Malaquías 4 - Q'eqchi Bible

Xk'ulunik li Qaawa' Yos

¹ Xyehom li Nimajwal Yos: “Chalk re li xnimal ru Kutan, q'axal tiq ru, jo' li tiqwal xam. Chixjunileb' li q'etq'et ut eb' laj b'aanuhom maa'usilal te'k'atq jo' li k'im; ut te'oso'q chi junwaakaj sa' li Kutan chalk re.

² A'ut laa'ex li nekex'oxloq'ink re link'ab'a', taalemtz'uno'q sa' eeb'een li xtiikilal linch'ool, ut sa' li xsaqenkil teetaw leekawilal. Toja' naq texpisk'oq xb'aan xsahil leech'ool jo'kaqex li saaj wakax naq neke'elk sa' li xna'ajeb'.

³ Teeyeq'i sa' leeroq eb' li ink'a' useb' xna'leb', ut jo'kaqeb' li cha sa' leeroq naq taawulaq li Kutan yookin xkawresinkil.

⁴ “Misachk sa' eech'ool li xchaq'rab' laj Moisés laj k'anjel chiwu, linchaq'rab' ut eb' li waatin li kink'e re sa' xb'een li tzuul Horeb, cho'q re chixjunileb' laj Israel.

⁵ “K'ehomaq reetal. Tintaqla eerik'in li propeet Elías rub'elaj li xKutankil li Qaawa', a'an xnimal ru kutan ut q'axal xiwajel ajwi'.

⁶ A'an taasutq'isinq re li xch'ooleb' li na'b'ej yuwa'b'ej rik'ineb' li ralal xk'ajoleb', ut li xch'ooleb' li alalb'ej rik'ineb' li xna' xyuwa'eb', re naq wanqeb' sa' tuqtuukilal. Chi jo'kan ink'a' tolinsach chi junajwa li ruuchich'och'”, chan li Nimajwal Yos.