Jueces 12 - Q'eqchi Bible

Laj Jefté ut eb' laj Efraín. Xkamik laj Jefté

¹ Eb' laj Efraín ke'xch'utub' rib', ke'nume'k junpak'al li nima' Jordán sa' xjayal Safón ut ke'xye re laj Jefté: “K'a' naq xatwulak chi yalok rik'ineb' laj Amón ut ink'a' xoohaab'oq chawix? Anaqwan tqak'at laawochoch chi wanqat chisa'!”, chankeb'.

² Kichaq'ok laj Jefté ut kixye reheb': “Laa'in ut lintenamit kaw xooyalok rik'ineb' laj Amón. Xinpatz' intenq'ankil eere, ab'anan ink'a' xulineekol sa' ruq'eb'.

³ Naq xwil naq maajun eere xchalk chintenq'ankil, laa'in ink'a' xinra linyu'am: xkohin sa' xb'eeneb' laj Amón, ut li Qaawa' xq'axtesiheb' sa' wuq'. K'a' put naq xexchalk anaqwan chi yalok wik'in?”, chan.

⁴ Toja' naq laj Jefté kixch'utub' chixjunileb' li xwinqilal Galahad ut ki'ok chi yalok rik'ineb' laj Efraín. Eb' laj Galahad ke'xq'ax ruheb' laj Efraín xb'aan naq eb' a'in neke'xye: “Laa'ex aj Galahad li wankex sa' xyanqeb' laj Efraín ut laj Manasés, xetz'eqtaanaheb' laj Efraín leerech tenamitul”, chankeb'.

⁵ Eb' laj Galahad ke'xrameb' li na'ajej li ink'a' cham wi' li ha' sa' li Jordán, re naq eb' laj Efraín ink'a' te'nume'q junpak'al li nima'; ut naq junaq aj eelel aj Efraín naxye: “Kanab'ahomaqin chi nume'k”, toja' naq eb' laj Galahad neke'xpatz' re: “Ma laa'at aj Efraín?”. Wi a'an naxye naq ink'a',

⁶ neke'xpatz' wi' chik re: “Ye b'i' Xibólet”, ut wi a'an naxye Sibólet, xb'aan naq ink'a' naru xyeeb'al chi tz'aqal li aatin a'an, toja' naq neke'xchap ut neke'xch'ot li xjolom aran chire li nima' Jordán. Wiib' roxk'aal mil (42,000) chi winq aj Efraín ke'kamsiik sa' li kutan a'an.

⁷ Waqib' chihab' kitaqlank laj Jefté aj Galahad sa' xb'eeneb' laj Israel. Chirix chik a'an kikamk ut kimuqe'k sa' li xtenamit, a'an Mispá re Galahad.

Laj Ibsán

⁸ Chirix li xkamik laj Jefté, a' chik laj Ibsán aj Belén ki'ok chi taqlank sa' xb'eeneb' laj Israel.

⁹ Laj Ibsán kiwank chaq lajeeb' xka'k'aal (30) li ralal ut lajeeb' xka'k'aal li xrab'in, ut chixjunileb' kixsumub'eb' rik'ineb' li jalaneb' xtenamit. Wuqub' chihab' kitaqlank sa' xb'eeneb' laj Israel,

¹⁰ ut naq kikamk, kimuqe'k aran Belén.

Laj Elón

¹¹ Chirix a'an, a' chik laj Elón aj Sabulón ki'ok chi taqlank sa' xb'eeneb' laj Israel. Ut kixjolomiheb' laj Israel chiru lajeeb' chihab'.

¹² Naq kikamk laj Elón aj Sabulón, kimuqe'k aran Ayalón, sa' xteepal Sabulón.

Laj Abdón

¹³ Chirix li xkamik laj Elón, a' chik laj Abdón, ralal laj Hilel, Piratón li xtenamit, kiwank cho'q aj k'amol xb'eheb' laj Israel

¹⁴ chiru waqxaqib' chihab'. Laj Abdón kiwank chaq ka'k'aal li ralal ut lajeeb' xka'k'aal li xmam, li neke'b'eek chirix lajeeb' xkaak'aal (70) chi kok' b'uur.

¹⁵ Naq kikamk laj Abdón, ralal laj Hilel, aj Piratón, kimuqe'k aran Piratón, sa' xteepal Efraín, sa'eb' li tzuul reheb' laj Amalek.