Levítico 24 - Q'eqchi Bible

Li aseeyt re li saqenk sa' li Loq'laj Muheb'aal

¹ Li Qaawa' kiraatina laj Moisés ut kixye re:

² “Ye reheb' laj Israel naq te'xk'am chaq aawe tz'aqal aseeyt re oliiw, re naq junelik lochlooq xxamlel li saqenk,

³ sa' li Loq'laj Muheb'aal, junpak'al li t'ilkem li wank chi xk'atq li xLoq'laj Kaaxil li Sumwank. A' laj Aharón taak'uub'anq re, re naq junelik lochlooq chiru li Qaawa', chalen ewu toj eq'la. A'in jun chaq'rab' xaqxooq xwankil chi junelik cho'q eere laa'ex ut cho'q reheb' leeralal eek'ajol.

⁴ Laj Aharón taak'uub'anq re sa' xna'aj li saqenk, li yiib'anb'il rik'in oor, re naq junelik lochlooq chiru li Qaawa'.

Li wa li wank chiru li Qaawa'

⁵ “Xok li chaab'il k'aj triiw, ut chiru a'an chiq kab'lajuhaq k'uluj aj b'eleeb' liib'r raalal li junjunq,

⁶ ut k'e sa' xb'een li meex yiib'anb'il rik'in tz'aqal oor li wank chiru li Qaawa', wiib' tzol chi waqitq naq taak'e.

⁷ Sa' xb'een li junq tzol chi wa k'e li tz'aqal k'ajpom; a'an taak'anjelaq re li kaxlan wa jo' sununkil mayej, k'atb'il mayej re eepatz'b'al chiru li Qaawa'.

⁸ A'in tento taak'eemanq chiru li Qaawa' rajlal sábado, sa' xk'ab'a'eb' laj Israel, cho'q reetalil li junelik sumwank.

⁹ Li kaxlan wa a'an rehaq laj Aharón ut eb' li ralal xk'ajol, ut tento te'xwa' sa' junaq loq'laj na'ajej, xb'aan naq q'axal loq' li mayej a'an chiruheb' chixjunil li mayej nak'atmank cho'q re li Qaawa'. A'in jun chaq'rab' xaqxooq xwankil chi junelik”.

Li xtojb'al xmaakeb' laj q'etol xChaq'rab' li Yos

¹⁰ Sa' xyanqeb' laj Israel kiwank jun li winq, aj Israel li xna' ut aj Ejiipt li xyuwa'. Li xna' li winq, a'an xSelomit xk'ab'a', xrab'in laj Dibrí sa' xteepal Dan.

¹¹ Sa' jun kutan li winq a'in ut jun chik aj Israel ke'xwech'i rib' sa' li xmuheb'aaleb', ut li xyum li ixq aj Israel kixmajewa xk'ab'a' li Qaawa'. Toja' naq kik'ame'k chiru laj Moisés

¹² ut kik'ehe'k sa' tz'alam toj taayeemanq xb'aan li Qaawa' k'aru tento xb'aanunkil re.

¹³ Ut li Qaawa' kiraatina laj Moisés ut kixye re:

¹⁴ “Isihomaq sa' leena'aj li xmajewank we. Xk'ehaqeb' li ruq' sa' xb'een xjolom chixjunileb' li xe'ab'ink re ut xkamsiiqeb' chi pek xb'aaneb' li komonil.

¹⁵ Ut ye a'in reheb' laj Israel: Ani tixmajewa xk'ab'a' li Qaawa' li xYos, wank xmaak chi junelik.

¹⁶ Wi junaq tixtz'eqtaana xk'ab'a' li Qaawa', taakamsiiq chi pek xb'aaneb' li komonil. Us ta aj ab'l tenamit us ta aj ralch'och', ab'an wi xmajewa xk'ab'a' li Qaawa', taakamsiiq.

¹⁷ “Ani taakamsinq re junaq ras riitz'in, taateneb'aaq kamk sa' xb'een.

¹⁸ “Ani taakamsinq re junaq xul, tento tixk'e reeqaj chi yo'yo.

¹⁹ “Ani tixb'aanu rahilal re junaq ras riitz'in, jo'kan ajwi' taa'uxmanq re a'an:

²⁰ tixtoj rix li toqol rik'in toqol, sa' uhej rik'in sa' uhej, ruuch e rik'in ruuch e; taarahob'tesiiq ajwi' a'an jo' xb'aanu re li jun chik.

²¹ “Ani taakamsinq re junaq xul, tento tixk'e reeqaj. Ab'an li taakamsinq re junaq poyanam, taateneb'aaq kamk sa' xb'een.

²² “Li chaq'rab' li wank xwankil sa' xb'een laj ralch'ochl, a'an ajwi' li wanq xwankil sa' xb'een laj ab'l tenamit, xb'aan naq laa'in li Qaawa', leeYos”.

²³ Laj Moisés ki'aatinak rik'ineb' laj Israel, ut eb' a'in ke'risi chaq sa' li xmuheb'aaleb' li ani xmajewank re li Yos ut ke'xkamsi chi pek. Eb' laj Israel ke'xb'aanu jo' tz'aqal kiyehe'k re laj Moisés xb'aan li Qaawa'.