Jueces 19 - Q'eqchi Bible

Jun li winq aj Leví ut li ixq aj Belén

¹ Sa'eb' li kutan a'an, naq maak'a'eb' chaq awab'ej aran Israel, kiwank jun li winq aj Leví, sa' xnub'ajlil li xtzuulul Efraín. Kixsik' jun li ixq aj Belén, sa' xteepal Judá, re taawanq rik'in.

² Ab'anan ink'a' us xna'leb' li ixq a'an. Kixkanab' li winq ut kisutq'iik sa' rochoch li xyuwa' aran Belén, sa' xteepal Judá, b'arwi' kixnumsi kaahib'aq po.

³ Toja' naq li xb'eelom kixchap xb'e ut koho rik'in li ixq re xtz'aamankil ut xq'unb'esinkil naq taaxik wi' chik rik'in. Kixk'am xmoos chirix ut jun sumal xb'uur. Li ixq kiroksi li winq sa' rochoch li xyuwa'. Kisaho'k ajwi' xch'ool li yuwa'b'ej naq kiril chi wulak ut ki'elk chaq chi xk'ulb'al.

⁴ Laj hi' re, li xyuwa' li ixq, kirelaji ru laj Leví ut a'an kikanaak oxib' kutan aran. Ke'wa'ak ke'uk'ak ut aran ke'xnumsi li q'oqyink.

⁵ Sa' xka li kutan naq kisaqewk, ke'wakliik toj eq'la ut laj Leví kixkawresi rib' re taaxik. Ab'anan li xyuwa' li ixq kixye re li xhi': “Chatzeka jun hab'okaq re xkolb'al laach'ool; tojo' naq tatxik”, chan.

⁶ Ke'chunlaak chi xkab'ichaleb' ut ke'ok chi wa'ak ut uk'ak. Chirix chik a'an li yuwa'b'ej kixye re li winq: “B'aanu usilal, chanumsi jun q'oqyink chik arin ut taasaho'q laach'ool”, chan.

⁷ Ut us ta laj Leví kixaqliik re taaxik, laj hi' re kirelaji ru toj reetal kikanaak jun q'oqyink chik.

⁸ Sa' ro' li kutan laj Leví kiwakliik eq'la re taaxik, ab'an li xyuwa' li ixq kixye re: “Wa'in wan xb'enwa re naq taak'ulunq laach'ool”, chan. Jo'kan naq ke'xnumsi li kutan chi wa'ak xkab'ichaleb' toj reetal ki'ewuuk.

⁹ Tojo' naq li b'eelomej rochb'een li ixq ut li xmoos ke'xaqliik re xik, ab'an laj hi' re, li xyuwa' li ixq, kixye re: “K'e reetal, ak x'ewuuk chi us. Numsi li q'oqyink arin ut taasaho'q laach'ool. Wulaj eq'la te'xik ut tatsutq'iiq sa' laawochoch”, chan.

¹⁰ Ab'an li winq ink'a' kiraj xnumsinkil li q'oqyink aran; kixaqliik, koho ut kiwulak sa' xka'yab'aal Jebús, naraj naxye Jerusalén, rochb'een li ixq, li xmoos ut xkab'ichaleb' li xb'uur chi wankeb' riiq.

Li xmaakeb' laj Kibehá

¹¹ Ak x'ewuuk chi us naq ke'wulak nach' rik'in Jebús. Jo'kan naq li moosej kixye re laj eechal re: “Us raj naq tqakanab' b'eek ut too'ok sa' xtenamiteb' laj Jebús re xnumsinkil li q'oqyink aran”.

¹² Kisumeek xb'aan laj eechal re: “Ink'a' too'ok sa' jun tenamit maawa' xkomoneb' laj Israel. Paynum toxoonume'q toj Kibehá,

¹³ ut tqanumsi li q'oqyink Kibehá malaj Ramá”, chan.

¹⁴ Paynum b'i' koxe'nume'q ut koheb'. Ak x'ewuuk chi us naq ke'wulak sa' xka'yab'aal Kibehá, sa' xteepal Benjamín.

¹⁵ Toja' naq ke'ok sa' li tenamit re xnumsinkil li q'oqyink. Laj Leví ki'ok aran ut koxk'ojlaaq sa' xyi li tenamit, ab'anan maajun kiyeechi'ink rochochnaaleb' re te'xnumsi wi' li q'oqyink.

¹⁶ Naq ki'aak'ab'o'k, kinume'k jun cheekel winq li yo chaq chi sutq'iik sa' k'aleb'aal chi k'anjelak. A'an jun li winq chalenaq sa' xtzuulul Efraín ut wank jo' aj numel aran Kibehá, xb'aan naq eb' laj aran aj Benjamineb'.

¹⁷ Li cheekel winq kixtaqsi li rilob'aal ut kixka'ya laj b'ihaaj li wank sa' xyi li tenamit, ut kixye re: “B'ar xatchalk chaq ut b'ar xik aawe?”, chan.

¹⁸ Kisumeek: “Yal nume'k qe. Belén, sa' xteepal Judá, xoochalk chaq ut yooko chi xik sa' xnub'ajlil li xtzuulul Efraín, xb'aan aj aranin. Xinwulak chaq Belén, sa' xteepal Judá, ut anaqwan yookin chi sutq'iik sa' wochoch, ab'anan maajun nayeechi'ink wochochnaal.

¹⁹ Wank xwaheb' li qab'uur, wank qawa quk'a' laa'o: naraj naxye, cho'q we laa'in, li wixaqil ut linmoos li na'ochb'eenink we. Maak'a' xmajel qe”.

²⁰ Ab'anan li cheekel winq kixye re: “Chiwanq tuqtuukil usilal aawik'in. Laa'in tink'e aawe jo'ch'inal jo'nimal aajelat wi'. Ab'anan maanumsi li q'oqyink sa' xyi li tenamit”, chan.

²¹ Ut kixk'am sa' rochoch ut kixk'e xwaheb' li b'uur. Li winq ut eb' li wankeb' rochb'een ke'xch'aj roqeb', ke'wa'ak ut ke'uk'ak.

²² Naq yook xsahilal sa' xch'ooleb', wankeb' winq ink'a' useb' xna'leb', ke'xsut li ochoch, ke'xtenteni re li okeb'aal ut ke'xye re li cheekel winq, laj eechal ochoch: “Isi chaq li winq li x'ok sa' laawochoch. Tqaj toowarq rik'in!”, chankeb'.

²³ Ab'an laj eechal ochoch kichalk wankeb' wi' ut kixye reheb': “Ink'a', ex was wiitz'in; meeb'aanu li ink'a' us. Li winq a'in wula': meeb'aanu li maa'usilal a'an.

²⁴ We' linrab'in li toj tuq'ixq. Tinq'axtesi eere. Chapomaq ut b'aanuuq re li k'aru teeraj, ab'anan meeb'aanu maa'usilal re li winq a'an”.

²⁵ Ab'anan eb' li winq ink'a' ke'raj rab'inkil. Toja' naq laj Leví kixchap li rixaqil ut kirisi chaq chirix kab'l reheb'. Eb' a'an ke'xb'atz'une ut chixjunil q'oqyink ke'xb'aanu li k'aru ke'raj re toj reetal kisaqewk; tojo' naq ke'xkanab'.

²⁶ Hik'ho kisutq'iik li ixq sa' rochoch li winq wan wi' li xb'eelom ut koxt'ane'q chire li okeb'aal. Aran kikanaak toj reetal kikutano'k.

²⁷ Eq'la kiwakliik li xb'eelom, kixte li okeb'aal re taaxik, ut kiril li ixq jiljo chirix kab'l chi wank ruq'eb' sa' xjayal li okeb'aal.

²⁸ Toja' naq kixye re: “Waklin, yo'o!”, chan. Ab'an ink'a' kisumeek. Toja' naq kixpaqo, kixk'e sa' xb'een li xb'uur ut koho sa' li xtenamit.

²⁹ Naq kiwulak sa' rochoch, kixxok jun xch'iich', kixchap li ixq ut kixseti: kab'laju jachal ki'elk! Ut kixtaqla xtib'el li kamenaq sa' chixjunil xteepal Israel.

³⁰ Jo'k'ihaleb' li neke'ilok re neke'xye: “Maajun wa kik'ulmank chi moko ki'ilmank a'in sa' xyanqeb' laj Israel, chalen sa' relikeb' chaq Ejiipt toj anaqwan. K'oxlahomaq rix a'an, patz'omaq eena'leb' ut ilomaq k'aru teeb'aanu”, chankeb'.