San Lucas 17 - Q'eqchi Bible

Li luktesink ch'oolej

¹ Kixye li Jesus reheb' li xtzolom: “Maachan naq ink'a' taachalq li luktesink ch'oolej, ab'anan ra chaalel sa' xb'een li ani taachalq wi' a'an.

² Jwal us raj cho'q re naq te'xk'e chi xkux junaq xpekul li ke'leb' ut te'xkut sa' palaw, chiru naq tixluktesi xch'ool junaq reheb' li kok' a'in.

³ Chek'ehaq reetal! “Wi laawas aawiitz'in taamaakob'q chawu, chaq'usaq; ut wi tixyot' xch'ool tixjal xk'a'uxl, chakuyaq xmaak.

Xkuyb'al qamaak chiqib'il qib'

⁴ Wi taamaakob'q chawu wuqub' sut chiru li jun kutan ut wuqub' sut taasutq'iiq chaq aawik'in chi xyeeb'al: «Nayot'e'k inch'ool», chakuyaq xmaak”.

Nim xwankil li paab'aal

⁵ Ke'xye eb' li apóstol re li Qaawa': —K'e xtz'aqob' li qapaab'aal.

⁶ Ut li Qaawa' kixye: —Wi ta li xnimal leepaab'aal a'an jo' jun t'orol chi mostaas, teeye raj re li sikomoor a'in: «Mich' aawib' ut xe'eni aawib' sa' palaw», ut a'an texpaab' raj.

K'anjelak chi kub'enaq qawankil

⁷ “Wi junaq eemoos yo chaq chi k'alek malaj chi ilok ketomq, ani eere laa'ex tixye re naq taasutq'iiq chaq sa' k'aleb'aal: «Numen chaq ut hilan sa' meex»?

⁸ Ma ink'a' tab'i' tixye re: «Chak'uub' b'ayaq intzekemq, chajal aawaq' ut k'anjelan chiwu naq yooqin chi wa'ak ut chi uk'ak; toj moqon chik tatwa'aq ut tat-uk'aq laa'at»?

⁹ Ma tento tab'i' tixyoxi re li xmoos rik'in naq xb'aanu li kitaqlaak wi'?

¹⁰ Jo'kanaqex ajwi' laa'ex: naq akaq xeb'aanu chixjunil li xextaqlaak wi', cheyehaq: «Laa'o yal aj kok' k'anjel. Ka'ajwi' xqab'aanu li tento sa' qab'een xb'aanunkil»”.

Li lajeeb' saqlep rixeb'

¹¹ Naq yo chi xik Jerusalén, li Jesus kinume'k sa' xyanq Samaria rik'in Galilea.

¹² Ut naq kox'okaq sa' jun li tenamit, lajeeb' chi winq saqlep rixeb' ke'elk chaq chi xk'ulb'al; ke'xaqliik chaq chi najt

¹³ ut ke'xye chi kaw xyaab'eb' xkux: —At Jesus, at aj Tzolonel, chawuxtaana qu!

¹⁴ Naq li Jesus kirileb', kixye reheb': —Ayuqex ut k'utomaq eerib' chiruheb' laj tij. Ut naq yookeb' chi xik, ke'k'irtasiik.

¹⁵ Jun reheb' a'an kiril naq xk'iraak; jo'kan naq kisutq'iik chaq, yo chi xnimankil ru li Yos chi kaw xyaab' xkux;

¹⁶ koxhupub' rib' chi roq li Jesus ut ki'ok chi xb'anyoxinkil chiru. Ut a'an jun aj Samaria.

¹⁷ Toja' naq li Jesus ki'ok chi xyeeb'al: —Ma ink'a' tab'i' xe'k'iraak sa' lajeeb'al? Ut li b'eleeb' chik, b'ar wankeb'?

¹⁸ Ma ka'ajwi' a'in li jalan xtenamit xsutq'iik chaq chi xnimankil ru li Yos?

¹⁹ Ut kixye re: —Xaqlin ut ayu: laapaab'aal xkolok aawe.

Xk'ulunik li xnimajwal awab'ejihom li Yos

²⁰ Naq eb' laj Pariseey ke'xpatz' re li Jesus jo'q'e taachalq li xnimajwal awab'ejihom li Yos, kixsumeheb' ut kixye: —Li xnimajwal awab'ejihom li Yos taachalq chi ink'a' taak'eemanq reetal,

²¹ chi moko te'xye: «Ilomaq arin» malaj: «Wank le'», xb'aan naq li xnimajwal awab'ejihom li Yos wank chik sa' eeyanq.

²² Ut kixye reheb' li xtzolom: —Taawulaq xq'ehil naq teerahi rilb'al yal ta junaq reheb' li xkutankil li K'ajolb'ej, ab'anan ink'a' teeril.

²³ Ut te'xye eere: «We' arin» malaj: «Ilomaq chaq le'», ab'anan mexxik chi moko chetaaqeheb'.

²⁴ Xb'aan naq jo' li raq'kaaq li narepb'ak, nalemtz'unk chaq sa' xmaril li choxa toj sa' li junpak'al chik, jo'kanaq ajwi' li K'ajolb'ej sa' li xkutankil.

²⁵ Ab'anan, xb'enwa tento naq tixk'ul naab'al rahilal ut taatz'eqtaanaaq xb'aaneb' li tenamit a'in.

²⁶ “Li k'aru kik'ulmank naq kiwank laj Noé, taak'ulmanq ajwi' sa' xkutankil li K'ajolb'ej.

²⁷ Yookeb' chaq chi wa'ak chi uk'ak, yookeb' chi k'amok ut chi k'ame'k toj sa' li kutan ki'ok wi' laj Noé sa' li jukub' kab'l ut kichalk li b'ut'iha', kixsach chixjunileb'.

²⁸ Jo'kan ajwi' kik'ulmank sa'eb' li kutan kiwank wi' laj Lot: yookeb' chaq chi wa'ak chi uk'ak, yookeb' chaq chi loq'ok chi k'ayink, chi awk ut chi kab'lak;

²⁹ ab'anan sa' li kutan naq ki'elk chaq laj Lot Sodoom, li Yos kixtaqla chaq xam ut asuupr toj sa' choxa ut kixsach chixjunileb'.

³⁰ Jo'kanaq ajwi' sa' li kutan tixk'ut wi' rib' li K'ajolb'ej.

³¹ “Sa' li kutan a'an li wanq chaq sa' xb'een li kab'l mikub'eek chi xxokb'al sa' rochoch li k'aru wank re; jo'kan ajwi' li wanq chaq sa' xk'al misutq'iik chaq.

³² Jultikaq eere li rixaqil laj Lot.

³³ Ani naraj xkolb'al li xyu'am, taasachq chiru; a'ut li taasachq li xyu'am chiru, a'an taareechani li yu'am.

³⁴ “Ninye eere naq sa' li q'oqyink a'an wiib' wanqeb' sa' jun chi ch'aat: jun taaxoke'q ut jun taakanab'aaq.

³⁵ Wiib'eb' chi ixq yooqeb' chi ke'ek chi laq'lo: jun taaxoke'q ut jun taakanab'aaq”.

³⁷ Ut eb' a'an ke'xye re: —B'ar taak'ulmanq a'an, at Qaawa'? Kixsumeheb': —B'ar wanq li kamenaq, aran te'xch'utub' rib' eb' li so'sol.