Jueces 4 - Q'eqchi Bible

Lix Débora, laj Barak ut lix Jahel

¹ Naq kikamk laj Ehud, eb' laj Israel ke'ok wi' chik chi xb'aanunkil li ink'a' nawulak chiru li Qaawa';

² jo'kan naq li Qaawa' kixq'axtesiheb' sa' ruq' laj Jabín, awab'ej re Kanahán, li yo chi awab'ejink aran Jasor. Li xjolomil chixjunileb' laj puub', a'an laj Sísara, li nawank sa' li na'ajej Jaróset-Hakohín.

³ Laj Jabín wank o'k'aal rox o'q'ob' (900) xb'eleb'aal ch'iich' ut k'ajo' naq kixrahob'tesiheb' laj Israel chiru junmay chihab'. Jo'kan naq eb' laj Israel ke'xtz'aama xtenq'ankileb' chiru li Qaawa'.

⁴ Sa'eb' li kutan a'an yo chi k'amok b'e sa' xyanqeb' laj Israel jun li ixq propeet, xDébora xk'ab'a', rixaqil laj Lapidot.

⁵ Lix Débora nak'ojlaak rub'el jun kala', li xkala' lix Débora naxk'ab'a'in, sa' xyanq li tenamit Ramá ut Betel, sa'eb' li xtzuulul Efraín, ut eb' laj Israel neke'wulak rik'in a'an re xtuqub'ankil ru li xch'a'ajkilaleb'.

⁶ Sa' jun kutan lix Débora kixtaqla xb'oqb'al laj Barak, ralal laj Abinohán, li wank rochoch aran Kadés re Neftalí, ut kixye re: “Ma ink'a' tab'i' li Qaawa', xYos eb' laj Israel, xye a'in aawe: «Ayu sa' li tzuul Tabor ut ch'utub'eb' lajeeb' mil chi winq sa' xyanqeb' laj Neftalí ut laj Sabulón.

⁷ Laa'in tink'am chaq aawik'in, chire li nima' Kisón, laj Sísara, xjolomileb' laj puub' re laj Jabín, rochb'eeneb' li xb'eleb'aal ch'iich' ut eb' laj puub'. Te'chalq chi yalok aawik'in, ab'an laa'in tinq'axtesiheb' sa' laawuq'»?”.

⁸ Kichaq'ok laj Barak ut kixye: “Wi tatchalq laa'at chiwix, tinxik; ab'anan wi ink'a' nakatchalk chiwix, ink'a' tinxik”, chan.

⁹ “Us b'i', tinxik chawix -chan lix Débora-. Ka'jan, maawa' laa'at taak'ehe'q aaloq'al sa' li nimla yalok tiklaak re anaqwan, xb'aan naq li Qaawa' tixq'axtesi laj Sísara sa' ruq' jun li ixq”. Toja' naq kixaqliik lix Débora ut koho rochb'een laj Barak aran Kadés.

¹⁰ Aran laj Barak kixch'utub'eb' laj Sabulón ut laj Neftalí. Lajeeb' mil chi winq koheb' chirix. Koho ajwi' lix Débora.

¹¹ Nach' rik'in Kadés, chi xk'atq li xji laj Sahananín, wank li xmuheb'aal laj Jéber aj Ken, laj hi' re laj Moisés. A'an ak xjek'om rib' rik'in li xteepal laj Kaín ut li xch'uutal eb' laj Jobab.

¹² Naq laj Sísara kirab'i resil naq laj Barak, ralal laj Abinohán, ak xtaqe'k chaq sa' xb'een li tzuul Tabor,

¹³ kixch'utub' chixjunileb' li xb'eleb'aal ch'iich' ut eb' laj puub', ut rochb'eeneb' ke'elk aran Jaróset-Hakohín ut koheb' wan wi' li nima' Kisón.

¹⁴ Toja' naq kixye lix Débora re laj Barak: “Xaqlin, xb'aan naq anaqwan xkutankil naq li Qaawa' tixq'axtesi sa' laawuq' laj Sísara. Li Qaawa' a'an aj k'amol b'e chawu”, chan. Laj Barak kikub'eek chiru li tzuul Tabor ut kitaaqeek xb'aaneb' li lajeeb' mil chi winq,

¹⁵ ut li Qaawa' kiroksi xxiweb' laj puub' re laj Sísara, sa' xyanqeb' li xb'eleb'aal ch'iich', chiru laj Barak. Laj Sísara kikub'eek sa' li xb'eleb'aal ch'iich' ut ki'elelik chi roq.

¹⁶ Ut laj Barak kiraanilasiheb' li b'eleb'aal ch'iich' ut eb' laj puub' toj Jaróset-Hakohín. Chixjunileb' laj puub' re laj Sísara ke'kamsiik chi ch'iich' ut maajun kikanaak chi yo'yo.

¹⁷ Laj Jabín, awab'ej re Jasor, ut li xjunkab'al laj Jéber aj Ken wankeb' sa' tuqtuukilal sa'eb' li kutan a'an. Jo'kan naq laj Sísara koho eelel chi roq sa' xmuheb'aal lix Jahel, rixaqil laj Jéber aj Ken.

¹⁸ Lix Jahel ki'elk chi xk'ulb'al laj Sísara ut kixye re: “Okan, wa'; okan sa' li wochoch. Matxiwak”, chan. A'an ki'ok sa' li ochoch ut li ixq kixtz'ap chi t'ikr:

¹⁹ “B'aanu usilal, si b'ayaq wuk'a', xb'aan tchaqiq we”, chan laj Sísara. Li ixq kixte li xtz'uum kuukil li leech, kixk'e chi uk'ak ut kixtz'ap wi' chik re li tz'uum kuk.

²⁰ Ut laj Sísara kixye re lix Jahel: “Wanqat chire li okeb'aal ut, wi ani nak'ulunk ut tixye aawe: «Ma wank anihaq arin?», cha'aq, taaye re naq ink'a'”. Ab'an lix Yahel, rixaqil laj Eber, kixchap jun li che' q'es ru'uj, xkomon li neke'xt'oj sa' ch'och' re xchapb'al li muheb'aal, kixchap ajwi' jun t'ojleb' ut timil timil kijilok chi xk'atq li winq.

²¹ Kamenaq chi wark laj Sísara xb'aan naq tawajenaq chi us. Lix Jahel kixnumsi li q'esnal che' sa' xjolom toj reetal ki'ok sa' ch'och'. Jo'ka'in naq kikamk laj Sísara.

²² Naq laj Barak, li yo xsik'b'al laj Sísara, kiwulak aran, li ixq ki'elk chaq chi xk'ulb'al ut kixye re: “Kim, chink'utaq chawu li winq li yookat xsik'b'al”, chan. Laj Barak ki'ok sa' xmuheb'aal li ixq, ut jiljo chi kamenaq laj Sísara naq kixtaw, laplo ajwi' li che' sa' li xjolom.

²³ Jo'ka'in naq li Yos kixkub'si xwankil laj Jabín, awab'ej re Kanahán, chiruheb' laj Israel sa' li kutan a'an.

²⁴ Ut chalen sa' li kutan a'an yookeb' chi numtaak eb' laj Israel sa' xb'een laj Jabín, awab'ej re Kanahán, toj reetal ke'xsach ru.