Levítico 15 - Q'eqchi Bible

Li chaq'rab' chirix li namuxuk re li winq

¹ Li Qaawa' kiraatina laj Moisés ut laj Aharón, ut kixye reheb':

² “Yehomaq a'in reheb' laj Israel: Naq junaq winq naxya'ali rib' li xtz'ejwal, li xpojkil muxb'ilaq ru.

³ Li xmuxb'al li winq xb'aan li xrahilal junelik wanq, us ta li xtz'ejwal narisi li xpojkil, us ta ink'a' narisi. Maak'a' chik naraj, xb'aan naq muxb'il chik ru.

⁴ “Chixjunil li warib' taayoklaaq wi' li winq a'an ut b'arwi' taahoye'q xpojkil li xtz'ejwal, a'an muxb'ilaq ru. “Yalaq k'aru sa' aj b'een taahilanq li winq a'an, muxb'ilaq ru.

⁵ “Yalaq ani taach'e'oq re li na'ajej b'arwi' xyoklaak li winq yaj, tento tixpuch' li raq' ut taa'atinq, ut muxb'il ru taakanaaq toj reetal taa'ok li q'oqyink.

⁶ “Yalaq ani taachunlaaq chiru li k'a'aq re ru b'arwi' xchunlaak li winq a'an, tento tixpuch' li raq' ut taa'atinq rik'in ha', ut muxb'il taakanaaq toj reetal taa'ok li q'oqyink.

⁷ “Yalaq ani taach'e'oq re li yaj, tento tixpuch' li raq' ut taa'atinq rik'in ha', ut muxb'il ru taakanaaq toj reetal taa'ok li q'oqyink.

⁸ “Wi li winq li na'elk xpojkel li xtz'ejwal taachuub'aq sa' xb'een junaq poyanam ink'a' muxb'il ru, a'in tento tixpuch' li raq' ut taa'atinq, ut muxb'il ru taakanaaq toj reetal taa'ok li q'oqyink.

⁹ “Yalaq k'aru chi chunleb'aalil li na'ok sa' xb'een kawaay, taakanaaq chi muxb'il ru wi sa' xb'een a'an xchunlaak junaq li naxya'ali rib' li xtz'ejwal.

¹⁰ “Yalaq ani taach'e'oq re li k'a'aq re ru b'arwi' ak xchunlaak li na'elk xsam xtz'ejwal, muxb'il ru taakanaaq toj reetal taa'ok li q'oqyink. “Yalaq ani taak'amoq re a k'a'aq re ru a'in, tento tixpuch' li raq' ut taa'atinq, ut taakanaaq chi muxb'il ru toj reetal taa'ok li q'oqyink.

¹¹ “Yalaq ani taach'e'eq xb'aan li yo chi elk xsam xtz'ejwal chi ink'a' ch'ajb'il li ruq', tento tixpuch' li raq' ut taa'atinq, ut muxb'il ru taakanaaq toj reetal taa'ok li q'oqyink.

¹² “Li ch'och' uk'al tixch'e' li winq na'elk xsam xtz'ejwal, tento xjorb'al, ut li k'a'aq re ru yiib'anb'il rik'in che' tento xch'ajb'al.

¹³ “Wi li winq a'an taak'iraaq, tento taaroyb'eni wuqub' kutan chik; tixpuch' li raq' ut taa'atinq rik'in ha' na'elk chaq sa' yo'leb'aal ha', ut chi jo'kan taakanaaq chi ch'ajob'resinb'il.

¹⁴ Sa' xwaqxaq li kutan tixchap chaq wiib'aq mukuy malaj wiib'aq k'ook'ob', ut taaxik sa' rokeb'aal li Loq'laj Muheb'aal chi xq'axtesinkileb' re laj tij chiru li Qaawa'.

¹⁵ Laj tij tixyeechi'iheb': jun cho'q mayej chirix li maak ut li jun chik cho'q k'atb'il mayej. Jo'ka'in naq chiru li Qaawa' laj tij tixch'ajob'resi li yaj li na'elk xsam xtz'ejwal.

¹⁶ “Wi junaq winq taahoye'q li riyajil, taa'atinq chixjunil li xjunxaqalil rik'in ha' ut muxb'il ru taakanaaq toj reetal taa'ok li q'oqyink.

¹⁷ “A' yaal k'a' chi t'ikrul malaj tz'uum taat'ane'q wi' b'ayaq li iyaj, tento xch'ajb'al rik'in ha' ut taakanaaq chi muxb'il ru toj reetal taa'ok li q'oqyink.

¹⁸ “Wi junaq winq ut junaq ixq te'wanq chirib'ileb' rib', chi xkab'ichaleb' tento te'atinq ut te'kanaaq chi muxb'il ru toj reetal taa'ok li q'oqyink.

Li chaq'rab' chirix li namuxuk re li ixq

¹⁹ “Wi junaq ixq tixk'ul li xpuch'unik, taakanaaq chi muxb'il ru chiru wuqub' kutan. “Yalaq ani taach'e'oq re, muxb'il ru taakanaaq toj reetal taa'ok li q'oqyink.

²⁰ “Yalaq k'aru taayoklaaq wi' li ixq a'an naq yooq chi xk'ulb'al li xpuch'unik, taakanaaq chi muxb'il ru. “Yalaq k'aru taachunlaaq wi', taakanaaq chi muxb'il ru.

²¹ “Yalaq ani taach'e'oq re li na'ajej b'arwi' xyoklaak li ixq a'an, tento tixpuch' li raq' ut taa'atinq, ut muxb'il ru taakanaaq toj reetal taa'ok li q'oqyink.

²² “Yalaq ani taach'e'oq re junaq k'a'aq re ru b'arwi' xchunlaak li ixq a'an, tento tixpuch' li raq' ut taa'atinq, ut taakanaaq chi muxb'il ru toj reetal taa'ok li q'oqyink.

²³ Ani tixch'e' li na'ajej b'arwi' xyoklaak malaj xchunlaak wi' li ixq a'an, taakanaaq chi muxb'il ru toj reetal taa'ok li q'oqyink.

²⁴ “Wi junaq winq taayoklaaq rik'in li ixq a'an, taatz'aqonq sa' li xmuxb'al li ixq ut taakanaaq chi muxb'il ru chiru wuqub' kutan. Jo'kan ajwi' li na'ajej b'arwi' li winq xyoklaak.

²⁵ “Naq junaq ixq tixk'ul li xpuch'unik chi toj maji' xq'ehil, wi yooq chi kub'eek li xkik'el chiru naab'al kutan malaj ut xb'ayk chi chaqik ru li xkub'ik li xkik'el, muxb'il ru taakanaaq li ixq naq yooq chi puch'uk, kama' tawi' naxk'ul tz'aqal sa' xkutankil li xpuch'unik rajlal po.

²⁶ “Chixjunil li warib' taayoklaaq wi' li ixq a'an ut yalaq k'aru sa' aj b'een taahilanq naq yooq xpuch'unik, muxb'ilaq ru, kama' tawi' naxk'ul tz'aqal sa' xkutankil li xpuch'unik rajlal po.

²⁷ “Yalaq ani taach'e'oq re a k'a'aq re ru a'in, taakanaaq chi muxb'il ru. Tento naq tixpuch' li raq' ut taa'atinq, ut muxb'il ru taakanaaq toj reetal taa'ok li q'oqyink.

²⁸ “Naq taaraqe'q chi kub'eek li xkik'el, tento taaroyb'eni wuqub' kutan ut taakanaaq chi ch'ajob'resinb'il.

²⁹ Sa' waqxaq li kutan tixchap wiib'aq mukuy malaj wiib'aq k'ook'ob' ut tixk'am rik'in laj tij sa' rokeb'aal li Loq'laj Muheb'aal.

³⁰ Laj tij tixyeechi'i li jun jo' mayej chirix li maak ut li jun chik cho'q k'atb'il mayej. Jo'ka'in naq chiru li Qaawa' laj tij tixch'ajob'resi li ixq a'an chiru li yajel kixk'ul,

³¹ ut chi jo'kan laa'ex teerisiheb' laj Israel rik'in li xtz'ajnileb', re naq ink'a' te'kamq chi xtz'ajninkil li na'ajej b'arwi' wankin sa' xyanqeb'”.

³² A'an a'in li chaq'rab' chirixeb' li winq neke'xya'ali rib' li xtz'ejwal malaj nahoye'k riyajileb', ut neke'kanaak chi muxb'ileb' ru.

³³ A'in ajwi' li chaq'rab' chirixeb' li ixq li wankeb' sa' xkutankil xpuch'unik rajlal po. Naraj naxye, a'an a'in li chaq'rab' chirix chixjunileb' li neke'yajerk rik'in naq nahoye'k xya'al xtz'ejwaleb' us ta winq us ta ixq, ut chirixeb' ajwi' li winq neke'yoklaak rik'in junaq ixq yook chi xk'ulb'al li xpuch'unik rajlal po.