Levítico 14 - Q'eqchi Bible

Xch'ajob'resinkil rib' li saqlep rix

¹ Li Qaawa' kiraatina laj Moisés ut kixye re:

² “A'an a'in li chaq'rab' chirix xch'ajob'resinkil junaq saqlep rix. Li yaj taak'utmanq chiru laj tij,

³ li taa'elq chaq chirix li xmuheb'aaleb' re rilb'al chi us. Wi laj tij taaril naq li yaj ak yo chi k'iraak,

⁴ tixtaqla xk'amb'al cho'q re li yaj wiib'aq li kok' xik'anel xul yo'yookeb', xkomoneb' li ink'a' muxb'ileb' ru. Taak'ame'q ajwi' chaq xche'el li yaw, jun kaqi t'ikr ut jun xmach palaw.

⁵ Tixtaqla xkamsinkil junaq reheb' li kok' xik'anel xul sa' junaq ch'och' uk'al wanq chaab'il ha' chisa'.

⁶ Chirix chik a'an tixk'am li ch'ina xik'anel xul chi yo'yo, li xche'el li yaw, li kaqi t'ikr ut li hisoop, ut tixt'aqresi chixjunil a'in rochb'een li ch'ina xik'anel xul yo'yo, tixt'aqresi sa' xkik'el li xik'anel xul xkamsiik sa' li chaab'il ha'.

⁷ Toja' naq wuqub' sut tixkirkiri sa' kik' li ani taach'ajob'resimanq chiru li saqlep, ut tixch'olob' naq a'an ink'a' chik muxb'il ru. Ut li yo'yookil xik'anel xul taa'ach'ab'aaq.

⁸ “Ani tixch'ajob'resi rib' tento tixpuch' li raq', tixch'aj rib' xjunes ut tixjo chixjunil li rismal, re naq taakanaaq chi ch'ajob'resinb'il. Chirix chik a'an taaruuq chi ok sa' li tenamit, ab'an toj wuqub' kutan chik tento twanq chirix li xmuheb'aal.

⁹ Sa' xwuq li kutan tixb'es li rismal xjolom, tixjo li xmach, li rismal wank sa' xb'een rilob'aal ut chixjunil sa' xtoon xkux; tixpuch' li raq' ut taa'atinq. Chi jo'kan taakanaaq chi ch'ajob'resinb'il.

¹⁰ Sa' xwaqxaq li kutan tixchap wiib'aq li karneer li maak'a'eb' xyajel ut junaq ixqi karneer aj jun chihab', li maak'a'aq reek'. Tixchap ajwi' kaalaju liib'r li k'aj triiw li jwal chaab'il, cho'q mayej k'aj, yoq'inb'il rik'in aseeyt.

¹¹ Laj tij li tb'aanunq re li ch'ajob'resink, tixk'e li poyanam li taach'ajob'resimanq, rochb'een chixjunil li k'aru re, sa' rokeb'aal li Loq'laj Muheb'aal, chiru li Qaawa'.

¹² Chirix a'an tixchap junaq reheb' li karneer ut tixyeechi'i rochb'een b'ayaq aseeyt, jo' jun mayej re xtojb'al rix li maak, ut tixq'axtesi chiru li Qaawa'.

¹³ Tento tixkamsi li karneer sa' li na'ajej b'arwi' na'uxk xsetb'al xkuxeb' li xul chirixeb' li maak ut re li k'atb'il mayej. Li mayej chirix li maak taakanaaq cho'q re laj tij; jo'kan ajwi' li mayej re xtojb'al rix li maak, xb'aan naq a'an q'axal loq'.

¹⁴ “Chirix chik a'an laj tij tixchap b'ayaq xkik'el li mayej chirix li maak ut tixyul chi xq'unal li xik li wank sa' xseeb'al li taach'ajob'resiiq; tixyul ajwi' chiru xna' ru'uj ruq' ut chiru li xna' ru'uj roq li wankeb' sa' xseeb'al.

¹⁵ Laj tij tixchap b'ayaq li aseeyt ut tixhoy sa' xtz'e uq';

¹⁶ tixtz'a junaq ru'uj ruq' li wank sa' xseeb'al chisa' li aseeyt wank sa' li xtz'e uq', ut rik'in a'an tixracharachi li aseeyt wuqub' sut chiru li Qaawa'.

¹⁷ Rik'in rela' li aseeyt taakanaaq sa' li ruq', laj tij tixchap b'ayaq re tixyul chi xq'unal li xik li wank sa' xseeb'al li taach'ajob'resiiq, ut tixyul ajwi' chiru xna' ru'uj ruq' ut chiru xna' ru'uj roq, li wankeb' sa' xseeb'al, sa' xb'een xkik'el li mayej chirix li maak.

¹⁸ Li rela' aseeyt tixyul sa' xjolom li ani taach'ajob'resiiq. Jo'ka'in naq laj tij tixtoj rix li xmaak li poyanam a'an.

¹⁹ Toja' naq laj tij tixq'axtesi li mayej chirix li maak, ut chi jo'kan taach'ajob'resimanq li muxb'il ru. Chirix chik a'an tixmayeja li xul li taayeechi'imanq jo' k'atb'il mayej.

²⁰ Tixyeechi'i sa' xb'een li artal rochb'een li k'aj triiw. Jo'ka'in naq laj tij tixtoj rix li xmaak li poyanam a'an, ut a'in ch'ajob'resinb'il taakanaaq.

²¹ “Wi neb'a' li yaj ut maak'a' xtumin re xloq'b'al eb' li mayej a'an, tixchap chaq junaq karneer cho'q xmayej re xtojb'al rix li maak ut tixq'axtesi jo' jun chaab'il mayej re taakuymanq li xmaak, rochb'eenaq kaahib' liib'r li k'aj triiw yoq'lenb'ilaq rik'in aseeyt, jo' jun mayej k'aj triiw, rochb'eenaq ajwi' waqib' liib'r chi aseeyt,

²² wiib'aq mukuy malaj wiib'aq k'ook'ob' (a' yaal naxye ma wank chiru ut malaj ink'a'): jun taamayejamanq chirix li maak ut li jun chik a'anaq k'atb'il mayej.

²³ Sa' xwaqxaq li kutan tixk'am chixjunil a'in rik'in laj tij, re li xch'ajob'resinkil, ut tixq'axtesi chiru li Qaawa', sa' rokeb'aal li Loq'laj Muheb'aal.

²⁴ Laj tij tixchap li karneer li taamayejamanq chirix li maak rochb'een b'ayaq li aseeyt, ut tixq'axtesi chiru li Qaawa' jo' jun chaab'il mayej.

²⁵ Tixset xkux li karneer taamayejamanq chirix li maak, tixchap b'ayaq li xkik'el li karneer ut tixyul chi rub'el li xxik li taach'ajob'resiiq, ut chiru ajwi' li xna' ru'uj ruq' ut chiru li xna' ru'uj roq, a' li wankeb' sa' xseeb'al.

²⁶ Chirix a'an tixk'e b'ayaq li aseeyt sa' li xtz'e uq',

²⁷ ut rik'in li ru'uj li xnim uq' tixrachrachi li aseeyt chiru li Qaawa' wuqub' sut.

²⁸ Tixyul ajwi' b'ayaq li aseeyt chi rub'el li xxik li taach'ajob'resiiq, chiru li ru'uj ruq' ut chiru li ru'uj roq a' li wankeb' sa' xseeb'al, naraj naxye b'arwi' xk'eemank li xkik'el li mayej chirix li maak.

²⁹ Ut li rela' li aseeyt laj tij tixyul sa' xjolom li taach'ajob'resiiq, re naq a'in tixk'ul xkuyb'al li xmaak chiru li Qaawa'.

³⁰ Toja' naq laj tij tixyeechi'i junaq mukuy malaj junaq k'ook'ob', a' yaal naxye li xyeechi'om li taach'ajob'resiiq:

³¹ jun taamayejamanq chirix li maak ut li jun chik cho'q k'atb'il mayej. A'an xtz'aqob' li mayej k'aj triiw. Jo'ka'in naq laj tij tixtoj rix li xmaak li poyanam taach'ajob'resiiq”.

³² A'an a'in li chaq'rab' chirixeb' li saqlep rixeb' ut ink'a' neke'ruhank xk'eeb'al junaq li xmayejeb' terto xtz'aq re xch'ajob'resinkileb'.

Xch'ajob'resinkil eb' li ochoch b'arwi' wank li saqlep

³³ Li Qaawa' kiraatina laj Moisés ut laj Aharón ut kixye reheb':

³⁴ “Naq akaq xex'ok sa' xteepal Kanahán, sa' li ch'och' tink'e cho'q eereechanihom, wi laa'in tintaqla li saqlep sa' junaq ochoch sa' leetenamit,

³⁵ laj eechal ochoch taaxik chi rilb'al laj tij ut tixye chaq re: «Chanchan naq wank jun li yajel sa' li wochoch», cha'aq.

³⁶ “Tikto laj tij tixtaqla xyamtesinkil xsa' li ochoch, toja' naq taa'ok sa' li kab'l, re naq ink'a' taamuxmanq chixjunil li k'aru wank chisa'. Chirix chik a'an taa'ok rilb'al li xwinqul li yajel.

³⁷ “Wi sa' rilb'al li ochoch laj tij tixk'e reetal naq li xtz'akul li kab'l wank tz'ajn chiru ut ch'am okenaq chisa' li tz'ak, raxrax malaj ut kaq na'ilok,

³⁸ taa'elq chaq sa' li ochoch ut tixye naq tz'aptz'ooq chiru wuqub'aq kutan.

³⁹ Sa' xwuq li kutan laj tij taaril wi' chik li yajel, ut wi ak xpuka rib' chiru xtz'akul li ochoch,

⁴⁰ tixtaqla risinkileb' li pek li wank tz'ajn chiruheb' ut te'xtz'eq chaq sa' junaq na'ajej b'arwi' natz'eqmank li tz'ajn, najt rik'in li tenamit.

⁴¹ Tixtaqla ajwi' xsaab'esinkil xsa' li ochoch, ut li tz'ajn taajokmanq tento taatz'eqmanq chaq sa' li na'ajej b'arwi' natz'eqmank chaq li mul, najt rik'in li tenamit.

⁴² Toja' naq taak'eemanq jalan chik li pek sa' xna'aj li ak x'isimank, ut ak' seb' sa' xna'aj li ak xjotzmank, re naq te'xyiib' wi' chik li ochoch.

⁴³ “Wi li yajel taachalq wi' chik sa' li ochoch li x'isimanje'k wi' li pek, naq ak xjotzmank xsa' li ochoch ut xk'eemank reeqaj li pek,

⁴⁴ laj tij taa'ok sa' li ochoch re rilb'al chi us. Wi xpukank wi' chik li yajel sa' li ochoch, naraj naxye naq a'an yib' aj saqlep ut tz'ajn ru li kab'l.

⁴⁵ Li ochoch a'an tento xjuk'b'al, ut chixjunil li xpekul, li xche'el ut li k'a'aq re ru tento xkutb'al chaq sa' junaq tz'ajnil na'ajej b'arwi' natz'eqmank li mul, najt rik'in li tenamit.

⁴⁶ Yalaq ani taa'ok sa' li ochoch chiruheb' li kutan yeeb'il xb'aan laj tij naq tz'aptz'ooq, a'an muxb'ilaq ru toj reetal taa'ok li q'oqyink.

⁴⁷ Yalaq ani taawa'aq malaj ut taawarq sa' li ochoch, tento tixpuch' li raq' re xch'ajob'resinkil rib'.

⁴⁸ “Ab'anan wi laj tij sa' rilb'al li ochoch tixk'e reetal naq ink'a' xpukank li yajel sa' li kab'l chalen naq xyiib'amank, tixch'olob' naq ch'ajob'resinb'il chik li ochoch, xb'aan naq li yajel ak xraqe'k chikan.

⁴⁹ Toja' naq tixchap wiib'aq li kok' tz'ik, b'ayaq li xche'el li yaw, kaqi t'ikr ut hisoop re xch'ajob'resinkil li ochoch.

⁵⁰ Tixkamsi junaq ch'ina tz'ik sa' xb'een junaq ch'och' uk'al wanq chaab'il ha' chisa'.

⁵¹ Chirix chik a'an tixchap li yaw, li hisoop, li kaqi t'ikr ut li yo'yookil ch'ina tz'ik; tixt'aqresiheb' sa' xkik'el li ch'ina tz'ik kamenaq jo' ajwi' sa' li chaab'il ha', toja' naq tixrachrachi wuqub' sutaq chiru li ochoch.

⁵² Jo'ka'in naq tixch'ajob'resi li ochoch rik'in xkik'el li ch'ina tz'ik rochb'een li chaab'il ha', li yo'yookil ch'ina tz'ik, li yaw, li hisoop ut li kaqi t'ikr.

⁵³ Ut sa' xraqik taarach'ab' li ch'ina tz'ik chirix li tenamit. Jo'ka'in naq laj tij tixtoj rix li maak sa' xk'ab'a' li kab'l, ut li kab'l taakanaaq chi ch'ajob'resinb'il”.

⁵⁴ A'an a'in chaq'rab' chirix chixjunil li saqlep ut li sal,

⁵⁵ xmo'il li saqlep chiru li aq'ej ut sa'eb' li ochoch,

⁵⁶ li siip, li kok' xox ut li tz'ajn,

⁵⁷ re naq taaruhanq xk'eeb'al reetal li muxb'il ut li ink'a' muxb'il. Toj arin nawulak xch'olob'ankil li na'leb' chirix li saqlep.