Lamentaciones 2 - Q'eqchi Bible

Li xkab' xrahil xch'ooleb' laj Jerusalén

¹ Toq'ob' xaq ru li tenamit Jerusalén! Naq li Qaawa' xchalk xjosq'il, x'ak'ab'ob'resi ru Sión, li tenamit k'ajo' xchaq'alil ru. Li Yos xsach xloq'al laj Israel, chanchan naq xtz'eq sa' ch'och', ut sa' xhonalil li xjosq'il ink'a' xjultiko'k re li na'ajej sik'b'il ru xb'aan.

² Li Qaawa' xjuk'i chixjunileb' li xmuheb'aal laj Jakob; ink'a' xril xtoq'ob'aal ruheb' li kawub'resinb'il tenamit wankeb' sa' xteepal Judá, ut xkuteb' chi ch'och'el. Xsach xwankil li awab'ej ut eb' li xninqal ru winq.

³ Xb'aan xxamlel li xjosq'il xkok'putz'i chixjunil li xkawilal laj Israel. Li Qaawa' xq'ajsi rib' chirix naq xooyalok rik'ineb' li xik' neke'ilok qe. Xloch jun xam k'ajo' xtiqwal, li xsach jo'nimal wank chi xsutam laj Jakob.

⁴ Jo' junaq aj xik'il uuchinel xteleb' li xsimaj ut xk'ut xkawilal li xtel. Jo' junaq aj sachonel kilajxsach chixjunil li ch'ina'us rilb'al. Jo' junaq xam xkut li xjosq'il sa' xb'eeneb' li xmuheb'aal Sión.

⁵ Chanchan naq xik' chik nokooril, li Qaawa' xsach ru laj Israel; xjuk'i chixjunileb' li xch'ina'usil ochoch, xsacheb' li kawub'resinb'il kab'l, ut xnujob'resi laj Judá chi rahil ch'oolej ut yaab'ak.

⁶ Jo' junaq aj elq' xweqi li xloq'laj ochoch ut kok'putz' xkanab' li na'ajej na'uxk wi' ch'utlaak. Ink'a' chik na'uxk ninq'ehik aran Sión chi moko neke'roxloq'i li sábado. Sa' xxamlel li xjosq'il li Qaawa' xk'e chi sache'k li awab'ej ut eb' laj tij.

⁷ Li Qaawa' xtz'eqtaana li x'artal ut xtz'eq chirix xch'ool li xsantil Na'aj. Xkanab' li xsuttz'akil li tenamit sa' ruq'eb' li xik' neke'ilok qe. K'ajo' li japok e sa' rochoch li Yos, chanchan wi' sa' jun ninq'e.

⁸ Li Qaawa' xraj xjuk'b'al li xsuttz'akil Sión, li xchaq'alil ru tenamit. Xraq aatin sa' xb'een ut xk'e xch'ool chi sachok, toj reetal xe'hame'k chixjunileb' li xtz'ak ut eb' li xkuut li tenamit, ut nakirnak xe'kanaak.

⁹ T'anjenaqeb' chik sa' ch'och' eb' li xtz'apb'al ut xnat'b'aleb' rix li okeb'aal: li Qaawa' xjuk'uk ut xjorok reheb'. Li awab'ej ut li xninqaleb' ru winq wankatqeb' chik sa' xyanqeb' li maak'a'eb' xpaab'aal. Maak'a' chik Chaq'rab', ut eb' li propeet maak'a' chik neke'rab'i rik'in li Yos.

¹⁰ Chunchuukeb' sa' ch'och' eb' li cheekel winq aj Sión, ch'anch'ookeb' aj chik; xe'xk'ehatq cha sa' xjolomeb' ut xe'xb'at rib' sa' saak. Ut eb' li tuq'ixq aj Jerusalén neke'xxulub' li xjolomeb' toj chiru ch'och'.

¹¹ Ink'a' chik nin'ilok xb'aan li yaab'ak, ink'a' chik ninkuy ut kamk we, xb'aan naq xsache'k lintenamit; eb' li kok'al ut eb' li toj yookeb' chi tu'uk neke'kamk sa' xyi li tenamit xb'aan li tz'okaak.

¹² Neke'xye eb' li kok'al reheb' li xna'eb': “Maak'a' chik qawa quk'a'”, chankeb'; ut neke't'anje'k sa' b'e chi neke'lub'ubnak, ut sa' ruq'eb' li xna'eb' na'elk xch'ooleb'.

¹³ Ani tatinjuntaq'eeta wi', at tenamit Jerusalén? K'a' ta wi' ru tinye aawe? Ani tawi' tkoloq aawe ut tixk'ojob' aach'ool, at Sión k'ajo' xchaq'alil aawu? Jwal nim laarahilal, kama' xnimal li palaw: ani truhanq chak'irtasinkil?

¹⁴ Eb' laapropeet junes b'alaq'il moy u xe'xseeraq'i aawe; ink'a' xe'xch'olob' laamaak re raj xjalb'al laak'a'uxl. Junes b'alaq'il moy u ut tik'ti' xe'xye aawe.

¹⁵ Eb' li neke'nume'k sa' b'e neke'xpoq'poq'i li ruq'eb' chawilb'al; neke'xuxb'ak ut neke'xb'anb'ani li xjolomeb' chirix Jerusalén: “B'ar wank li tenamit, li Chaq'al ru naxk'ab'a'in? B'ar wank li xSahilal chixjunil li ruuchich'och'?”, chankeb'.

¹⁶ Chixjunileb' li xik' neke'ilok aawe neke'aatinak chawix; neke'xuxb'ak ut neke'xk'uxuxi li ruuch reheb': “Xqasach ru -chankeb'-. A'an a'in li kutan yooko royb'eninkil. Ak xqataw, ak yooko rilb'al!”.

¹⁷ Li Qaawa' xb'aanu li k'uub'k'u xb'aan; xtz'aqlok ru li raatin yeeb'il chaq junxil. Li Yos xjuk'uk chi ink'a' xril xtoq'ob'aal aawu; ut xk'e li xik' na'ilok aawe chi xq'axb'al aawu ut chi saho'k sa' xch'ool.

¹⁸ Tijon chiru li Yos, at xnimal ru tenamit Sión. Kanab' chi elk li xya'al laawu jo' jun nima', chi q'eq ut chi kutan. Mathilank ut maakanab' yaab'ak!

¹⁹ Xaqlin, jap aawe chiru li q'oqyink chi kok'aq xsa'; chate laawaanm chiru li Qaawa', jo' li ha' yo chi xik. Ye' laawuq' chiru li Yos ut tijon chirixeb' laakok'al, li yookeb' chi kamk sa' b'e yalaq b'ar xb'aan li we'ej.

²⁰ Il, at Qaawa', ut k'e reetal: ani xarahob'tesi jun sutaq chi jo'ka'in? Eb' li na'b'ej okeb' re chi xtiwb'al li xk'uula'aleb'; eb' laj tij jo'wi' eb' li propeet kamkeb' re sa' laaloq'laj ochoch.

²¹ Eb' li kok'al ut eb' li cheekel winq neke't'anaxinje'k chi ch'och'el; eb' linsaaj al ut eb' li tuq'ixq xe'kamsije'k chi q'esnal ch'iich'. K'ajo' xakamsiheb' sa' xkutankil laajosq'il, ut ink'a' xawil xtoq'ob'aal ruheb'!

²² At Qaawa', yalaq b'ar xab'oqeb' chaq li rahilal, xe'chalje'k li ch'a'ajkilal chanchaneb' li b'oqb'ileb' chaq sa' junaq ninq'e. Sa' xkutankil li xjosq'il li Qaawa' maajun x'elelik chi moko xkole'k li xyu'am: eb' li xink'iiresiheb' ut li xinch'oolaniheb' xe'kamsije'k xb'aaneb' li xik' neke'ilok we.