San Marcos 16 - Q'eqchi Bible

Li xwaklijik chi yo'yo li Jesus

¹ Naq kinume'k li sábado, lix María aj Magdala, lix María xna' laj Santiago, ut li xSalomé ke'xloq' sununkil b'an re naq toxe'xyul chirix li kamenaq.

² Toj eq'la chi us, sa' li xb'een kutan re li xamaan, ak xhik'e'k, koheb' wan wi' li muqleb'aal,

³ yookeb' chi xyeeb'al chirib'ileb' rib': —Ani xaq taatolk'osinq chiqu li pek wank chire li muqleb'aal?

⁴ Ut naq ke'xtaqsi li rilob'aaleb', ke'xk'e reetal naq ak tolk'osinb'il chik li pek; ut a'an q'axal nim.

⁵ Ke'ok sa' li muqleb'aal ut ke'ril jun li saaj al k'ojk'o aran sa' xnim uq'eb', tiqto rik'in saqi jut-aq'; ut ke'xiwak.

⁶ Ut a'an kixye reheb': —Mexxiwak. Li Jesus aj Nazaret nekesik', a' li kik'ehe'k chiru krus. Xwakliik chi yo'yo, maa'ani chik arin. Wahi' li na'ajej b'arwi' xjilib'aak.

⁷ Ayuqex anaqwan, yehomaq chaq reheb' li xtzolom jo'wi' re laj Pedro naq k'amolb'e cheru toj Galilea; aran toxeeril ru jo' kixye eere.

⁸ Eb' a'an ke'elk sa' li muqleb'aal sa' aanil, xb'aan naq neke'siksotk ut sachsookeb' xna'leb'; ut maa'ani ke'raatina sa' b'e xb'aan xxiweb'.

Li Jesus kixk'ut rib' chiruheb' li xtzolom

⁹ [Li Jesus kiwakliik chi yo'yo toj eq'la, sa' li xb'een kutan re li xamaan, ut kixk'ut rib' xb'enwa chiru lix María aj Magdala li kirisi wi' wuqub' chi maa'us aj musiq'ej.

¹⁰ A'an koho ut koxye resil reheb' li ke'ochb'eenink re li Jesus: eb' a'an yookeb' chi yaab'ak ut raheb' sa' xch'ool.

¹¹ Ab'anan, naq ke'rab'i naq yo'yo ut ki'ile'k xb'aan lix María, ink'a' ke'xpaab'.

¹² Moqon li Jesus kixk'ut rib' chi jalan chik rilob'aal chiruheb' wiib' li xtzolom, naq yookeb' chi xik sa' k'aleb'aal.

¹³ Eb' a'in koxe'xye resil reheb' li junch'ol chik, ut chi moko eb' a'an ke'paab'aak.

¹⁴ Sa' roso'jik kixk'ut rib' chiruheb' li Junlaju naq wankeb' sa' meex, ut kixkawilaatinaheb' xb'aan naq ink'a' neke'xpaab' ut kaweb' xjolom: ink'a' ke'xpaab' li ke'ilok ru naq waklijenaq wi' chik chi yo'yo.

¹⁵ Ut kixye reheb': “Ayuqex sa' chixjunil li ruuchich'och' ut chepuktesi li Chaab'il Esilal junsut junrub'el choxa.

¹⁶ Ani taapaab'anq ut taakub'eeq xha', a'an taakole'q; a'ut li ink'a' taapaab'anq, taateneb'aaq tojb'amaak sa' xb'een.

¹⁷ A'aneb' a'in li eetalil li taak'utunq rik'ineb' li te'paab'anq: sa' ink'ab'a' te'isinq maa'us aj musiq'ej, te'aatinaq sa' jalan aatinob'aal,

¹⁸ te'chapoq k'anti' rik'in ruq'eb' ut, wi te'ruk' k'a'aq re ru nakamsink, maak'a' te'xk'ul; te'xk'e li ruq' sa' xb'eeneb' li yaj ut te'k'iraaq”.

Li xtaqik li Jesus

¹⁹ Li Qaawa' Jesus, naq ak xraatinaheb', kitaqsiik sa' choxa ut kik'ojlaak sa' xnim uq' li Yos.

²⁰ Ut eb' a'an koheb', ke'xpuktesi li Chaab'il Esilal yalaq b'ar, yo chi k'anjelak li Qaawa' rochb'eeneb' jo'wi' chi xk'eeb'al xwankil li Aatin rik'in li eetalil neke'ochb'eenink re.]