Jueces 6 - Q'eqchi Bible

Eb' laj Israel tawasinb'ileb' xb'aaneb' laj Madián

¹ Eb' laj Israel ke'ok wi' chik chi xb'aanunkil li ink'a' nawulak chiru li Qaawa'; jo'kan naq li Qaawa' kixq'axtesiheb' sa' ruq'eb' laj Madián chiru wuqub' chihab'.

² K'ajo' naq eb' laj Madián ke'xrahob'tesiheb' laj Israel! Jo'kan naq eb' a'in ke'xmuq chaq rib' sa' xyanqeb' li tzuul, sa'eb' li ochoch pek ut sa'eb' li xaqxookil b'ool, re xkolb'al rib'eb' chiruheb' laj Madián.

³ Rajlal naq eb' laj Israel neke'awk, neke'chalk eb' laj Madián rochb'eeneb' laj Amalek ut eb' li poyanam li wankeb' sa' xjayal releb'l saq'e; neke'chalk sa' xb'eeneb',

⁴ neke'hilank sa' li xch'och'eb' ut neke'xsach li rawimqeb' toj nawulak sa' li tenamit Gasa. Ink'a' neke'xkanab' xtzekemqeb' laj Israel, chi moko xkarneereb', xb'ooyxeb', chi moko xb'uureb'.

⁵ K'ajo'eb' xk'ihal laj Madián ut eb' li xkameey, chanchaneb' laj saak'! Rochb'eeneb' li xketomq ut li xmuheb'aaleb' neke'chalk sa' xb'eeneb' laj Israel, neke'okje'k sa' li xna'ajeb' ut neke'xsach ru chixjunil.

⁶ Chi jo'kan q'axal ke'neb'a'o'k laj Israel, ut ke'xyaab'a xk'ab'a' li Qaawa'.

⁷ Naq eb' laj Israel ke'xtz'aama chiru li Yos naq tixkoleb' sa' ruq'eb' laj Madián,

⁸ li Qaawa' kixtaqla jun li propeet rik'ineb' re xyeeb'al reheb': “Jo'ka'in xye li Qaawa', xYos laj Israel: «Laa'in kin'isink chaq eere Ejiipt b'arwi' kexwank chaq chi munil.

⁹ Kexinkol sa' ruq'eb' laj Ejiipt jo'wi' sa' ruq'eb' chixjunil li neke'rahob'tesink eere. Kiwaanilasiheb' cheru ut kink'e eere li xch'och'eb'.

¹⁰ Ut kinye eere: Laa'inin li Qaawa' leeYos. Meexiwak chiruheb' li xyoseb' laj Amor, b'arwi' wankex anaqwan. A'ut laa'ex ink'a' xepaab' li waatin»”.

Naq kib'oqe'k laj Jedehón

¹¹ Toja' naq kichalk li x'ánjel li Qaawa' ut kolk'ojlaaq rub'el li ji wank aran Ofrá, reechanihom laj Johás, xkomoneb' laj Abiéser. Laj Jedehón, ralal laj Johás, yo chi tenok triiw chi muqmu sa' xyatz'leb'aal li uub', re naq ink'a' taa'ile'q xb'aaneb' laj Madián.

¹² Li x'ánjel li Qaawa' kixk'ut rib' chiru ut kixye re: “Li Qaawa' wank aawik'in, at winq q'axal kaw aawib'”, chan.

¹³ Kichaq'ok laj Jedehón ut kixye: “Chinaakuy, at inQaawa'. Wi li Yos wank qik'in, k'a'ut naq yooko chi xk'ulb'al chixjunil a'in? B'ar wankeb' chixjunil li sachb'ach'oolej li neke'xseeraq'i qe eb' li qana' qayuwa' naq neke'xye: «Ma maawa' tab'i' li Qaawa' ki'isink chaq qe Ejiipt?», chankeb'. A'ut anaqwan li Qaawa' xooxkanab' qajunes ut xooxq'axtesi sa' ruq'eb' laj Madián”, chan laj Jedehón.

¹⁴ Toja' naq li Qaawa' kixsutq'isi rib' ut kixye re: “Ayu ut rik'in laametz'ew taakoleb' laj Israel sa' ruq'eb' laj Madián. Ma maawa' tab'i' laa'in li nintaqlank aawe?”, chan.

¹⁵ Kichaq'ok laj Jedehón ut kixye: “Chinaakuy, at inQaawa'. Chanru naq tinkoleb' li tenamit Israel? Linjunkab'al, a'an li jwal kach'in sa' xyanqeb' laj Manasés, ut laa'in xch'iip li xjunkab'al linyuwa'”.

¹⁶ Kixye li Qaawa' re: “Laa'in wanqin aawik'in ut laa'at taaq'axeb' ru laj Madián. Chanchanaqeb' jun chi winq naq taasacheb' ru”, chan.

¹⁷ Toja' naq laj Jedehón kixye: “Wi usilal xintaw chawu, k'ut junaq eetalil chiwu re naq tinnaw naq relik chi yaal laa'at li yookat chi aatinak wik'in.

¹⁸ B'aanu usilal, mat-elk wan arin toj reetal tinsutq'iiq chaq aawik'in. Tink'am chaq linmayej ut tinq'axtesi aawe”, chan. “Us -chan li Qaawa'-, tinkanaaq arin toj reetal tatsutq'iiq chaq”.

¹⁹ Laj Jedehón koho, koxkawresi chaq jun ch'ina chib'aat ut rik'in jun b'isok chi k'aj kixk'uub' wa ink'a' yuub'il. Kixk'e li tib' sa' jun ch'ina chakach, ut li xya'al kixk'e sa' jun li uk'al, ut kixk'am chixjunil rub'el li ji. Naq yo chi nach'ok,

²⁰ li x'ánjel li Qaawa' kixye re: “Chap li tib' ut li k'uluj ink'a' yuub'il, k'eheb' sa' xb'een li pek a'an ut hoy li xya'al sa' xb'een”, chan. Laj Jedehón kixb'aanu jo' kiyehe'k re.

²¹ Toja' naq li x'ánjel li Qaawa' kixch'e' li tib' ut li k'uluj rik'in ru'uj li xuq' li wank sa' ruq', ut sa' junpaat ki'elk chaq xam sa' li pek, kixk'at li tib' ut li k'uluj, ut li x'ánjel li Qaawa' sachaamil chiru.

²² Toja' naq laj Jedehón kixk'e reetal naq a'an pe' li x'ánjel li Qaawa', ut kixye re: “Toq'ob' wu, at inQaawa'! Xwil li x'ánjel li Qaawa' chi tz'aqal re ru!”, chan.

²³ Kichaq'ok li Qaawa' ut kixye: “Li tuqtuukilal chiwanq aawik'in. Matxiwak, moko tatkamq ta”, chan.

²⁴ Toja' naq laj Jedehón kixyiib' sa' li na'ajej a'an jun li artal cho'q re li Qaawa', ut li Qaawa'-Tuqtuukilal kixk'e cho'q xk'ab'a'. Li artal a'an toj wank anaqwan aran Ofrá, xtenamiteb' laj Abiéser.

²⁵ Sa' ajwi' li q'oqyink a'an li Qaawa' kixye re laj Jedehón: “Chap li xteelom wakax laayuwa', li wank wuqub' chihab' re. Taajuk' li x'artal laj Bahal li re laayuwa', ut taayok' li loq'laj che' li wank chi xk'atq.

²⁶ Chirix chik a'an, sa' xb'een li xaqxookil tzuul a'an, taayiib' chi chaab'il jun li artal cho'q re li Qaawa' laaYos. Taachap li teelom wakax ut taak'at jo' loq'laj mayej, chiru li xsi'ul li loq'laj che' xayok'”, chan.

²⁷ Toja' naq laj Jedehón kixsik' ruheb' lajeeb' chi winq sa' xyanqeb' laj k'anjel chiru ut kixb'aanu li kiyehe'k re xb'aan li Qaawa'. Ab'anan ink'a' kixb'aanu chi kutan, chi q'eq b'an kixb'aanu, xb'aan xxiw chiruheb' li xkomon ut li wankeb' sa' li tenamit a'an.

Naq laj Jedehón kixjuk' li x'artal laj Bahal

²⁸ Eq'la re li kutan jun chik, naq ke'wakliik eb' li wankeb' sa' li tenamit, juk'b'il chik li x'artal laj Bahal, yok'b'il chik li loq'laj che' li wank chi xk'atq, ut li teelom wakax ak yeechi'inb'il chik cho'q k'atb'il mayej sa' xb'een li artal li toje' kiyiib'aak aran.

²⁹ Toja' naq ke'xye chirib'ileb' rib': “Ani anchal xb'aanunk re a'in?”, chankeb'. Ke'patz'ink ut ke'tz'ilink chirix toj reetal ke'xnaw naq laj Jedehón, li ralal laj Johás, a'an li kib'aanunk re.

³⁰ Eb' li poyanam li wankeb' sa' li tenamit a'an ke'xye re laj Johás: “Isi qe laawalal ut chikamq, xb'aan naq xjuk' li x'artal laj Bahal ut xyok' li loq'laj che' li wank chi xk'atq”, chankeb' re.

³¹ Ab'anan laj Johás kixsume chixjunileb' li wankeb' chiru: “Ma laa'ex tab'i' texyaloq chirix laj Bahal? Ma laa'ex texkoloq re? Li ani tixyal xkolb'al rix laj Bahal, kamenaq chik naq taasaqewq wulaj. Wi yaal naq laj Bahal a'an Yos, chixkolaq rib', xb'aan naq xjuk'e'k li x'artal”, chan reheb'.

³² Chalen sa' li kutan a'an, Yerubahal chik kiyehe'k re laj Jedehón, ut neke'xye: “Chixkolaq rib' laj Bahal, xb'aan naq xjuk'e'k li x'artal!”.

³³ Chirix chik a'an ke'xjunaji rib' chixjunileb' laj Madián, eb' laj Amalek jo' ajwi' chixjunileb' li wankeb' sa' xjayal releb'l saq'e; ke'q'axonk junpak'al li nima' Jordán ut koxe'xyiib' xmuheb'aaleb' sa' xtaq'ahil Jisrehel.

³⁴ Ab'an li xmusiq' li Qaawa' ki'eechanink re laj Jedehón, ut a'in kixyaab'asi li xxukub' re xb'oqb'aleb' laj Abiéser.

³⁵ Kixtaqlaheb' ajwi' aj esil re xb'oqb'al chixjunileb' laj Manasés, re naq te'xjunaji rib' rik'in. Chirix chik a'an kixb'oqeb' laj Aser, eb' laj Sabulón ut laj Neftalí, li ke'chalk ut ke'xjunaji rib' rik'in.

Li reetalil li rix li karneer

³⁶ Ut laj Jedehón kixye re li Yos: “Wi relik chi yaal naq inb'aan laa'in taakoleb' laj Israel jo' xaye,

³⁷ tinhel li rix junaq karneer sa' xb'een li ch'oxleb'aal. Wi wanq k'ajob' sa' xb'een li rix li karneer naq taasaqewq ut chaqihaq chixjunil li ch'och', tinnaw naq laa'at taakoleb' laj Israel inb'aan, jo' xaye we”.

³⁸ Ut jo'kan kik'ulmank. Laj Jedehón toj eq'la kiwakliik, kixyatz' li rix li karneer, ut jun sek' chi ha' kirisi sa' li rix.

³⁹ Ab'anan laj Jedehón kixye wi' chik re li Yos: “Chakuy inmaak, matjosq'o'k wik'in wi tin'aatinaq wi' chik. B'aanu usilal, nawaj raj rilb'al wi' chik jun xnimal eetalil: chikanaaq chi chaqi li rix li karneer anaqwan ut wanq k'ajob' sa' xb'een chixjunil li ch'och'”, chan.

⁴⁰ Ut li Yos jo'kan kixb'aanu sa' li q'oqyink a'an. Ka'ajwi' li rix li karneer chaqi kikanaak, ut wank k'ajob' sa' xb'een chixjunil li ch'och'.