Jueces 20 - Q'eqchi Bible

Naq eb' laj Israel ke'yalok rik'ineb' laj Benjamín

¹ Toja' naq chixjunileb' laj Israel, chalen chaq Dan toj Berseba ut Galahad, koxe'xch'utub' rib' jo' jun chi winq, aran Mispá, wan wi' rochoch li Yos.

² Li xninqal ru winqeb' re chixjunil li tenamit ut chixjunileb' li xteepal laj Israel ke'ok sa' li xloq'laj ch'utam li xtenamit li Yos: li xk'ihaleb' a'an jun o'q'ob' mil (400,000) chi winq li wankeb' xch'iich' ut yal chi roqeb'.

³ Eb' laj Benjamín ke'rab'i resil naq eb' laj Israel ch'utch'uukeb' chaq Mispá. Eb' laj Israel ke'xpatz' re laj Leví: “Yehomaq qe chanru naq xwank li kamk”, chankeb'.

⁴ Toja' naq laj Leví, xb'eelom li ixq kikamsiik, ki'ok chi aatinak ut kixye: “Laa'in xinwulak Kibehá re Benjamín wochb'een li wixaqil re xnumsinkil li q'oqyink.

⁵ Ab'anan sa' ajwi' li q'oqyink a'an eb' laj Kibehá xe'chalk sa' inb'een ut xe'xsut li ochoch. Xe'raj raj inkamsinkil, ut k'ajo' naq xe'xb'atz'une li wixaqil toj reetal xkamk.

⁶ Toja' naq xinchap li kamenaq, xinseti ut xintaqla sa' xteepal chixjunil Israel, xb'aan naq xutaanal ut yib'eetal ru li xk'ulmank Israel.

⁷ Chejunilex laa'ex aj Israel: k'oxlahomaq rix ut ilomaq k'aru teeb'aanu”, chan.

⁸ Chixjunil li tenamit jo' jun chi winq naq ke'xaqliik chi xyeeb'al: “Maajun qe laa'o taaxik sa' li xmuheb'aal, maajun taasutq'iiq sa' rochoch.

⁹ A'an a'in li tqab'aanu re Kibehá. Tqab'uuli rix

¹⁰ ut tqisi lajeetq sa' xyanq chixjunileb' li xteepal laj Israel; chirix chik a'an tqasik' ru junjunq sa' xyanqeb' li b'uulinb'ileb' rix. Tqisi lajeetq sa' xyanq o'k'aal, o'k'aal sa' xyanq lajeek'aal rox o'q'ob' ut lajeek'aal rox o'q'ob' sa' xyanq lajeeb' mil, re naq toxe'xsik' xtzekemq eb' laj puub'. Ut eb' li junch'ol chik te'xik Kibehá re xk'eeb'al reeqaj li maa'usilal xe'xb'aanu re Israel”.

¹¹ Jo'kan naq chixjunileb' laj Israel ke'xch'utub' rib' jo' jun chi winq chi yalok rik'in li tenamit Kibehá.

¹² Ke'xtaqlaheb' aj esil rik'ineb' chixjunil li ralal xk'ajol aj Benjamín chi xyeeb'al reheb': “K'a' chi maa'usilal a'an li xk'ulmank sa' eeyanq?

¹³ Anaqwan ajwi' q'axtesihomaqeb' sa' quq' li maa'us aj winqeb' a'an li wankeb' Kibehá, re naq te'qakamsi ut chisachq chi junajwa li maa'usilal sa' li tenamit Israel”. Ab'anan eb' laj Benjamín ink'a' ke'raj rab'inkileb' li rech aj Israelil,

¹⁴ ke'elk b'an sa' xtenamiteb' ut ke'xch'utub' rib' Kibehá re yalok rik'ineb' laj Israel.

¹⁵ Sa' li kutan a'an eb' laj Benjamín li ke'chalk sa' jalan jalanq chi tenamit, a'aneb' oob' xka'k'aal mil chi winq li wankeb' xch'iich', chi ink'a' k'eeb'ileb' sa' ajl eb' laj Kibehá.

¹⁶ Sa' xyanqeb' chixjunileb' laj puub' a'in wankeb' o'lajuk'aal xkab' o'q'ob' (700) chi winq sik'b'ileb' ru, aj tz'eheb'; chixjunileb' a'an useb' chi xjok'inkil chi pek junaq ismal chi ink'a' neke'xkol.

¹⁷ Ut eb' laj Israel li koheb' chi yalok a'aneb' jun o'q'ob' mil (400,000) li wankeb' xch'iich', chi ink'a' k'eeb'ileb' sa' ajl eb' laj Benjamín. Chixjunileb' li winq a'an yo'ooneb' chi yalok.

¹⁸ Eb' laj Israel koheb' ut ke'taqe'k Betel. Aran ke'xpatz' re li Yos: “Ani qe laa'o taaxik xb'enwa chi yalok rik'ineb' laj Benjamín?”, chankeb'. Ut li Qaawa' kixsumeheb': “Eb' laj Judá a'aneb' li te'xik xb'enwa”, chan.

¹⁹ Jo'kan naq eb' laj Israel ke'wakliik eq'la ut koxe'hilanq sa' xka'yab'aal Kibehá.

²⁰ Koheb' chi yalok rik'ineb' laj Benjamín ut ke'xtzolob' rib' nach' rik'in Kibehá.

²¹ Ab'an eb' laj Benjamín ke'elk chaq sa' li tenamit ut ke'xkamsiheb' wiib' xka'k'aal mil chi aj Israel sa' li kutan a'an.

^22-24 Jo'kan naq eb' laj Israel koheb' Betel chi yaab'ak chiru li Qaawa' toj reetal ki'ewuuk; chirix chik a'an ke'xpatz' re: “Ma tooxik wi' chik chi yalok rik'ineb' laj Benjamín, li qech aj Israelil?”, chankeb'. Kichaq'ok li Qaawa' ut kixye reheb': “Ayuqex chi yalok”, chan. Toja' naq eb' laj Israel ke'kawuuk xch'ool ut sa' li kutan jun chik ke'xtzolob' wi' chik rib' re yalok sa' ajwi' li na'ajej ke'wank wi' sa' li xb'een kutan.

²⁵ Ab'anan jo'kan wi' chik ke'xk'ul. Eb' laj Benjamín ke'elk chaq Kibehá chi xk'ulb'aleb' ut ke'xkamsiheb' waqxaqlaju mil chik aj puub' aj Israel.

²⁶ Toja' naq chixjunileb' laj Israel ut chixjunileb' laj puub' ke'taqe'k wi' chik Betel, ke'yaab'ak chaq ut aran ke'kanaak chiru li Qaawa'. Jun kutan ke'xkuy xsa'eb' toj reetal ki'ewuuk; ke'mayejak re xk'amb'al wi' chik rib' sa' usilal rik'in li Qaawa' ut ke'xyeechi'i ajwi' k'atb'il mayej.

^27-28 Sa'eb' li kutan a'an li xLoq'laj Kaaxil li xSumwank li Yos wank aran Betel ut laj Pinjás, ralal laj Elehasar, ralal laj Aharón, yo chaq chi k'anjelak cho'q aj tij. Ut eb' laj Israel ke'patz'ok re li Qaawa': “Ma tento naq tooxik wi' chik chi yalok rik'ineb' laj Benjamín li qech aj Israelil malaj ut ink'a' chik tooxik?”, chankeb'. Li Qaawa' kixsumeheb': “Ayuqex xb'aan naq wulaj tinq'axtesiheb' sa' leeruq'”, chan.

²⁹ Toja' naq wankeb' winq aj Israel ke'xmuq rib' chi xsutam Kibehá,

³⁰ ut sa' rox li kutan eb' laj Israel koheb' sa' xb'eeneb' laj Benjamín ut ke'xtzolob' wi' chik rib' re yalok, sa' xka'yab'aal Kibehá, jo' ak xb'aanuhomeb' chaq.

³¹ Eb' laj Benjamín ke'elk chaq chi xk'ulb'aleb' ut ke'xk'e rib' chi najtob'resiik rik'in li tenamit. Ke'xtikib' wi' chik xkamsinkeb' laj Israel jo' ak xb'aanuhomeb' chaq ka' sut; ut ke'xkamsi lajeeb' xka'k'aal chi aj Israel sa' li b'e nataqe'k Betel ut sa' li jun chik naxik Kibehá, jo' ajwi' sa' ru taq'a.

³² Sa' xch'ooleb' naq eb' laj Israel yookeb' chi elelik xb'aan naq ke'q'axe'k wi' chik ru. Ab'anan moko jo'kan ta. Eb' laj Israel ak wank sa' xch'ooleb' naq te'eleliq chiruheb' laj Kibehá, re naq eb' a'in te'elq sa' li tenamit ut te'xik sa'eb' li b'e.

³³ Sa' junpaat chixjunileb' laj Israel ke'elk chaq sa' li xna'ajeb', ke'xtzolob' rib' aran Bahal-Tamar, ut eb' li wankeb' chi muqmu ke'elk chaq sa' li xna'ajeb', sa' xjayal rokeb'l saq'e re Kibehá.

³⁴ Lajeeb' mil chi winq aj Israel sik'b'ileb' ru ke'wulak sa' xka'yab'aal Kibehá ut ke'xtikib' yalok chi kaw, chi ink'a' ke'xk'e reetal eb' laj Benjamín li nimla rahilal li yo chi chalk sa' xb'eeneb'.

³⁵ Li Qaawa' kixq'ax ruheb' laj Benjamín chiruheb' laj Israel ut sa' li kutan a'an ke'kamsiik oob' xka'k'aal mil rik'in o'k'aal (25,100) chi aj puub' aj Benjamín.

³⁶ Toja' naq eb' laj Benjamín ke'xk'e reetal naq q'axb'ileb' ru. Ke'xtaw ru naq eb' laj Israel ke'xkanab'eb' chi chalk xb'aan naq k'ojk'ookeb' xch'ool rik'ineb' li muqmuukeb' chi xsutam Kibehá.

³⁷ Eb' li winq muqmuukeb' koheb' sa' junpaat sa' xb'een Kibehá, ke'xjek'i rib' ut ke'xkamsiheb' chi ch'iich' chixjunileb' li tenamit.

³⁸ Ak k'uub'k'u xb'aaneb' laj Israel rik'ineb' li ke'xmuq rib' naq jun li sib' li taataqe'q chaq sa' li tenamit,

³⁹ a'anaq reetalil naq tento te'xsutq'isi rib' sa' li yalok. Eb' laj Benjamín ke'xtikib' xkamsinkil mare lajeeb' xka'k'aal chi aj Israel, yookeb' chi xyeeb'al chirib'ileb' rib': “Q'axb'ileb' ru qab'aan chi junajwa jo' xb'ensut”, chankeb'.

⁴⁰ Ab'anan sa' li honal a'an ki'ok chi taqe'k sib' sa' chaq li tenamit, ut eb' laj Benjamín, naq ke'ilok chirixeb', ke'ril li xtenamiteb' yo chi k'atk, toj sa' choxa nawulak li xxamlel.

⁴¹ Toja' naq eb' laj Israel ke'xsutq'isi rib', ut eb' laj Benjamín k'ajo' naq ki'ok xxiweb' naq ke'ril li nimla rahilal yo chi chalk sa' xb'eeneb'!

⁴² Ke'xtikib' elelik chiruheb' laj Israel sa' xjayal li chaqich'och', ab'an yookeb' laj puub' aj Israel chirixeb', ut ink'a' ke'ruuk chi elelik: eb' li ke'elk sa' li tenamit ke'xrameb' ut kilaje'xkamsiheb'.

⁴³ Eb' laj Israel ke'xsuteb' laj Benjamín, ke'raanilasiheb' chi maak'a' hilank ut ke'xsach ruheb' chi junajwa toj ke'wulak Kibehá, sa' xjayal releb'l saq'e.

⁴⁴ Waqxaqlaju mil chi aj Benjamín ke'kamk, yo'ooneb' chi yalok chixjunileb'.

⁴⁵ Ut li junch'ol chik ke'elelik ut koheb' sa' li chaqich'och', sa' xjayal li Saqoonak re Rimón. Eb' laj Israel koxe'xchapatq sa' li b'e oob' mil chi winq; chirix chik a'an ke'raanilasiheb' laj Benjamín toj Kidón ut ke'xkamsi oob' o'q'ob' (2,000) chi winq.

⁴⁶ Li xk'ihaleb' laj Benjamín li ke'kamsiik sa' li kutan a'an, oob' xka'k'aal mil chi winq li wankeb' xch'iich' ut yo'ooneb' chi yalok chixjunileb'.

⁴⁷ Ab'an lajeek'aal xkab' o'q'ob' (600) ke'ruhank chi elelik ut koheb' sa' li chaqich'och', sa' li Saqoonak re Rimón, ut aran ke'wank kaahib' po.

⁴⁸ Moqon chik eb' laj Israel koheb' sa' xb'eeneb' li junch'ol chik ut ke'xkamsiheb' chi ch'iich' chixjunileb' li xwinqilal li tenamit, chixjunil li ketomq ut jo'ch'inal jo'nimal ke'xtaw. Kilaje'xk'at ajwi' chixjunileb' li tenamit ke'nume'k wi'.