San Lucas 22 - Q'eqchi Bible

VI. LI XRAHILAL UT XKAMIK LI JESUS (22,1—23,56) Ke'xk'uub' xchapb'al li Jesus

¹ Taanach'oq chaq li Paswa, li ninq'e nawa'e'k wi' li wa ink'a' yuub'il.

² Eb' li xb'eenil aj tij ut eb' laj tz'iib' yookeb' chi xsik'b'al chan raj ru naq te'xkamsi li Jesus xb'aan naq neke'xxiwa ruheb' li tenamit.

³ Toja' naq ki'ok laj tza rik'in laj Judas, aj Iskariote xk'ab'a', a'an jun reheb' li Kab'laju.

⁴ Koho chi aatinak rik'ineb' li xb'eenil aj tij ut eb' li xjolomileb' laj puub', chan raj ru naq tixq'axtesi reheb'.

⁵ Eb' a'an ke'saho'k sa' xch'ool ut ke'xk'uub' xk'eeb'al xtumin.

⁶ Laj Judas kixk'ul xch'ool ut ki'ok chi xsik'b'al jo'q'e tixk'e rib' xq'axtesinkil sa' ruq'eb' chi ink'a' te'xnaw eb' li tenamit.

Li Paswa

⁷ Kiwulak xkutankil nawa'e'k wi' li wa ink'a' yuub'il, naq namayejamank li karneer re li Paswa.

⁸ Li Jesus kixtaqla laj Pedro ut laj Jwan: —Ayuqex ut kawresihomaq chaq li Paswa re naq toxqatzeka, chan reheb'.

⁹ Eb' a'an ke'xye re: —B'ar taawaj toxqakawresi?

¹⁰ Kixye reheb': —Naq tex'ok sa' li tenamit, teek'ul jun li winq paqpooq chaq jun kuk chi ha' xb'aan. Taaqehomaq toj sa' li kab'l b'arwi' tox'okaq,

¹¹ ut cheyehaq re laj eechal kab'l: «B'ar wank li na'ajej tintzeka wi' li Paswa wochb'eeneb' lintzolom? chan chaq laj Tzolonel», cha'qex re.

¹² Ut a'an tixk'ut cheru, sa' xkab' xk'ojaril li kab'l, jun nimla na'ajej, ak wank chixjunil xhilob'aal. Aran texkawunq.

¹³ Koheb' ut koxe'xtaw jo' chanru kiyehe'k reheb' xb'aan li Jesus, ut ke'xkawresi li Paswa.

¹⁴ Naq kiwulak xhonalil, kik'ojlaak li Jesus sa' meex rochb'eeneb' li apóstol

¹⁵ ut kixye reheb': —K'ajo' naq xinrahi xtzekankil li Paswa a'in wochb'eenex, rub'elaj naq tink'ul li rahilal!

¹⁶ Xb'aan naq ninye eere naq ink'a' chik tintzeka toj reetal toxtz'aqloq ru sa' li xnimajwal awab'ejihom li Yos.

¹⁷ Toja' naq kixchap jun li uk'leb'-sek', kiyoxink ut kixye: —K'ulumaq a'in ut jek'ihomaq sa' eeyanq,

¹⁸ xb'aan naq ninye eere naq chalen anaqwan ink'a' chik twuk' li xya'al li uub' toj reetal taachalq li xnimajwal awab'ejihom li Yos.

Li xloq'laj Wa li Qaawa'

¹⁹ Chirix chik a'an kixchap li wa, kiyoxink, kixjachi ut kixk'e reheb': —A'an a'in lintz'ejwal q'axtesinb'il sa' eek'ab'a'. Cheb'aanu a'in re xnimankil injultikankil.

²⁰ Jo'kan ajwi' kixb'aanu rik'in li uk'leb'-sek', naq ak xraqe'k chi wa'ak: —Li sek' a'in a'an li Ak' Sumwank sa' xk'ab'a' linkik'el hoyb'il sa' eek'ab'a' laa'ex.

²¹ Waye' wik'in sa' xb'een li meex li ruq' li taaq'axtesinq we.

²² Xb'aan naq li K'ajolb'ej xik re jo' chanru kiteneb'aak sa' xb'een, ab'an ra chaalel sa' xb'een li winq a'an li taaq'axtesinq re!

²³ Toja' naq ke'ok chi xpatz'inkil chirib'ileb' rib' ani reheb' li taab'aanunq a'an.

Ani nim xwankil

²⁴ Kiwank ajwi' jun wech'ij ib' sa' xyanqeb', ani reheb' nimaq xwankil.

²⁵ Kixye ut li Jesus reheb': “Eb' li awab'ej reheb' li tenamit neke'numtaak sa' xb'eeneb'; ut eb' li neke'xk'e xwankil sa' xb'eeneb', aj b'aanuhom usilal nayeemank reheb'.

²⁶ Ab'anan moko jo'kanaq ta sa' eeyanq laa'ex: li nim xwankil sa' eeyanq kama'aq li jwal saaj, ut li najolomink kama'aq laj k'anjel.

²⁷ Xb'aan naq ani li q'axal nim xwankil? Ma li k'ojk'o sa' meex malaj li nak'anjelak chiru? Ma ink'a' tab'i' li k'ojk'o sa' meex? A'ut laa'in wankin sa' eeyanq jo' li yo chi k'anjelak.

²⁸ “Laa'ex xekuy wank wochb'een sa' li xyalb'al wix:

²⁹ ut laa'in texinxaqab' chi awab'ejink, jo' naq linYuwa' xinxxaqab' chi awab'ejink,

³⁰ re naq texwa'aq tex'uk'aq chire linmeex sa' linnimajwal wankilal ut texk'ojlaaq sa'eb' li k'ojarib'aal chi raqok aatin sa' xb'eeneb' li kab'laju xteepal aj Israel”.

Kixye resil naq laj Pedro taatik'ti'iq

³¹ Kixye ajwi' li Qaawa': —At Simón, at Simón! Chanawaq naq laj tza ak xpatz' chaq xwankil re naq texchiq'chiq'iiq kama' li triiw.

³² A'ut laa'in xintijok chawix re naq ink'a' taalajq laapaab'aal. Ut laa'at, naq tatsutq'iiq chaq wik'in, chakawub'resi xch'ooleb' laawas aawiitz'in.

³³ Kixye ut laj Pedro re: —At Qaawa', yo'oon wankin chi xik chawix toj sa' li tz'alam jo' ajwi' chi kamk!

³⁴ A'ut li Jesus kixye: —At Pedro, ninye aawe: toj maji'aq taayaab'aq hoon li tzo' kaxlan, akaq xaye ox sut naq ink'a' nakanaw wu.

³⁵ Ut kixye reheb' chixjunil: —Naq xexintaqla chi maak'a' eeb'ools, chi maak'a' eechampa, chi moko eexaab', ma wank k'aru xmajelo'k eere? Ke'chaq'ok ut ke'xye: —Maak'a'.

³⁶ Ut kixye reheb': —Anaqwan li ani wank xb'ools chixk'amaq; jo'kanaq ajwi' li ani wank xchampa. Ut li ani maak'a' xch'iich' xk'ayihaq li raq' ut xloq'aq junaq xch'iich'.

³⁷ Ninye eere naq tento taatz'aqloq ru wik'in li tz'iib'anb'il chaq sa' li Santil Hu: «Xe'xk'e sa' ajl sa' xyanqeb' li ink'a' useb' xch'ool». Xb'aan naq tz'aqlok re li tz'iib'anb'il chaq chiwix.

³⁸ Ke'xye eb' a'an: —At Qaawa', wiib' li ch'iich' wankeb' arin. Ut a'an kixye reheb': —Tz'aqal li xinye.

Li Jesus kitijok Getsemaní

³⁹ Naq li Jesus ki'elk aran, koho sa' xb'een li tzuul Olivos jo' k'aynaq xb'aanunkil, ut kitaaqeek xb'aaneb' li xtzolom.

⁴⁰ Naq kiwulak aran, kixye reheb': —Tijonqex re naq mext'ane'k sa' li aaleek.

⁴¹ Kirisi rib' sa' xyanqeb' ut koho jo' xnajtil nakute'k wi' junaq pek; kixwiq'ib' rib' chi tijok ut kixye:

⁴² “At inYuwa', wi taawaj, chawisi wik'in li sek' a'in; ab'an ink'a' chi'uxmanq li nawaj laa'in, a' b'an laawajom laa'at”.

⁴³ Toja' naq jun li ánjel kichalk chaq sa' choxa ut kixk'ut rib' chiru li Jesus, yo chi xk'eeb'al xkawub' xch'ool.

⁴⁴ Ut naq yo chi k'aachi'ik, kaw chik ki'ok chi tijok: li xtiqob' kama' ninqi tz'uqul chi kik' naq kit'ane'k sa' ch'och'.

⁴⁵ Sa' xraqik chi tijok kixaqliik li Jesus, koho wankeb' wi' li xtzolom ut kixtaweb' chi wark xb'aan xrahilaleb' xch'ool;

⁴⁶ ut kixye reheb': —K'a' naq yookex chi wark? Waklinqex ut tijonqex re naq mext'ane'k sa' li aaleek.

Kichape'k li Jesus

⁴⁷ Toj yo ajwi' chi aatinak naq xaqaamileb' li k'iila tenamit chiruheb', ut jun reheb' li Kab'laju, a' li nayeemank re laj Judas, k'amol b'e chaq chiruheb'. A'an kijilok chi xk'atq li Jesus chi xtz'ub'al ru. Ut li Jesus kixye re:

⁴⁸ —Judas, ma rik'in xtz'ub'al ru li K'ajolb'ej taaq'axtesi?

⁴⁹ Naq eb' li rochb'een li Jesus ke'ril li ok re chi xk'ulb'al, ke'xye re: —At Qaawa', ma took'ehoq chi ch'iich'?

⁵⁰ Ut jun reheb' kixtiq' li xmoos li xyuwa'il aj tij ut kixch'ot li xxik li wank sa' xnim.

⁵¹ Ki'aatinak li Jesus ut kixye: —Tz'aqalaq a'in, kanab'omaq! Ut kixch'e' li xxik ut kixk'irtasi.

⁵² Toja' naq kixye li Jesus reheb' li xb'eenil aj tij, eb' laj k'amol xb'eheb' laj k'aak'alehom rochoch li Yos jo' ajwi' eb' li cheekel winq li xe'chalk chi chapok re: —Ma jo' nachape'k junaq aj elq' naq xexchalk rik'in ch'iich' ut che'?

⁵³ Rajlal kutan xinwank chaq sa' eeyanq sa' rochoch li Yos, ut ink'a' xetaqsi chaq leeruq' chinchapb'al; ab'anan a'an a'in leehonal, naq nanumtaak xwankil li aak'ab'.

Kitik'ti'ik laj Pedro

⁵⁴ Toja' naq ke'xchap li Jesus, ke'xk'am ut ke'roksi sa' rochoch li xyuwa'il aj tij, ut laj Pedro najt rik'in naq yo chi xtaaqenkil.

⁵⁵ Ke'xtz'ab' xxameb' sa' xyi li neb'aal ut ke'k'ojlaak sa' komonil; kik'ojlaak ajwi' laj Pedro sa' xyanqeb'.

⁵⁶ Toja' naq jun li moos ixq ki'ilok re, naq k'ojk'o chire li xam; kixka'ya ut kixye: —A'in ajwi' rochb'een chaq li Jesus.

⁵⁷ Ab'an a'an kitik'ti'ik: —At ixq, ink'a' ninnaw ru a'an.

⁵⁸ Junpaataq chik a'an, ki'ile'k xb'aan jun li winq: —Laa'at ajwi' jun reheb' a'an, chu'uxk re. Ut laj Pedro kixye: —At winq, maawa'in!

⁵⁹ Jun honal tana xnumik a'an naq jun chik ki'ok chi yehok chi kaw: —Relik chi yaal naq a'in rochb'een ajwi' chaq li Jesus, xb'aan naq aj Galilea.

⁶⁰ Kixye laj Pedro: —At winq, ink'a' ninnaw k'aru yookat chi xyeeb'al. Ut chi junpaat, toj yo ajwi' chi aatinak laj Pedro, naq kiyaab'ak jun li tzo' kaxlan.

⁶¹ Li Qaawa' kixsutq'isi rib', kixka'ya laj Pedro, ut a'an kinaqk sa' xch'ool li kiyehe'k re xb'aan li Qaawa': “Toj maji'aq taayaab'aq hoon li tzo' kaxlan, akaq ox sut xaye naq ink'a' nakanaw wu”.

⁶² Ut ki'elk chirix kab'l: k'ajo' naq kiyot'e'k chi yaab'ak.

Li Jesus kihob'e'k ut kisak'e'k

⁶³ Eb' li winq li yookeb' chi k'aak'alenk re li Jesus ke'ok chi reetz'unkil ut chi xteninkil;

⁶⁴ ke'xtz'ap li xnaq' ru ut ke'xpatz' re: —Q'ehi: ani xsak'ok aawe?

⁶⁵ Ut naab'al chik k'a'aq re ru neke'xye re xmajewankil.

Li Jesus chiruheb' li xninqal ru aj raqol aatin

⁶⁶ Naq kikutano'k, ke'xch'utub' rib' li xcheekel winqilaleb' li tenamit, li xb'eenileb' aj tij ut eb' laj tz'iib'; ke'xk'am li Jesus sa' li xnimal raqleb'aal aatin

⁶⁷ ut ke'xye re: —Wi laa'at li Kriist, ye qe. Kichaq'ok a'an ut kixye reheb': —Wi tinye eere, moko tineepaab' ta;

⁶⁸ ut wi laa'in tinpatz'oq eere, ink'a' ajwi' tineesume.

⁶⁹ Chalen ut anaqwan li K'ajolb'ej taak'ojlaaq sa' xnim uq' li Nimajwal Yos.

⁷⁰ Toja' naq ke'xye chixjunileb': —Ma laa'at Ralal li Yos chi jo'kanan? Kixsumeheb': —Yaal xeye naq laa'inin, chan.

⁷¹ Ut eb' a'an ke'xye: —K'a' chik te'ok wi' qe li testiiw? Laa'o ajwi' xoo'ab'ink re li k'aru x'elk chi xtz'uumal re.