Jueces 5 - Q'eqchi Bible

Li xb'ich lix Débora ut laj Barak

¹ Sa' li kutan a'an lix Débora ut laj Barak, ralal laj Abinohán, ke'xb'icha li b'ich a'in:

² “Chenima xloq'al li Qaawa', laa'ex li yo'oon wankex chi yalok, jo'k'ihalex li kesume leeb'oqb'al xb'aan li Yos!

³ Ab'ihomaq, ex awab'ej; chineerab'ihaq, ex k'amol b'e! Twaj tinb'ichanq chiru li Qaawa'; tinb'icha xloq'al li Qaawa', xYos laj Israel.

⁴ “At Qaawa', naq kat-elk chaq Seír, naq katnume'k chaq sa' li na'ajej Edom, kixhich'le rib' li ruuchich'och', kichalk chaq li hab' sa' choxa ut k'ajo' naq ke'ha'lenk li choql.

⁵ Kilaje'eek'ank eb' li tzuul chiru li Qaawa', ki'eek'ank li Sinaí chiru li Qaawa', xYos laj Israel.

⁶ Sa' xkutankil laj Sankar, ralal laj Anat, sa' xkutankil lix Jahel ink'a' ki'uxk b'eek sa'eb' li xninqal b'e; ut eb' laj numel junes jalb'e aj chik ke'xk'am.

⁷ Maak'a'eb' chaq chik laj k'amol b'e aran Israel, maak'a'eb' chaq chik toj reetal kinwakliik laa'in lix Débora, kinwakliik laa'in xna'eb' laj Israel.

⁸ “Ke'xsik' ruheb' li ak'il yos ut, naq ak yo li yalok chire rokeb'aal li tenamit, maajun kaw rib' kiwakliik sa' xyanqeb' li ka'k'aal mil aj Israel.

⁹ “Ninyoxink chawu, at inYos, linch'ool wank rik'ineb' li xjolomil laj Israel, rik'ineb' li ke'xyeechi'i rib' chi yalok sa' xk'ab'a' lintenamit. Chenima ru li Qaawa', chejunilex!

¹⁰ “Cheyehaq resil laa'ex li nekexxik chirixeb' li saqi b'uur, jo'wi' laa'ex b'ihom li nekexk'ojlaak chiruheb' tz'uumil k'ojleb'aal; b'ichahomaq laa'ex neb'a' li nekexxik cheroq.

¹¹ Cherab'ihaq xyaab' xkuxeb' laj puktesinel esil, chi xk'atqeb' li ruk'leb'aal ha': aran nab'ichamank li rusilal li Qaawa', jo'nimal kixb'aanu reheb' laj Israel naq li xtenamit li Qaawa' kikub'e chaq chire li okeb'aal.

¹² “Ajen, Débora, ajen! Ajen, ajsi aawu ut b'ichan! Waklin, at Barak, xaqlin, chapeb' li ke'chapok aawe, at ralal laj Abinohán!

¹³ “Toja' naq eb' laj Israel ke'kub'eek wan wi' li okeb'aal, kikub'eek li xtenamit li Qaawa' rochb'eeneb' li q'axal kaweb' rib'.

¹⁴ Eb' li xninqal ru winq ke'kub'e chaq sa' li taq'a, ut chirixeb' a'an koheb' laj puub' re laj Benjamín. Ke'kub'eek ajwi' li neke'taqlank sa' xyanqeb' laj Makir, jo'eb' ajwi' li wankeb' xwankil sa' xyanqeb' laj Sabulón.

¹⁵ Eb' li neke'k'amok b'e sa' xyanqeb' laj Isakar wankeb' rik'in lix Débora ut eb' laj Neftalí yookeb' chirix laj Barak sa' li taq'a ru. “Eb' laj Rubén k'ajo' naq ke'xk'uub' xninqal ru na'leb' sa' xyanqeb' li roqha'!

¹⁶ K'a'ut naq katkanaak sa' xna'ajeb' li ketomq chi rab'inkil xyaab' xxolb' eb' laj k'aak'alenel? Sa' xyanqeb' li roqha', xninqal ru na'leb' ke'xk'uub'.

¹⁷ “Galahad kikanaak junpak'al li nima' Jordán, ut laj Dan k'a'ut naq wank sa'eb' laj ab'l jukub'? Laj Aser kikanaak chire li palaw, yo chi hilank sa' li xna'aj.

¹⁸ Laj Sabulón ut laj Neftalí ink'a' ke'xra li xyu'ameb' sa' li xtaqeq'il li tenamit.

¹⁹ “Toja' naq eb' li awab'ej ke'wulak Tanak, chire li ha' re Mejido; eb' li awab'ej re Kanahán ke'wulak chi yalok, ab'an ink'a' ke'eechanink plaat chi moko b'ihomal.

²⁰ Toj sa' choxa ke'xyal chaq xq'eheb' li chahim; toj sa' li xna'ajeb' ke'yalok rik'in laj Sísara.

²¹ Li nima' Kisón, li najteril roqha' kikelonk reheb'. Kawaq aach'ool, at waanm, b'ehen chi maak'a'aq aaxiw!

²² “Na'eek'ank li ch'och' xb'aaneb' roq li kawaay; neke'kilb'ak, neke'kilb'ak eb' li kawaay.

²³ Majewahomaq Merós, chan li x'ánjel li Qaawa'; majewahomaq, majewahomaq li wankeb' aran, xb'aan naq ink'a' ke'chalk re xtenq'ankil li Qaawa', re xtenq'ankil li Qaawa' jo' neke'xb'aanu li kaweb' rib'.

²⁴ “Usilaatinanb'il taxaq sa' xyanqeb' li ixq lix Jahel, rixaqil laj Jéber aj Ken. Usilaatinanb'il taxaq sa' xb'eeneb' li ixq li neke'wank sa'eb' li muheb'aal!

²⁵ Ha' kixpatz' laj Sísara, ut leech kik'ehe'k re: sa' xsek'eb' li xninqal ru winq chaab'il leech kik'ehe'k re.

²⁶ Lix Jahel kixye' li xtz'e uq' re xchapb'al jun li q'esil ru'uj che', ut rik'in li xnim kixchap li xt'ojleb' laj peech', kixten ut kixjor li xjolom laj Sísara toj reetal kinume'k junpak'al.

²⁷ toj reetal kit'ane'k chi roq, yo chi xtolk'osinkil rib' chi roq lix Jahel; ut b'arwi' kit'ane'k, aran ki'oso'k.

²⁸ “Sa' b'entaan yo chi ilok chaq li xna' laj Sísara; kixjap re chi xyeeb'al chi ra sa' xch'ool: «K'a' naq xb'ay chaq chi k'ulunk li xb'eleb'aal ch'iich'? K'a' naq ink'a' xe'xseeb'a chaq rib' eb' li xkawaay?», chan.

²⁹ Li q'axal wank xna'leb' sa' xyanqeb' li ixqa'al kixsume, ut li na'b'ej kixye wi' chik li raatin sa' xch'ool:

³⁰ «Ch'olch'o ru naq yookeb' chaq chi xjek'inkil li reechanihom chirib'ileb' rib': jun malaj wiib' chi ixq cho'q re li junjunq aj puub'; chaab'il t'ikr yo chaq chi xk'ulb'al laj q'axonel u», chan.

³¹ “Jo'ka'in taxaq naq che'oso'q chixjunileb' li xik' neke'ilok aawe, at Qaawa'. Ut eb' li neke'rahok aawe, chanchanaqeb' taxaq li saq'e naq nalemtz'unk chaq wa'leb'!”. Ut li tenamit ke'wank sa' tuqtuukilal chiru ka'k'aal chihab'.