Lamentaciones 4 - Q'eqchi Bible

Li xka xrahil xch'ooleb' laj Jerusalén

¹ K'ajo' naq xq'eqo'k ru li oor, ink'a' chik nalemtz'unk li chaab'il oor! Cha'chookeb' yalaq b'ar sa' b'e li xloq'laj pekil li rochoch li Yos.

² Eb' li ralal xk'ajol Sión, li k'ajo' xloq'aleb' junxil jo' li chaab'il oor, chanchaneb' aj chik ch'och' sek' anaqwan, li yal xb'aanuhomeb' li winq.

³ A'atqeb' li ixqi xojb' neke'xk'e xtu' eb' li ral; ab'an lintenamit jalan chik li xk'a'uxl: neke'xkanab' sa' b'e eb' li k'uula'al, jo' naxb'aanu laj tak' ra' sa' chaqich'och'.

⁴ Li ru'uj raq' li k'uula'al toj natu'uk naxletz rib' sa' re xb'aan li chaqi'eel. Eb' li kok'al neke'xpatz' xwaheb', ab'an maa'ani nak'ehok reheb'.

⁵ Eb' li neke'tzekank chi chaab'il junxil, anaqwan kamkeb' re xb'aan tz'okaak sa'atqeb' li b'e; ut eb' li xe'k'iik chi tiqtookeb' rik'in chaab'il t'ikr, anaqwan sa' mul chik t'ant'ookeb'.

⁶ Li xmaak lintenamit naxq'ax ru li xmaa'usilal li tenamit Sodoom, li kisache'k ru chi junpaat chi maajun junaq kitenq'ank re.

⁷ Junxil eb' laj Jerusalén li sik'b'ileb' ru, saqsaqeb' jo' li ratz'amke, q'axal saqeb' wi' chik chiru li xya'al tu'; li xtib'eleb' jwal kaq jo' li kaqi q'ol, q'axal kaweb' rib' ut xchaq'al ruheb'.

⁸ Ab'an anaqwan chanchaneb' chik li ab'aq: ink'a' chik neke'nawmank ruheb' sa'eb' li b'e; li xtz'uumaleb' xletz rib' chiru li xb'aqeleb', chanchaneb' aj chik li chaqi si'.

⁹ Q'axal us xaq reheb' li xe'kamsiik chi q'esnal ch'iich' chiruheb' li xe'kamk xb'aan we'ej, xb'aan naq eb' a'in timil timil xe'kamk xb'aan xmajelal li xtzekemqeb'.

¹⁰ A'atqeb' ajwi' li chaab'il na'b'ej xe'xchiq li xkok'al cho'q xtzekemqeb': rahil tzekemq xkanaak wi' cho'q reheb' sa' li kutan ki'oso'k wi' lintenamit Jerusalén.

¹¹ Xnumtaak xjosq'il li Qaawa' sa' xb'een li ruuchich'och'; ut xtaqla chaq jun li xam sa' xb'een Sión toj reetal x'oso'k li rub'elankil li tenamit.

¹² Eb' li awab'ej ut li tenamit sa' ruuchich'och' maajun sut xe'xk'oxla naq laj rahob'tesinel ut eb' li xik' neke'ilok te'ok ta sa' li tenamit Jerusalén.

¹³ Xmaakeb' li propeet ut li xmaa'usilaleb' laj tij, sa' li tenamit Jerusalén xhoye'k xkik'el li maak'a'eb' xmaak.

¹⁴ Eb' li propeet ut eb' laj tij chanchaneb' li mutz' naq neke'b'eek sa' li tenamit; tz'ajn ruheb' xb'aan li kik', ut maajun naraj xch'e'b'al li raq'eb'.

¹⁵ “Elenqex, ayuqex -chu'uxk reheb'-; muxb'il ruheb', meech'e'eb'!”. “Aj b'eeneleb' ut yookeb' chi elelik. Maajoq'e naru te'wanq arin”, chankeb' li maak'a'eb' xpaab'aal.

¹⁶ Li Qaawa' xcha'cha'ink reheb', re naq ink'a' chik trileb' ru. Ink'a' xe'k'ehe'k xloq'al eb' laj tij, chi moko xe'toq'ob'aak ruheb' li cheekel winq.

¹⁷ Xqayo'oni qatenq'ankil toj reetal ink'a' chik xqakuy. Xqoyb'eni jun tenamit chi qakolb'al, ab'an ink'a' xk'ulunk.

¹⁸ K'aak'alenb'ilo chi us, ink'a' naru nokoo'elk sa' b'e. Xtz'aqlok ru li qakutan, xwulak xq'ehil li qakamik. Oso'k qe.

¹⁹ Eb' li xe'raj qachapb'al q'axal kaw xe'aanilak chiruheb' li t'iw. Xoohe'xsik'i sa' k'iche' ut xe'xk'e qara'lenkil sa' li chaqich'och'.

²⁰ Xe'xchap li na'awab'ejink qe, li k'ojk'o wi' qach'ool, li sik'b'il ru xb'aan li Yos. Sa' qach'ool laa'o naq rub'el xwankil toomuhenq sa' xyanqeb' li tenamit.

²¹ Saho'qat ut se'en, at tenamit Edom, laa'at li wankat sa' xteepal Us! Laa'at ajwi' taawuk' xsa' li xsek' li raqb'a aatin: tatkalaaq ut tatkanaaq chi t'ust'u.

²² At tenamit Sión, ak xatoj rix laamaak; li Qaawa' ink'a' chik tatxk'am sa' najtil tenamit. A'ut laa'at, Edom, li Yos taak'ajtesinq aawu, ut tixk'e chi kutankil chixjunil laamaa'usilal!