Levítico 10 - Q'eqchi Bible

Li maak ke'xb'aanu laj Nadab ut laj Abihú

¹ Laj Nadab ut laj Abihú, ralaleb' laj Aharón, ke'xchap junjunqeb' xsansaar, ke'xk'e xam ut pom chisa' ut ke'xyeechi'i chiru li Qaawa' jun li xam moko xk'ulub' ta li Yos. Ink'a' ke'xb'aanu jo' kixye li Qaawa'.

² Toja' naq ki'elk li xam wan wi' li Qaawa' ut ke'k'ate'k. Ut aran ke'kamk chiru li Qaawa'.

³ Chirix chik a'an laj Moisés kixye re laj Aharón: “A'an a'in li kixye li Qaawa': «Eb' li te'jiloq chaq wik'in tink'ut chiruheb' linsantilal, ut chiruheb' chixjunil laj Israel tink'ut linloq'al»”. Ut laj Aharón kikanaak chi maak'a' chik kixye.

⁴ Laj Moisés kixb'oq laj Misael ut laj Elsafán, ralaleb' laj Usiel, rikan laj Aharón, ut kixye reheb': “Kimqex laa'ex chi risinkileb' leekomon sa' li Loq'laj Na'ajej, ut k'amomaqeb' najt rik'ineb' li qamuheb'aal”.

⁵ Eb' a'an ke'nach'ok ut sa' ajwi' li xjut-aq'eb' ke'xk'ameb' li kamenaq chirix li na'ajej, jo' kixye laj Moisés.

Xchaq'rab'inkileb' laj tij

⁶ Chirix chik a'an laj Moisés kixye re laj Aharón ut reheb' li ralal, a' laj Elehasar ut laj Itamar: “Meehit leerismal chi moko teeq'ich leeraq' re xk'utb'al xrahil eech'ool. Mare anchal texkamq ut taachalq xjosq'il li Yos sa' xb'een li komonil. Li tento te'yaab'aq wi' leerech aj Israelil, a'an: naq xraho'k xch'ool li Qaawa' ut xtaqla chaq li xam.

⁷ Mexxik chi najt rik'in rokeb'aal li Loq'laj Muheb'aal, re naq ink'a' texkamq, xb'aan naq q'axtesinb'ilex re li Qaawa' sa' xk'ab'a' li loq'laj aseeyt”. Ut jo' ke'yehe'k re xb'aan laj Moisés, jo'kan ke'xb'aanu.

⁸ Li Qaawa' kiraatina wi' chik laj Aharón ut kixye re:

⁹ “Naq laa'at malaj eb' laawalal tex'ok sa' li Loq'laj Muheb'aal, ink'a' tex'uk'uq b'iin chi moko ha' nakaltesink. Mare wachik texkamq. A'an jun chaq'rab' li wank xwankil chi junelik, li tento teepaab' laa'ex ut eb' leeralal eek'ajol toj chaalel.

¹⁰ Chi jo'kan teenaw b'arwan li k'aru santob'resinb'il ut li ink'a' santob'resinb'il, li k'aru us ut li ink'a' us,

¹¹ ut texruhanq ajwi' xtzolb'aleb' laj Israel rik'in chixjunil li xchaq'rab' li Qaawa' xk'ehom re laj Moisés cho'q eere”.

¹² Chirix a'an laj Moisés kixye reheb' laj Aharón ut laj Elehasar jo'wi' laj Itamar, chi xkab'ichaleb' li ralal laj Aharón li toj wankeb' chiru: —Chapomaq li mayej k'aj, rela' li k'atb'il mayej, ut tzekahomaq chire li artal, chi maak'a'aq xyu, xb'aan naq a'an jwal loq'.

¹³ Tzekahomaq sa' junaq loq'laj na'ajej, xb'aan naq a'an li xextz'aqk laa'at ut eb' laawalal xkomon li mayej nak'atmank sa' xk'ab'a' li Qaawa'. A'an a'an li chaq'rab'inb'ilin wi'.

¹⁴ Ut li re xmaqab', li chaab'il mayej, ut li ra' (a'an li tenq'aal) tento naq teetzeka sa' junaq saab'esinb'il na'ajej, laa'at ut eb' laawalal aak'ajol malaj laarab'in, xb'aan naq a'an li textz'aq xkomon li mayej re k'amok ib' sa' usilal, xmayejeb' laj Israel.

¹⁵ Li ra', a' li tenq'aal, ut li re xmaqab', li chaab'il mayej, taak'ame'q chiru li Qaawa' ut taaq'axtesimanq jo' chaab'il mayej, rochb'een li xeeb' li nayeechi'imank chi k'ate'k. A'an a'in tattz'aq chi junelik, laa'at ut eb' laawalal aak'ajol, jo' xchaq'rab'ihom li Qaawa'.

¹⁶ Toja' naq laj Moisés kixpatz' b'ar wank li chib'aat namayejamank chirix li maak, ut kixk'e reetal naq ak k'atb'il chik. K'ajo' naq kijosq'o'k sa' xb'een laj Elehasar ut laj Itamar, ralaleb' laj Aharón li toj wankeb' chiru, ut kixye reheb':

¹⁷ —K'a'ut naq ink'a' xetzeka li mayej chirix li maak sa' junaq osob'tesinb'il na'ajej? Q'axal loq' li mayej a'an, ut li Qaawa' kixk'e eere re naq laa'ex tex'iiqaninq re xmaakeb' li komonil ut teetoj rix xmaakeb' chiru li Qaawa'.

¹⁸ Tento raj naq xetzeka li mayej sa' jun osob'tesinb'il na'ajej, jo' yeeb'il eere inb'aan, xb'aan naq li xkik'el ink'a' ki'oksimank toj chisa' li Santil Na'ajej.

¹⁹ Kichaq'ok laj Aharón ut kixye: —K'e reetal, anaqwan eb' a'an xe'xq'axtesi chiru li Qaawa' li xmayejeb' chirix li maak ut li xk'atb'il mayejeb', ut laa'at nakanaw chi us k'aru ink'ulum chaq. Wi ta laa'in xintzeka li mayej chirix li maak sa' li kutan a'in, ma xsaho'k tab'i' sa' xch'ool li Qaawa'?

²⁰ Naq kirab'i a'in laj Moisés, kik'ojlaak xch'ool.