Jueces 15 - Q'eqchi Bible

¹ Moqon chik, sa' xq'ehil li xq'olb'al li triiw, koho laj Sansón chi rula'aninkil li rixaqil. Kixk'am jun xch'ina chib'aat ut kixye sa' xch'ool: “Ok we rik'in li wixaqil, sa' li xwarib'aal”, chan. Ab'an li xyuwa' li ixq ink'a' kixkanab' chi ok,

² ut kixye re: “Sa inch'ool laa'in naq ink'a' chik nakawaj li ixq; jo'kan naq xink'e re laawamiiw. Ab'anan wank li riitz'in li q'axal ch'ina'us chik chiru a'an. K'a' naq ink'a' taak'am cho'q reeqaj?”, chan.

³ Kixye laj Sansón: “Anaqwan maak'a' inmaak wi k'aru ink'a' us tinb'aanu reheb' laj Filistea!”, chan.

⁴ Toja' naq koho ut kixchap o'lajuk'aal (300) chi yak. Kixb'ak'eb' sa' ka'kab'il chiru li xyeheb', rochb'een junjunq chi chaj.

⁵ Chirix chik a'an kixloch xxamleleb' li chaj ut kirach'ab'eb' li yak sa' li na'ajej awb'il wi' li triiw xb'aaneb' laj Filistea. Chi jo'kan kixk'at chixjunil li triiw li wank chi joob' jo'wi' li toj maji' q'olb'il; kixk'at ajwi' li awimq uub' ut oliiw.

⁶ “Ani xb'aanunk re a'in?”, chankeb' laj Filistea. Ke'sumeek: “Laj Sansón, li xhi' laj Timná, xb'aanunk re xb'aan naq a'in kixmaq' li rixaqil ut kixk'e re jun li ramiiw”. Toja' naq eb' laj Filistea koheb' ut ke'xk'at chaq li ixq rochb'een li xyuwa'.

⁷ Naq laj Sansón kirab'i resil a'an, kixye reheb': “Xb'aan naq xeb'aanu a'in, relik chi yaal ninye eere naq ink'a' taak'ojlaaq inch'ool toj tink'e reeqaj eere”, chan.

⁸ K'ajo' naq kichalk xjosq'il laj Sansón! Tikto kixrahob'tesiheb' chi numtajenaq ut kixkamsi naab'aleb'. Moqon chik koho chi wank sa' li ochoch pek li wank sa' li saqoonak re Etán, ut aran kikanaak.

Laj Sansón ut li xkalam e li b'uur

⁹ Eb' aj Filistea koheb' Judá. Aran ke'xyiib' li xmuheb'aaleb' ut ke'xcha'cha'i rib' toj ke'wulak Lejí.

¹⁰ Naq ke'xtikib' yalok, eb' laj Judá ke'xpatz' reheb': “K'a'ut naq xexchalk chi yalok qik'in?”. Ke'chaq'ok ut ke'xye: “Xoochalk chi xchapb'al laj Sansón, re xb'aanunkil re jo' xb'aanu qe”, chankeb'.

¹¹ Toja' naq lajeek'aal xwaqxaq o'q'ob' (3,000) aj Judá ke'kub'eek sa' li ochoch pek li wank sa' li saqoonak re Etán ut ke'xye re laj Sansón: “Ma ink'a' nakanaw naq eb' laj Filistea yookeb' chi numtaak sa' qab'een? K'aru xab'aanu qe?”, chankeb'. Laj Sansón kixsumeheb': “Jo' xe'xb'aanu we laa'in, jo'kan naq xinb'aanu reheb'”, chan.

¹² Toja' naq ke'xye re: “Xoochalk chachapb'al re aaq'axtesinkil sa' ruq'eb' laj Filistea”, chankeb'. Kichaq'ok laj Sansón: “Yehomaq leeraatin naq ink'a' tineekamsi”, chan.

¹³ Ke'xsume: “Ink'a' tatqakamsi. Ka'ajwi' tqaj aachapb'al re aaq'axtesinkil sa' ruq'eb'”, chankeb'. Tikto ke'xb'ak' rik'in wiib' k'aam li toj ak'eb', ut ke'risi chaq sa' li saqoonak.

¹⁴ Naq ke'wulak aran Lejí, japjookeb' re laj Filistea naq ke'xk'ul laj Sansón sa' li xtenamiteb'. Ab'an li xMusiq' li Qaawa' kichalk sa' xb'een laj Sansón ut a'in kixt'upiheb' li k'aam li b'ak'b'ookeb' wi' li ruq' ut li xtel, kama' wi' li k'atb'il noq', ut kik'ixonk li xb'ak'b'al sa' ruq'.

¹⁵ Chirix chik a'an kixtaw jun xkalam e li b'uur li toje'aq na'oso'k li rix, kixye' li ruq', kixxok ut chiru a'an kixkamsi lajeek'aal rox o'q'ob' (1,000) chi winq:

¹⁶ “Rik'in xkalam e b'uur xinkanab'eb' chi tub'tu; rik'in xkalam e b'uur xinkamsi lajeek'aal rox o'q'ob' chi winq”, chan laj Sansón.

¹⁷ Naq kiraqe'k chi aatinak, kixkut li kaalam e. Jo'kan naq li na'ajej a'an Ramat-Lejí kikanaak cho'q xk'ab'a'.

¹⁸ K'ajo' naq taachaqiq re laj Sansón naq kixb'aanu a'an! Jo'kan naq kixyaab'a xk'ab'a' li Qaawa' ut kixye: “Laa'at xinaak'e chi numtaak sa' xb'eeneb' laj Filistea. Ut anaqwan ma tinaakanab' chi kamk xb'aan chaqi'eel? Ma tinaaq'axtesi sa' ruq'eb' li ink'a' nakate'xpaab'?”, chan.

¹⁹ Toja' naq li Yos kix'itz' li jul li wank Lejí ut ki'elk chaq ha' aran. Naq ki'uk'ak laj Sansón, kik'ulunk xch'ool ut kikawuuk li roq ruq'. Jo'kan naq En-Hakoré kikanaak cho'q xk'ab'a' li yo'leb'aal ha' li wank Lejí, toj sa'eb' li kutan anaqwan.

²⁰ Laj Sansón kik'amok b'e chiruheb' laj Israel chiru junmay chihab', naq wankeb' rub'el xwankileb' laj Filistea.