Jueces 7 - Q'eqchi Bible

Laj Jedehón kixq'ax ruheb' laj Madián

¹ Kiwakliik toj eq'la laj Jedehón (li Yerubahal ajwi' nayeemank re) jo'wi' chixjunileb' li tenamit li rochb'eeneb', ut koxe'hilanq chi xk'atq En-Jarod. Li xmuheb'aaleb' laj Madián wankeb' chaq sa' xjayal releb'l iq', chi xtoon li tzuul Moré, sa' li taq'a ru.

² Kixye li Qaawa' re laj Jedehón: “Q'axal naab'aleb' li tenamit neke'ochb'eenink aawe. Wi tinq'axtesiheb' sa' ruq'eb' laj Madián, mare anchal te'xnimob'resi rib' laj Israel ut te'xye naq rik'in li xwankileb' xe'xkol rib'.

³ Jo'kan utan, ye reheb' li tenamit naq jo'k'ihaleb' yooqeb' xxiw ut neke'siksotk, che'sutq'iiq sa' rochocheb'”. Chi jo'kan laj Jedehón kixyal rixeb': wiib' xka'k'aal mil (22,000) koheb' ut lajeeb' mil (10,000) ke'kanaak.

⁴ Ab'an li Qaawa' kixye wi' chik re laj Jedehón: “Toj naab'aleb' laawochb'een. Taqlaheb' chire li nima' re naq teb'inyal rix. Aran tink'ut chawu aniheb' te'xik chawix ut aniheb' ink'a' te'xik”.

⁵ Toja' naq laj Jedehón kixtaqlaheb' li tenamit chire li nima' ut li Qaawa' kixye re: “Chixjunileb' li te'xreq' li ha' rik'in ru'uj raq'eb' jo' junaq tz'i', taajek'eb' rik'ineb' li te'xwiq'ib' rib' re uk'ak”, chan.

⁶ O'lajuk'aaleb' (300) ajwi' li ke'xlek li ha' chi ruq'eb' ut ke'xreq'. Ut eb' li junch'ol chik ke'xwiq'ib' rib' chi uk'ak.

⁷ Toja' naq li Qaawa' kixye re laj Jedehón: “Rik'ineb' li o'lajuk'aal a'in li xe'req'ok re li ha', texinkol laa'in ut tinq'axtesiheb' laj Madián sa' eeruq'. Ut eb' li junch'ol chik che'sutq'iiq sa' rochocheb'”, chan.

⁸ Jo'kan naq ka'aj chik li o'lajuk'aal ke'kanaak rochb'een laj Jedehón. A'in kixxok li k'aru taak'anjelaq reheb' li junch'ol chik jo'wi' li xxukub'eb', ut kixtaqlaheb' wi' chik sa' rochocheb'. Li xmuheb'aaleb' laj Israel wank taqe'q ut li xmuheb'aaleb' laj Madián wank sa' li taq'a ru.

⁹ Sa' ajwi' li q'oqyink a'an li Qaawa' kixye re laj Jedehón: “Waklin ut kub'en sa' xmuheb'aaleb' laj Madián, xb'aan naq xinq'axtesiheb' sa' laawuq'.

¹⁰ Ab'anan wi nakatxiwak chi kub'eek re yalok rik'ineb' laj Madián, ayu wan wi' li xmuheb'aaleb' aawochb'een laj Purá laamoos.

¹¹ Naq taawab'i li k'aru yooqeb' xyeeb'al, tkawuuq aach'ool chi yalok rik'ineb'”, chan li Yos. Toja' naq laj Jedehón rochb'een laj Purá li xmoos koheb' toj sa' xmaril li xmuheb'aaleb' laj Madián.

¹² Eb' laj Madián, eb' laj Amalek jo'eb' ajwi' chixjunileb' li wankeb' sa' xjayal releb'l saq'e xcha'cha'ihom rib'eb' sa' li taq'a, k'ajo'eb' xk'ihal kama' eb' laj saak', ut makach'in ajwi' xk'ihaleb' li xkameey, jo' tz'aqal xk'ihal li samahib' wank chire li palaw.

¹³ Naq laj Jedehón kiwulak aran, kirab'i naq jun li winq yo chi xseeraq'inkil li xmatk' re li jun chik chi jo'ka'in: “Ab'i, xwank jun linmatk': jun nimla wa re seb'aad yo chaq chi tolk'ok sa' li qana'aj, toj xwulak wan wi' jun li muheb'aal; xpik'a rib' chiru, kixpak'lusi ut kixt'an li muheb'aal”, chan.

¹⁴ Ut li rochb'een kixye re: “A'an reetalil li xch'iich' laj Jedehón, ralal laj Johás, laj Israel. Li Yos ak xq'axtesihom chixjunileb' laj Madián rochb'eeneb' li xmuheb'aaleb' sa' ruq' laj Jedehón”, chan.

¹⁵ Naq laj Jedehón kirab'i li xmatk' li winq ut li xyaalal, kixhupub' rib' chi xloq'oninkil li Yos. Chirix chik a'an kisutq'iik sa' xhilob'aaleb' laj Israel ut kixye: “Waklinqex xb'aan naq li Qaawa' ak xq'axtesihom sa' eeruq' li xmuheb'aaleb' laj Madián”, chan.

¹⁶ Tikto kixjek'eb' li o'lajuk'aal chi winq sa' oxib' ch'uut. Kixk'eheb' junjunq xxukub' sa' ruq'eb' chixjunileb' ut kixk'e ajwi' junjunq xkukeb' wank xam chisa'.

¹⁷ Ut kixye reheb': “Naq akaq xinwulak sa' xmaril li xna'ajeb' laj Madián, teek'e reetal li k'aru tinb'aanu laa'in ut teeb'aanu wi' chik eere.

¹⁸ Laa'in tinyaab'asi linxukub' wochb'eeneb' linch'uut, ut laa'ex ajwi' tento teereek'asi leere chi xsutam li xmuheb'aaleb' ut teejap eere chi xyeeb'al: «Sa' xk'ab'a' li Qaawa' ut sa' xk'ab'a' laj Jedehón!», cha'qex”, chan laj Jedehón.

¹⁹ Laj Jedehón ut eb' li o'k'aal (100) chi winq li koheb' chirix, ke'wulak sa' xmaril li xna'ajeb' laj Madián, tz'aqal sa' xq'ehil xtiklajik li xk'anjeleb' laj k'aak'alenel tuqtu q'oqyink. Toja' naq ke'xyaab'asi li xxukub'eb' ut ke'xjor li xkukeb' wank sa' ruq'eb'.

²⁰ Jo'kan ajwi' ke'xb'aanu li ox ch'uut chi aj puub': ke'xyaab'asiheb' li xukub' ut ke'xjoreb' li kuk. Sa' xtz'e uq'eb' wank li xxameb' ut sa' xnimeb' wank li xxukub'eb', ut ke'xjap re chi xyeeb'al: “Sa' xk'ab'a' li Qaawa' ut sa' xk'ab'a' laj Jedehón!”, chankeb'.

²¹ Ut ke'kanaak chi kulku sa' li xna'ajeb', chi xsutameb' laj Madián. Toja' naq chixjunileb' laj puub' re Madián ke'ajk ruheb' ut neke'ayaynakje'k naq ke'ok chi elelik.

²² Naq eb' li o'lajuk'aal chi winq yookeb' chi xyaab'asinkil li xxukub'eb', li Qaawa' kixb'aanu naq chixjunileb' laj Madián ke'ok chi xkamsinkil rib' chirib'ileb' rib' yalaq b'ar. Ut eb' laj puub' ke'elelik toj Bet-Hasitá, sa' li b'e naxik Sartán, toj sa' xnub'ajl Abel-Mejolá, sa' xjayal Tabat.

²³ Toja' naq eb' laj Israel aj Neftalí, aj Aser ut chixjunileb' laj Manasés ke'xjunaji rib' re xsik'inkil eb' laj Madián.

²⁴ Laj Jedehón kixtaqlaheb' aj esil sa' chixjunileb' li xtzuulul Efraín re xyeeb'al: “Kub'enqex chaq chi xk'ulb'aleb' laj Madián ut ramomaq xb'eheb' chire li nima' Jordán toj Bet-Bará”. Ut jo'kan ki'uxmank: chixjunileb' laj Efraín ke'xjunaji rib' ut ke'ramok li nima' Jordán toj Bet-Bará.

²⁵ Ke'xchap li wiib' aj k'amol xb'eheb' laj Madián, laj Oreb ut laj Seheb: laj Oreb ke'xkamsi sa' xb'een li Saqoonak re Oreb ut laj Seheb ke'xkamsi sa' li Yatz'leb'aal re laj Seheb. Chirix chik a'an ke'xsik'i eb' laj Madián ut ke'xk'am li xjolomeb' laj Oreb ut laj Seheb wan wi' laj Jedehón, toj junpak'al li nima' Jordán.