Levítico 7 - Q'eqchi Bible

K'ehok na'leb' chirix li mayej re xtojb'al rix li maak

¹ “Jwal loq' li mayej re xtojb'al rix li maak. A'an a'in li chaq'rab' chirix a'an:

² Li xul nayeechi'imank chirix li maak tento naq setb'ilaq li xkux sa' li na'ajej b'arwi' neke'kamsiik li k'atb'il mayej, ut li xkik'el tento xrachrachinkil chi xsutam li artal.

³ Tento xmayejankil chixjunil li xxeeb'ul li xul: li wank sa' li xye ut li lanlo wi' li xk'amk'ot,

⁴ xkab'ichal li kenq', li xeeb' lanlookeb' wi' ut li wank sa' xb'een li xtel, jo' ajwi' li xcha'al jwal q'un re li xch'och', li taa'isimanq rochb'eeneb' li xkenq'.

⁵ Chirix chik a'an laj tij tixk'at a'in sa' xb'een li artal, jo' k'atb'il mayej sa' xk'ab'a' li Qaawa'. A'an jun mayej chirix li maak,

⁶ ut chixjunileb' laj tij naru te'xtzeka, ab'an sa' junaq osob'tesinb'il na'ajej, xb'aan naq li k'a'aq re ru a'in, jwal loq'.

⁷ “Li mayej chirix li maak chanchan ajwi' li mayej re xtojb'al rix li maak, ut juntaq'eet li chaq'rab' chirix xkab'ichaleb': li namayejamank taakanaaq cho'q re laj tij li natz'aamank xkuyb'al li maak.

⁸ Jo'kan ajwi' li xtz'uumal li xul nayeechi'imank cho'q k'atb'il mayej xb'aan anihaq, taakanaaq cho'q re laj tij li taaq'axtesinq re li mayej.

⁹ Chixjunil li mayej k'aj joranb'il sa' oorn ut chixjunil li yiib'anb'il sa' k'il ut xartin, taakanaaq cho'q re laj tij li taaq'axtesinq li mayej.

¹⁰ Jo'kan ajwi' taa'uxmanq rik'in chixjunil li mayej k'aj, jo' li puq'b'il rik'in aseeyt ut li chaqi: taakanaaq cho'q reheb' chixjunileb' li ralal xk'ajol laj Aharón ut chi junqnaqik xk'ihal.

K'ehok na'leb' chirix li mayej re k'amok ib' sa' usilal rik'in li Yos

¹¹ “A'an a'in li chaq'rab' chirix li mayej re li k'amok ib' sa' usilal rik'in li Yos, a' li naq'axtesimank chiru li Qaawa':

¹² Wi li mayej naq'axtesimank re b'anyoxink, taayeechi'imanq ajwi' pixtun chi maak'a'aq xyu ut puq'b'ilaq rik'in aseeyt, jayil k'orech chi maak'a'aq xyu yulb'ilaq rik'in aseeyt, ut pixtun yiib'anb'ilaq rik'in chaab'il k'aj triiw, puq'b'ilaq rik'in aseeyt.

¹³ Rochb'een li mayej re b'anyoxink ut li k'amok ib' sa' usilal rik'in li Yos, taaq'axtesimanq ajwi' kaxlanwa wank xyu.

¹⁴ Chisa' chixjunil li mayej, taa'isimanq kach'inaq ut taaq'axtesimanq chiru li Qaawa' jo' loq'laj yeechi'om, ut a'an rehaq chik laj tij li taarachoq xkik'el li mayej re k'amok ib' sa' usilal.

¹⁵ “Li xtib'el li xul xyeechi'imank re b'anyoxink ut k'amok ib' sa' usilal rik'in li Yos, tento xtzekankil sa' ajwi' xkutankil li mayejak. Ink'a' naru xk'uulankil kach'inaq re li kutan jun chik.

¹⁶ Wi li xul taaq'axtesimanq yal re xpaab'ankil junaq yeechi'om re li Qaawa', malaj ut xb'aan naq x'alaak sa' xch'ool junaq poyanam xk'eeb'al, tento xtzekankil sa' xkutankil li mayejak, ut li taa'ela'anq, naru xtzekankil wulajaq.

¹⁷ Ab'anan wi sa' rox li kutan toj wank xtib'el li xul xmayejamank, tento xk'atb'al chixjunil.

¹⁸ Ut wi ani tixtzeka sa' rox li kutan xtib'el li mayej re k'amok ib' sa' usilal, li mayej a'an ink'a' k'ulb'ilaq chi moko k'eeb'ilaq sa' ajl, ut li tib' a'an tz'eqtaananb'ilaq chi junajwa. Ani taatzekanq re, taakanaaq li maak sa' xb'een.

¹⁹ “Wi wank k'aru natz'ajnink taanaq chiru li tib', ink'a' chik taaruuq xtzekankil; yal rehaq aj chik k'ate'k. “Chixjunileb' li ink'a' muxb'ileb', te'ruuq chi tiwok tib'.

²⁰ “Ab'anan wi junaq poyanam xmuxum rib' ut tixtzeka xtib'el li mayej re li k'amok ib' sa' usilal li ak q'axtesinb'il chiru li Qaawa', li poyanam a'an taa'isiiq sa' li xtenamit.

²¹ “Wi junaq poyanam tixch'e' k'a'aq re ru muxb'il (a' yaal k'aru xtz'ajnil poyanam malaj xtz'ajnil xul, malaj k'a'aq chik re ru ink'a' us) ut chirix a'an tixtzeka xtib'el li mayej re k'amok ib' sa' usilal li ak q'axtesinb'il re li Qaawa', li poyanam a'an tento taa'isiiq sa' li xtenamit”.

Li xeeb' ut li kik'

²² Li Qaawa' kiraatina laj Moisés ut kixye re:

²³ “Ye reheb' laj Israel chi jo'ka'in: Ink'a' naru te'xtzeka b'ayaq xxeeb'ul li b'ooyx, xxeeb'ul karneer malaj xxeeb'ul li chib'aat.

²⁴ Li xxeeb'ul li kamenaq xul ut li xxeeb'ul li xul xkamsiik xb'aan josq' aj xul naru te'xsik' b'ar te'xk'e, ab'an ink'a' te'xtzeka.

²⁵ “Yalaq ani taatzekanq re li xxeeb'ul li xul taayeechi'imanq chiru li Qaawa' cho'q k'atb'il mayej, taa'isiiq sa' li xtenamit.

²⁶ “Yalaq b'ar wanqex laa'ex, ink'a' taaruuq teetzeka xkik'el li xul narupupik chi moko k'a' chik chi xulil.

²⁷ Li poyanam li taatzekanq yalaq k'aru chi kik'ul, taa'isimanq sa' xyanqeb' li rech tenamitul”.

K'aru te'xk'ul eb' laj tij

²⁸ Li Qaawa' kiraatina laj Moisés ut kixye re:

²⁹ “Ye reheb' laj Israel naq ani taaraj xq'axtesinkil re li Qaawa' junaq xmayej re k'amok ib' sa' usilal, tento tixk'am li xyeechi'om chiru li Qaawa'.

³⁰ Rik'in ruq' tento tixk'am toj chiru li Qaawa' li k'atb'il mayej, li xmaqab' jo'wi' li xeeb' li lanlo wi' xmaqab' li xul, re xninq'ehinkil li xq'axtesinkil, chiru li Qaawa'.

³¹ Laj tij tixk'at li xeeb' sa' xb'een li artal, ab'an li re xmaqab' taakanaaq cho'q re laj Aharón ut eb' li ralal xk'ajol.

³² Li ra' li xul wank sa' xnim, a' li xmayejamank re k'amok ib' sa' usilal rik'in li Yos, taak'eemanq re laj tij jo' junaq tenq'aal.

³³ Eb' li a'ej a'in, rehaq laj tij li taayeechi'inq li xeeb' ut li kik' cho'q mayej re k'amok ib' sa' usilal,

³⁴ xb'aan naq li mayej re k'amok ib' sa' usilal, li neke'xk'e we eb' laj Israel, laa'in xinra li re xmaqab' cho'q chaab'il mayej, ut li ra' xink'uula jo' jun tenq'aal, ut xink'e re laj Aharón ut reheb' li ralal xk'ajol. A'an a'in jun chaq'rab' wank xwankil chi junelik”.

³⁵ Sa' xyanqeb' li mayej nayeechi'imank sa' xk'ab'a' li Qaawa', a'an a'in li xk'ihal re laj Aharón ut eb' li ralal xk'ajol, chalen sa' li kutan naq li Qaawa' kixxaqab'eb' cho'q aj tij chiru.

³⁶ Li Qaawa' kixye naq taak'eemanq reheb' a'in, chalen sa' li kutan kixxaqab'eb' wi' cho'q aj tij. A'in kixchaq'rab'i wi' eb' laj Israel, jo' jun chaq'rab' teneb'anb'il sa' xb'eeneb' chi junelik.

³⁷ A'an a'in li chaq'rab' chirix li k'atb'il mayej, li mayej k'aj, li mayej chirix li maak ut li xtojb'al rix li maak, li mayej re ok cho'q aj tij ut li mayej re k'amok ib' sa' usilal.

³⁸ Kixk'e li Qaawa' li chaq'rab' a'in re laj Moisés sa' xb'een li tzuul Sinaí, naq eb' laj Israel wankeb' sa' li chaqich'och' ut ke'chaq'rab'iik chi mayejak chiru.