Lamentaciones 5 - Q'eqchi Bible

Li ro' xrahil xch'ooleb' laj Jerusalén

¹ At Qaawa', chijultiko'q taxaq aawe li k'aru xqak'ul; chawil ut chak'e reetal li qahob'b'al xb'aaneb'.

² Anaqwan chixjunil li qeechanihom xq'axonk sa' ruq'eb' laj ab'l tenamit; ut eb' li qochoch, jalan chik x'eechanink re.

³ Maak'a' chik qayuwa', neb'a'yox xookanaak wi'; ut eb' li qana' xe'kanaak chi xmalka'anil.

⁴ Li ha' naquk', naqatoj chi terto xtz'aq; ut loq'b'il chik naqataw wi' li qasi'.

⁵ Jo' jun b'itche' xe'xk'e sa' qab'een; xootawaak, ut ink'a' nokoohe'xk'e chi hilank.

⁶ Naqapatz' qawa quk'a' re Ejiipt ut Asiria, a'eb' li xik' neke'ilok qe.

⁷ Eb' li qaxe' qatoon ke'maakob'k, ut maak'a'eb' chik anaqwan; ut sa' qab'een chik laa'o xkanaak li xmaakeb'.

⁸ Eb' li ke'wank chi munil, a'aneb' chik li neke'taqlank sa' qab'een; ut maajun na'ach'ab'ank qe sa' ruq'eb'.

⁹ Yal naqakawila qach'ool re xsik'b'al qawa; ut eb' laj rahob'tesinel wankeb' sa' junesal na'ajej.

¹⁰ Naxamnak li qatib'el jo' xtiqwal li xam, xb'aan xmay li tz'okaak.

¹¹ Sa' xteepal Judá ut Sión xe'xmux eb' li qixaqil ut eb' li tuq'ixq.

¹² Xe'xkamsi chi lukluukeb' eb' li xninqal ru winq; ut ink'a' xe'xk'e xloq'al eb' li ak tiixeb'.

¹³ Eb' li saaj winq xe'k'ehe'k chi reek'asinkil li ke'leb' pek; ut eb' li kok'al xe'k'utzq'iik xb'aan iiqank si'.

¹⁴ Eb' li ak cheekeb' ink'a' chik neke'k'ojlaak sa' rokeb'aal li tenamit, ut eb' li saaj al ink'a' chik neke'b'ichank.

¹⁵ Maak'a' chik xsahil qach'ool; yaab'ak chik xkanaak wi' li qason.

¹⁶ X'oso'k li qaloq'al; toq'ob' qu li xoomaakob'k!

¹⁷ Jo'kan naq ra qach'ool, ut yo chi moyk xsa' li qu.

¹⁸ Li tzuul Sión nakirnak aj chik; juneseb' aj chik li yak neke'b'eek aran.

¹⁹ A'ut laa'at, at Qaawa', nakat-awab'ejink chi junelik, xaqxo laawankil junq'e junq'e kutan.

²⁰ K'a' tab'i' naq toosachq sa' laach'ool chi junajwa? K'a' put naq toohaatz'eqtaana chiru chixjunil li qayu'am?

²¹ K'eho chi sutq'iik aawik'in, at Qaawa'; ak'ob'resi wi' chik li qayu'am jo' junxil.

²² Malaj ut xoohaatz'eqtaana chi junajwa? Ma junelik yooq xnimal laajosq'il sa' qab'een?