehinkil xyo'lajik laj Herodes, li xko' lix Herodías kixajok sa' xyiheb' chixjunil ut kiwulak chiru laj Herodes:

⁷ jo'kan naq li rey kixyeechi'i re, rik'in jurament, xk'eeb'al li k'aru tixpatz' re.

⁸ Ut a'an, chi takchi'inb'il xb'aan li xna', kixye: —K'e we arin, sa' pulaat, li xjolom laj Jwan aj kub'sihomha'.

⁹ Kiraho'k xch'ool laj Herodes, ab'anan, xb'aan li jurament ut eb' li rula', kixtaqla xk'eeb'al re;

¹⁰ ut kixtaqla xch'otb'al li xjolom laj Jwan sa' tz'alam.

¹¹ Kik'ame'k chaq li xjolom sa' pulaat, kiq'axtesiik re li ixqa'al, ut a'an koxk'e re li xna'.

¹² Naq ke'wulak eb' li xtzolom laj Jwan, ke'xxok li kamenaq, koxe'xmuq ut koxe'xye resil re li Jesus.

Naq ke'wa'ak li oob' mil

¹³ Naq li Jesus kirab'i a'in, ki'elk aran sa' jukub' ut koho sa' jun junesal na'ajej najt rik'in chixjunileb'. Ka'ajwi' ke'rab'i a'in eb' li tenamit, ke'xtaaqe chi roqeb' chalen chaq sa' li xtenamiteb'.

¹⁴ Naq li Jesus ki'elk chaq sa' li jukub', kiril naab'aleb' li tenamit, kixtoq'ob'a ruheb' ut kixk'irtasiheb' li yaj wankeb' sa' xyanqeb'.

¹⁵ Naq ki'ewuuk, eb' li xtzolom ke'jilok chi xk'atq chi xyeeb'al re: —Li na'ajej a'in wank xjunes, ut ak xkoho li kutan. Chaq'rab'iheb' li tenamit re naq toxe'xloq' chaq xwaheb' sa'eb' li k'aleb'aal.

¹⁶ Ab'an li Jesus kixsumeheb' ut kixye: —Moko tojo' ta sa naq te'xik; k'ehomaqeb' b'an chi wa'ak laa'ex.

¹⁷ Ut eb' a'an ke'xye re: —Maak'a' wank qe arin, ka'ajwi' oob' chi wa ut wiib' li kar.

¹⁸ Li Jesus kixye: —K'amomaq chaq.

¹⁹ Ut kixtaqlaheb' chi hilank li tenamit sa' li pach'aya', kixchap li oob' chi wa ut li wiib' chi kar, kixtaqsi li rilob'aal sa' choxa, kiyoxink ut kixjachi li wa; kixk'e reheb' li xtzolom, ut eb' li xtzolom ke'xjek'i reheb' li tenamit.

²⁰ Ke'wa'ak chixjunileb' toj reetal ke'k'ojlaak xch'ool; ut ke'xxok li rela' li wa: kab'laju chakach nujenaqeb' chi wa.

²¹ Eb' li ke'wa'ak wankeb' tana oob' mil chi winq, ink'a' k'eeb'ileb' sa' ajl li ixq jo'wi' eb' li kok'al.

Li Jesus kib'eek chiru li palaw

²² Tikto kixtaqlaheb' li xtzolom sa' li jukub' re naq te'xik junpak'al li ha', ut a'an toj tixchaq'rab'iheb' wan li tenamit.

²³ Ut naq ak xchaq'rab'iheb' li tenamit, kitaqe'k chiru tzuul chi tijok xjunes. Naq ki'ok li q'oqyink, wan chaq aran xjunes.

²⁴ Ab'an li jukub' ak xnajto'k chi us rik'in li ch'och', kaw na'eek'asiik xb'aan li xkaw oq li ha', xb'aan naq sa' xsak'om iq' yookeb' chi xik.

²⁵ Ak saqewk chik re, koho li Jesus chi xtawb'aleb', yo chi b'eek chiru li palaw.

²⁶ Ut eb' li xtzolom, naq ke'ril chi b'eek chiru li palaw, ke'sachk xch'ool ut ke'xjap re chi xyeeb'al, chi k'ajo'eb' xxiw, naq a'an jun anum.

²⁷ Ab'anan li Jesus tikto kiraatinaheb' ut kixye: —Kawaq eech'ool: laa'inin! Mexxiwak.

²⁸ Kichaq'ok laj Pedro ut kixye: —Qaawa', wi laa'at, taqlahin chi xik aawik'in chiru li ha'.

²⁹ —Kim, chan li Jesus re. Ki'elk laj Pedro sa' li jukub', ki'ok chi b'eek chiru li ha' ut koho wan wi' li Jesus.

³⁰ Ab'anan, naq kiril li kawil iq', kixiwak ut, naq ki'ok chi sub'e'k, kixjap re: —Qaawa', chinaakol, chan re.

³¹ Li Jesus tikto kixye' li ruq', kixchap ut kixye re: —Kach'in laapaab'aal, at winq. K'a'ut naq xwiib'ank laach'ool?

³² Toja' naq ke'taqe'k sa' li jukub' ut ch'anaamil li iq'.

³³ Eb' li wankeb' sa' li jukub' ke'xwiq'ib' rib' chi xloq'oninkil ut ke'xye: —Relik chi yaal naq Ralalat li Yos.

³⁴ Ut naq ke'wulak junpak'al li palaw, koxe'okaq chi ch'och'el, sa' xteepal Genesaret.

³⁵ Eb' li winq li wankeb' aran tikto ke'xnaw ru li Jesus, ke'xpuktesi resil yalaq b'ar sa' chixjunil li na'ajej a'an, ut ke'xk'am chaq chixjunileb' li yaj rik'in.

³⁶ Ke'xtz'aama chiru naq ka'aj taxaq re li raq' te'xch'e'; ut li jo'k'ihal ke'ch'e'ok re, ke'k'iraje'k.